ନୂଆଦିଲ୍ଲୀ,୨୪।୧୦: ଏଲ୍ଓସିରେ ପାକିସ୍ତାନ ଏବଂ ଏଲ୍ଏସିରେ ଚାଇନା ଭାରତ ପାଇଁ ସମସ୍ୟା ସୃଷ୍ଟି କରିବା ଜାରି ରଖିଛନ୍ତି। ତେବେ ଏଣିକି ସୀମାକୁ ସୁରକ୍ଷିତ ରଖିବା ସହଜ ହୋଇପାରିବ। ସୋଲାର ଗନ୍ ଦ୍ୱାରା ଶତ୍ରୁଙ୍କୁ ସହଜରେ ଚିହ୍ନଟ କରାଯାଇ ନିପାତ କରାଯାଇ ପାରିବ। ଏଭଳି ଏକ ଗନ୍ ମିରଟ ଇନଷ୍ଟିଚ୍ୟୁଟ ଅଫ ଇଞ୍ଜିନିୟରିଂ ଟେକ୍ନୋଲୋଜି (ଏମ୍ଆଇଇଟି) ଦ୍ୱାରା ବିକଶିତ କରାଯାଇଛି। ଇଞ୍ଜିନିୟରିଂ କଲେଜ ପକ୍ଷରୁ ଏକ ମାନବ ବିହୀନ ଏଭଳି ସୀମା ସୁରକ୍ଷା ବ୍ୟବସ୍ଥା ପ୍ରସ୍ତୁତ କରାଯାଇଛି। ଏହା ଦ୍ୱାରା ଦୁର୍ଗମ ଅଞ୍ଚଳରେ ଶତ୍ରୁଙ୍କୁ ନିପାତ କରିବା ସହଜ ହେବ।
ଏଥିରେ ଥିବା ସେନ୍ସର କ୍ୟାମେରା ଦୂରରୁ ଶତ୍ରୁମାନଙ୍କ ଉପରେ ନଜର ରଖିପାରିବ। ଏହି ମାନବବିହୀନ ବନ୍ଧୁକ ଯେକୌଣସି ପ୍ରକାରର ଶବ୍ଦ ଶୁଣି ନିଜେ ନିଷ୍ପତ୍ତି ନେବା ସହିତ ଶତ୍ରୁମାନଙ୍କ ଉପରକୁ ଗୁଳି ଚଳାଇବାକୁ ସକ୍ଷମ ହେବ।
ଏହାକୁ ବିକଶିତ କରିଥିବା ଯୁବ ବୈଜ୍ଞାନିକ ଶ୍ୟାମ ଚୌରାସିଆ କହିଛନ୍ତି ଯେ, ଏହାର ଲକ୍ଷ୍ୟଭେଦ କ୍ଷମତା ପ୍ରାୟ ୫୦୦ ମିଟର ରହିଛି। ପରବର୍ତ୍ତୀ ସମୟରେ ଲକ୍ଷ୍ୟଭେଦ କ୍ଷମତାକୁ ଅଧିକ ବୃଦ୍ଧି କରାଯାଇପାରିବ। ଏହି ମାନବ ବିହୀନ ବନ୍ଧୁକକୁ ସ୍ବୟଂଚାଳିତ ଏବଂ ମାନୁଆଲ ମଧ୍ୟ କରାଯାଇପାରିବ। ଏହା ସ୍ବୟଂଚାଳିତ ହୋଇଥିବାରୁ ଏହାକୁ ପରିଚାଳନା କରିବାର କୌଣସି ଆବଶ୍ୟକତା ରହିବ ନାହିଁ।
ଯବାନମାନେ ଏହାକୁ ଇଣ୍ଟରନେଟ କିମ୍ବା ରିମୋଟରୁ ମାନୁଆଲ ମୋଡରେ ଚଳାଇବାକୁ ସମର୍ଥ ହେବେ। ଏହି ବନ୍ଧୁକ ସୋଲାର ପ୍ୟାନେଲରୁ ଚାର୍ଜ ହୋଇଥାଏ। ଅନେକ ମାସ ପର୍ଯ୍ୟନ୍ତ ଖରା ନ ଥିଲେ ମଧ୍ୟ ଏହା କାମ କରିପାରେ। ଏହା ସାହାଯ୍ୟରେ ଆତଙ୍କବାଦୀଙ୍କ ସହ ଲଢ଼େଇରେ ଯବାନଙ୍କ ଜୀବନ ପ୍ରତି ଆଉ ବିପଦ ରହିବ ନାହିଁ।
