ଜମ୍ମୁ,୩।୮: ଇଦ୍ରେ ଘରକୁ ଆସିଥିବା ଜବାନଙ୍କୁ ଆତଙ୍କବାଦୀମାନେ ରବିବାର ସନ୍ଧ୍ୟାରେ ଅପହରଣ କରିନେଇଛନ୍ତି। ଏଥିସହ ଯବାନଙ୍କ ଗାଡ଼ିକୁ ମଧ୍ୟ ଆତଙ୍କବାଦୀମାନେ ପୋଡ଼ି ଦେଇଥିବା ଅଭିଯୋଗ ହୋଇଛି। ଏହି ଘଟଣା ଜଣାପଡ଼ିବା ପରେ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରାଯାଇ ସର୍ଚ୍ଚ ଅପରେଶନ୍ ଜାରି ରହିଛି। ସୂଚନାଯୋଗ୍ୟ, ୧୬୨ ଟେରିଟୋରିଆଲ ଆର୍ମିରେ ଦକ୍ଷିଣ କଶ୍ମୀରର ବାଲାପୁରରେ ୧୨ସେକ୍ଟର ହେଡକ୍ୱାର୍ଟରରେ ମୁତୟନ ଥିବା ଶାକିର ମଞ୍ଜୁର ଇଦ୍ ଅବସରରେ ଛୁଟିରେ ଘରକୁ ଆସିଥିଲେ। ରବିବାର ସନ୍ଧ୍ୟାରେ ଜିଲାର ରାମଭାମା ଅଞ୍ଚଳରେ ଥିବା ଯବାନ ଶାକିରଙ୍କ ଘରେ ଆତଙ୍କବାଦୀମାନେ ପହଞ୍ଚିଥିଲେ। ସେଠାରୁ ତାଙ୍କୁ ଜବରଦସ୍ତି ଅପହରଣ କରିନେବା ସହ ସାଙ୍ଗରେ ଘରକୁ ନେଇଥିବା ଗାଡ଼ିରେ ମଧ୍ୟ ଆତଙ୍କବାଦୀମାନେ ନିଆଁ ଲଗାଇଦେଇଥିଲେ। ପରେ ପରିବାର ଲୋକ ଏନେଇ ପୋଲିସରେ ଅଭିଯୋଗ କରିଥିଲେ। ଏହାପରେ ସୁରକ୍ଷାକର୍ମୀ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରି ସର୍ଚ୍ଚ ଅପରେଶନ୍ ଆରମ୍ଭ କରିଥିଲେ। ସୂଚନା ମୁତାବକ, ଅଗଷ୍ଟ ୫ରେ ଜମ୍ମୁ-କଶ୍ମୀରରେ ଅନୁଚ୍ଛେଦ ୩୭୦ହଟାଯିବାର ପ୍ରଥମ ବାର୍ଷିକି ହେଉଥିବା ବେଳେ ଏହାପୂର୍ବରୁ ଘାଟିରେ ଆତବାଦୀମାନେ ବଡ଼ଧରଣର ଆକ୍ରମଣ ପାଇଁ ଷଡ଼ଯନ୍ତ୍ର ରଚିଛନ୍ତି। ମିଳିଥିବା ଗୁଇନ୍ଦା ବିଭାଗର ସୂଚନା ଅନୁସାରେ ସୀମା ଆରପାରିରୁ ସେନା, ପୋଲିସ ଓ ଏସ୍ପିଙ୍କୁ ଟାର୍ଗେଟ କରିବାକୁ ତାଙ୍କୁ ନିର୍ଦ୍ଦେଶ ଦିଆଯାଇଛି।
