କୋକସରା, ୨୭।୧୧ (ଡି.ଏନ.ଏ.) – କଳାହାଣ୍ଡି ଜିଲା କୋକସରା ବ୍ଲକ ରେଙ୍ଗାଳପାଲି ପଞ୍ଚାୟତ ପାଣିଗାଁ ଶବରପଡାରେ ଥିବା ସୋଲାର ପାନୀୟ ଜଳ ଯୋଗାଣ ପ୍ରକଳ୍ପ ଆଜକୁ ୧ ବର୍ଷରୁ ଅଧିକ ହେବ ଅଚଳ ହୋଇ ପଡିଛି। ଫଳରେ ଗାଁର ପ୍ରାୟ ୨୦ରୁ ୩୦ ପରିବାର ପାନୀୟ ଜଳ ପାଇଁ ହଇରାଣ ହେଉଥିବା ଅଭିଯୋଗ କରିଛନ୍ତି। ପାଣିଗାଁ ଶବରପଡା ଗାଁରେ ଗତ ଦେଢ଼ ବର୍ଷ ତଳେ କୋକସରା ପାନୀୟ ଜଳ ଯୋଗାଣ ବିଭାଗ ଦ୍ୱାରା ସୋଲାର ପାନୀୟ ଜଳ ପ୍ରକଳ୍ପ କରାଯାଇ ଗାଁକୁ ଜଳ ଯୋଗାଣ କରାଯାଉଥିଲା। କିଛି ମାସ ଚାଲିବା ପରେ ଏହା ଅଚଳ ହୋଇ ପଡିଛି । ସେହିଦିନଠୁ ଆଉ ମରାମତି କରାଯାଇ ନାହିଁ। ଗ୍ରାମବାସୀ ଅନେକ ଥର ପଞ୍ଚାୟତ କର୍ତ୍ତୃପକ୍ଷଙ୍କୁ ଅଭିଯୋଗ କରିଥିଲେ ବି କୌଣସି ସୁଫଳ ମିଳିନାହିଁ। ଏ ନେଇ ରେଙ୍ଗାଳପାଲି ସରପଞ୍ଚ ବିନୋଦ ପାଣିଗ୍ରାହୀଙ୍କୁ ପଚାରିବାରୁ ଏହା ଆମ ପଞ୍ଚାୟତକୁ ହସ୍ତାନ୍ତର ହୋଇନାହିଁ। ବ୍ଲକ ଆରଡବ୍ଲ୍ୟୁଏସଏସ କନିଷ୍ଠ ଯନ୍ତ୍ରୀଙ୍କୁ କହି ମରାମତି କରିବୁ ବୋଲି କହିଛନ୍ତି। ଏହା ମରାମତି ହେବ ଓ ଶବରପଡା ଗ୍ରାମବାସୀ ପାନୀୟ ଜଳ ପାଇବେ ତାହା ଦେଖିବାକୁ ବାକି ରହିଲା ।