ଦୂରରୁ ଇଣ୍ଟରନେଟ ସାହାଯ୍ୟରେ ଯବାନମାନେ ଆତଙ୍କବାଦୀଙ୍କ ଉପରକୁ ଗୁଳି ଚଳାଇ ପାରିବେ ଏବଂ ଶତ୍ରୁଙ୍କ ଦୃଷ୍ଟିରେ ନ ଆସି ନିଜକୁ ସୁରକ୍ଷିତ ରଖି ପାରିବେ। ଏହି ଗନ୍ର ତିନୋଟି ଅଂଶ ରହିଛି। ଓ୍ବେରଲେସ୍ ଟେକ୍ନୋଲୋଜି ସହାୟତାରେ ତିନି ଅଂଶ ମଧ୍ୟରେ ଯୋଗାଯୋଗ ସ୍ଥାପିତ ହୋଇପାରିଥାଏ।
କେହି ସୀମା ଅତିକ୍ରମ କରିବାକୁ ଚେଷ୍ଟା କଲେ ଏହା ସେନସର ଦ୍ୱାରା ସୋଲାର ଗନ୍କୁ ଏକ ଆଲର୍ଟ ପଠାଇଥାଏ। ଯାହା ସେହି ସୀମା ଅଞ୍ଚଳରେ ସ୍ଥାପିତ ମେସିନ ବନ୍ଧୁକକୁ ସକ୍ରିୟ କରିଥାଏ ଏବଂ ଟାର୍ଗେଟରେ ଗୁଳି ଚଳାଇବା ଆରମ୍ଭ କରିଥାଏ ବୋଲି ଶ୍ୟାମ କହିଛନ୍ତି। ଏହି ମାନବବିହୀନ ମେସିନ ବନ୍ଧୁକ ସୀମା ଅଞ୍ଚଳରେ କୌଣସି ପ୍ରାଣୀ କିମ୍ବା ନିର୍ଦ୍ଦୋଷର ଜୀବନକୁ କ୍ଷତି ପହଞ୍ଚାଇବ ନାହିଁ। ବନ୍ଧୁକ ଗୁଳି ଚଳାଇବା ପୂର୍ବରୁ ଟାର୍ଗେଟର ଫଟୋକୁ କଣ୍ଟ୍ରୋଲ ରୁମକୁ ପଠାଇବ ଯାହା ଦ୍ୱାରା କୌଣସି ନିରୀହ ଜୀବନ ନଷ୍ଟ ହେବ ନାହିଁ। ଏହି ଯନ୍ତ୍ରପାତି ସାହାଯ୍ୟରେ ଆମର ଯବାନମାନେ ଶତ୍ରୁ ଦୃଷ୍ଟିରେ ନ ଆସି ସେମାନଙ୍କ ଉପରେ ଆକ୍ରମଣ କରି ପାରିବେ।
ଏହା ୩୬୦ ଡିଗ୍ରୀରେ ଘୂର୍ଣ୍ଣନ କରି ଶତ୍ରୁମାନଙ୍କୁ ଟାର୍ଗେଟ କରିବାକୁ ସକ୍ଷମ ହେବ। ଏହାର ଓଜନ ୪୦ କିଲୋଗ୍ରାମ। ଏଥିରେ ଲଙ୍ଗ ରେଞ୍ଜ ମୋସନ ସେନ୍ସର କ୍ୟାମେରା, ସେନ୍ସର ଟ୍ରିଗର, ଧାତୁ ପାଇପ, ଟ୍ରାନ୍ସମିଟର ରିସିଭର୍, ନାଇଟ ଭିଜନ ସେନ୍ସର, ୧୨ ଭୋଲ୍ଟ ସୋଲାର ପ୍ଲେଟ, ଜିଏସଏମ ଆଲାର୍ମ, ୬ ଭୋଲ୍ଟ ବ୍ୟାଟେରୀ ବ୍ୟବହାର କରାଯାଇଛି।
ଏମ୍ଆଇଇଟିର ଉପାଧ୍ୟକ୍ଷ ପୁନିତ ଅଗ୍ରୱାଲ କହିଛନ୍ତି ଯେ,କଲେଜର ଅଟଳ କମ୍ୟୁନିଟି ଇନୋଭେସନ ସେଣ୍ଟରରେ ଏକ ଆଇଡିଆ ଇନୋଭେସନ ରିସର୍ଚ୍ଚ ଲ୍ୟାବ ଅଛି। ସେଠାରେ ଛାତ୍ରମାନେ ବିଭିନ୍ନ ପ୍ରକାରର ସମସ୍ୟାକୁ ନେଇ ଉଦ୍ଭାବନ ଜାରି ରଖିଛନ୍ତି। ଏହି ସୋଲାର ଗନ୍ ଆଗାମୀ ସମୟରେ ସେନା ପାଇଁ ବେଶ୍ ଉପଯୋଗୀ ସାବ୍ୟସ୍ତ ହେବ ବୋଲି ସେ ପ୍ରକାଶ କରିଛନ୍ତି।