ଅତାବିରା,୯ା୬(ଯୁଧିଷ୍ଠିର ମହାପାତ୍ର):ଗତ କିଛିଦିନ ହେଲା ଅତାବିରାରେ ଗ୍ରୀଷ୍ମ ଉତ୍ତାପରୁ ରାଜନୈତିକ ପାଗ ଉଷ୍ମତା ବଢିଯାଇଛି। ବାକ୍ଯୁଦ୍ଧ ସାଙ୍ଗକୁ ସୋସିଆଲ ମିଡିଆରେ ଚାଲିଛି ଘମାଘୋଟ ଶୀତଳ ଯୁଦ୍ଧ। ପଞ୍ଚାୟତ ନିର୍ବାଚନ ପୂର୍ବରୁ ଭାଜପା ଓ ବିଜେଡି ମଧ୍ୟରେ ଚାଲିଛି ସୋସିଆଲ ୱାର, ଯାହାକୁ ନେଇ ଏବେ ମାମଲା ଥାନାକୁ ପହଞ୍ଚତ୍ଛି l
ଅତାବିରା ବିଧାୟକ ନୀହାର ରଞ୍ଜନ ମହାନନ୍ଦଙ୍କୁ ବଦ୍ନାମ କରିବା ପାଇଁ ସୋସିଆଲ ମିଡିଆରେ ବିଭିନ୍ନ ଅପପ୍ରଚାର କରାଯାଉଛି। ଏ ନେଇ ଅତାବିରା ଭାଜପାର କର୍ମକର୍ତ୍ତା ସ୍ଥାନୀୟ ଥାନାରେ ଏତଲା ଦେଇଛନ୍ତି। ଅତାବିରା ନିର୍ବାଚନମଣ୍ଡଳୀର ବିଧାୟକ ନୀହାର ମହାନନ୍ଦଙ୍କ ନାଁରେ କିଛି ଅସାମାଜିକ ବ୍ୟକ୍ତି ମିଥ୍ୟା ଫଟୋ ଓ ବିଭ୍ରାନ୍ତିକର ତଥ୍ୟ ସୋସିଆଲ ମିଡିଆରେ ପୋଷ୍ଟ କରୁଥିବା ନେଇ ଥାନାରେ ଅଭିଯୋଗ ହୋଇଛି। ଏହି ଘଟଣାକୁ ନିନ୍ଦା କରିବା ସହ ଏଭଳି ଅପପ୍ରଚାର କରୁଥିବା ବ୍ୟକ୍ତିଙ୍କ ଉପରେ କାର୍ଯ୍ୟାନୁଷ୍ଠାନ ନେବାକୁ ଥାନାଧିକାରୀଙ୍କୁ ଜଣାଇଛି ସ୍ଥାନୀୟ ଯୁବ ମୋର୍ଚ୍ଚା। ଅତାବିରା ବ୍ଲକ ସଭାପତି ଜି. ସତୀଶ ଚୌଧୁରୀଙ୍କ ନେତୃତ୍ୱରେ ଭାଜପାର ଯୁବ ମୋର୍ଚ୍ଚା ଟିମ୍ ଥାନାରେ ପହଞ୍ଚତ୍ ଏଭଳି ଅଭିଯୋଗ କରିଛନ୍ତି। ଦୁଇବର୍ଷ ହେବ ଅତାବିରା ନିର୍ବାଚନମଣ୍ଡଳୀରେ ବିଭିନ୍ନ ବିକାଶମୂଳକ କାର୍ଯ୍ୟ ଜୋରସୋରରେ ଚାଲିଛି, ଯାହାକୁ ନେଇ ବିରୋଧୀ ଓ କିଛି କୁଚକ୍ରୀ ଗୋଷ୍ଠୀ ସହି ପାରୁନାହାନ୍ତି ବୋଲି ଅଭିଯୋଗ ପତ୍ରରେ ଦର୍ଶାଯାଇଛି। ଅଭିଯୋଗ ପତ୍ର ଦେବା ସମୟରେ ବରଗଡ଼ ଜିଲା ଭାଜପା ଜିଲା ସମ୍ପାଦିକା ପ୍ରିୟଦର୍ଶିନୀ ଅର୍ଚ୍ଚନା ବାଗ, ମଣ୍ଡଳ ସଭାପତି ପୁଷ୍ପକ ଗାଏଗରିଆଙ୍କ ସମେତ ବହୁ ଯୁବ କର୍ମକର୍ତ୍ତା ଉପସ୍ଥିତ ଥିଲେ l ଅନ୍ୟପଟେ ଏହି ଘଟଣାକୁ ନେଇ ପୋଲିସର କୌଣସି ପ୍ରତିକ୍ରିୟା ମିଳିପାରିନାହିଁ।