ନୂଆଗାଁ,୧୩।୮ (ଡି.ଏନ.ଏ.) ନୟାଗଡ଼ ଜିଲା ନୂଆଗାଁ ବ୍ଲକ ବାଲଣ୍ଡାଠାରୁ ବରକୋଳାକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ସଡ଼କ ଯୋଜନାରେ ନିର୍ମାଣଧୀନ ପୋଲ ପାର୍ଶ୍ୱରୁ ମାଟି ଧୋଇ ହୋଇଯାଇଛି । ଏହାପରେ ଉକ୍ତ ରାସ୍ତାରେ ଯାନବାହନ ଯାତାୟତ ଏକ ପ୍ରକାର ବନ୍ଦ ହୋଇଯାଇଛି। କାଳେ କୌଣସି ଦୁର୍ଘଟଣା ଘଟିବ ସେହି ଆଶଙ୍କାରେ ଉକ୍ତ ପୋଲ ଦେଇ ଯାନବାହନ ଚଳାଚଳ ବନ୍ଦ ହୋଇଛି।
ନୂଆଗାଁ ବ୍ଲକ ଗୁମି ପଞ୍ଚାୟତ ଜାମୁସାହି, କେସେଣ୍ଡା ଗ୍ରାମରୁ ଗୁମି ମୁଖ୍ୟରାସ୍ତାକୁ ଯିବାରେ ବାଧକ ସାଜୁଥିଲା ଡାହୁକା ନଦୀ। ସେଥିରେ ପୋଲ ହୋଇ ନ ଥିବାରୁ ଲୋକମାନେ ନାହିଁ ନ ଥିବା ଅସୁବିଧା ଭୋଗୁଥିଲେ । ଏ ନେଇ ବାରମ୍ବାର ଅଭିଯୋଗ, ଏପରି କି ଭୋଟ ବର୍ଜନ ନିଷ୍ପତ୍ତି ଗ୍ରାମବାସୀ ନେବା ପରେ ସରକାରଙ୍କ ନଜର ପଡିଥିଲା । ପାରାଢିପି ପଞ୍ଚାୟତର ବାଲଣ୍ଡାଠାରୁ ଜାମୁସାହି, କେସେଣ୍ଡା, ଗୁମି ଦେଇ ବରକୋଳା ପର୍ଯ୍ୟନ୍ତ ପ୍ରଧାନମନ୍ତ୍ରୀ ସଡ଼କ ଯୋଜନାରେ ରାସ୍ତା ନିର୍ମାଣ କରିବା ପାଇଁ ସରକାର ଅନୁଦାନ ମଞ୍ଜୁର କଲେ। ୧୨.୭୦୦ କିଲୋମିଟର ମଧ୍ୟରୁ ୧୧.୪୫୦ କିଲୋମିଟର ପିଚୁ ହେବା ସହ ୧୧ଟି ପୋଲ ନିର୍ମାଣ ପାଇଁ ୬୪୫.୨୫ ଲକ୍ଷ ଟଙ୍କା ମଞ୍ଜୁର କରାଯାଇଛି । ଉକ୍ତ କାର୍ଯ୍ୟ ଅଗଷ୍ଟ ୨୦୧୯ରେ ଆରମ୍ଭ ହେବା ନେଇ ସୂଚନା ଫଳରେ ତଥ୍ୟ ରହିଥିବା ବେଳେ କାର୍ଯ୍ୟ ଶେଷ ହେବାର ଅବଧିର କୌଣସି ସୂଚନା ଦିଆଯାଇ ନାହିଁ । ବର୍ତ୍ତମାନ ରାସ୍ତା କାମ ଅଧାପନ୍ତରିଆ ଭାବେ ପଡ଼ି ରହିଥିବା ବେଳେ ଅତ୍ୟାବଶ୍ୟକ ଥିବା ଡାହୁକା ନଦୀରେ ପୋଲର ଛାତ ପଡିଯାଇଛି । ଫଳରେ ଲୋକମାନେ ଯିବା ଆସିବା କରିବା ସହ ଯାନବାହନ ଯାତାୟତ କରୁଥିଲା । କିନ୍ତୁ ଲଗାଣ ବର୍ଷା ହେବା ଫଳରେ ପୋଲ ପାର୍ଶ୍ୱରେ ରାସ୍ତାକୁ ସଂଯୋଗ ପାଇଁ ଦିଆ ଯାଇଥିବା ମାଟି ଧୋଇ ହୋଇ ଯାଇଛି । ଫଳରେ ଉକ୍ତ ସ୍ଥାନଟି ଏକ ପ୍ରକାର ବିପଦ ସଙ୍କୁଳ ଅବସ୍ଥାରେ ରହିଥିବା ବେଳେ ଯାନବାହନ ଯାତାୟତ ସମ୍ପୂର୍ଣ୍ଣ ବନ୍ଦ ହୋଇ ଯାଇଛି । ଲୋକମାନେ ଚାଲିକି ଯିବା ସମୟରେ ମାଟି ଧସି ଯିବାର ଆଶଙ୍କା ସୃଷ୍ଟି ହେଉଛି । ତେବେ ଠିକାଦାର ଯଦି ତାହାକୁ ମରାମତି ନ କରନ୍ତି ତା’ହେଲେ ଅଧିକ ବର୍ଷା ହେଲେ ସେହି ରାସ୍ତାରେ ଯାତାୟତ ସମ୍ପୂର୍ଣ୍ଣ ବନ୍ଦ ହୋଇଯିବ ବୋଲି ସ୍ଥାନୀୟ ଗ୍ରାମବାସୀ କହିଛନ୍ତି ା ପୋଲ ନିକଟରେ ଧୋଇଯାଇଥିବା ମାଟିର ମରାମତି ବାବଦରେ ଗ୍ରାମ ଉନ୍ନୟନ ବିଭାଗ କନିଷ୍ଠ ଯନ୍ତ୍ରୀ ଶ୍ରୀକାନ୍ତ ସାହୁଙ୍କୁ ପଚାରିବାରେ ଏ ବିଷୟରେ ନିର୍ବାହୀ ଯନ୍ତ୍ରୀଙ୍କ ସମେତ ଅନ୍ୟମାନେ ଅବଗତ ଅଛନ୍ତି । ବର୍ଷା ଛାଡିବା ପରେ ଯଥାଶୀଘ୍ର ସେଠାରେ ଏକ କାନ୍ଥ ନିର୍ମାଣ କରିବା ସହ ମାଟି ଖସିଥିବା ସ୍ଥାନର ମରାମତି କାମ ଆରମ୍ଭ କରାଯିବ। ଏଥିପାଇଁ ପାଇଁ ଠିକାଦାରକୁ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି।
