ଗଞ୍ଜାମ,୬।୩ (ବିଦ୍ୟାଧର ସାହୁ ): ଗଞ୍ଜାମ ବ୍ଲକ ଅଞ୍ଚଳରେ ପ୍ରଥମଥର ପାଇଁ ସାମାଜିକ ଅପେରା ନାଟକ ଟୁର୍ନାମେଣ୍ଟର ଆୟୋଜନ ହେବାକୁ ଯାଉଛି । ଏଥିପାଇଁ ଝାରେଡି ରାଧାଗୋବିନ୍ଦପୁର ପଞ୍ଚାୟତ କଣ୍ଟାପଡାସ୍ଥିତ ମଠ ମକୁନ୍ଦପୁର ଗ୍ରାମଠାରେ ଥିବା ଜଗନ୍ନାଥ ମନ୍ଦିର ପ୍ରାଙ୍ଗଣରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ମା’ କନକ ଦୁର୍ଗା ନାଟ୍ୟ ସଂସଦ ପରିଚାଳକ ତଥା ବଣିକ ସଙ୍ଘ ସଭାପତି ଗୌରୀ ଶଙ୍କର ବାରିକିଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରସ୍ତୁତି ବୈଠକରେ ବରିଷ୍ଠ ନାଟ୍ୟ ନିର୍ଦେଶକ ନିରଞ୍ଜନ ମୁଦୁଲି,ଯୋଗେନ୍ଦ୍ର ସେଠି, କଳା ସଂସ୍କୃତିକ ମଞ୍ଚ ସଭାପତି ଶବର କୁମାର ତରାଇ, ମଞ୍ଚ ଉପସ୍ଥାପକ ସୁଧୀର କୁମାର ସାହୁ, ବରିଷ୍ଠ କଳାକାର ସମ୍ପଦ ନାହାକ, ଚର୍ଚ୍ଚିତ ଖଳନାୟକ ପ୍ରଦୀପ କୁମାର ପଣ୍ଡା, ସଂଯୋଜକ ସମର ରଞ୍ଜନ ସ୍ବାଇଁ ପ୍ରମୁଖ ଉପସ୍ଥିତ ଥିଲେ। ନିର୍ଦ୍ଦେଶକ ସ୍ବର୍ଗତ ପଙ୍କଜ କୁମାର ବାରିକିଙ୍କ ପାଇଁ ଶୋକ ବ୍ୟକ୍ତ କରାଯାଇଥିଲା । ପ୍ରଥମଥର ପାଇଁ ସ୍ଥାନୀୟ ଅଞ୍ଚଳରେ ଏହିଭଳି ନାଟକ ପ୍ରତିଯୋଗିତା ଅନୁଷ୍ଠିତ ହେଉଥିବାରୁ ସମସ୍ତ କଳା ପ୍ରେମୀଙ୍କ ମଧ୍ୟରେ ପ୍ରବଳ ଉତ୍ସହ ଦେଖିବାକୁ ମିଳିଛି। ଆସନ୍ତା ରଜ ଉତ୍ସବରେ ଟୁର୍ନାମେଣ୍ଟ କରାଯିବା ନେଇ ଆଲୋଚନା ହେବା ସହ ଏଥିପାଇଁ ଏକ ୧୧ ଜଣିଆ କମିଟି ଗଠନ କରାଯାଇଛି। କମିଟି ସଭାପତି ଭାବେ ଗୌରୀ ଶଙ୍କର ବାରିକି, ସମ୍ପାଦକ ଚିତ୍ତ ରଞ୍ଜନ ନାହାକ, ଶବର ତରାଇ, କୋଷାଧ୍ୟକ୍ଷ ସନ୍ତୋଷ କୁମାର ନାହାକ, ଦିଲ୍ଲୀପ କୁମାର ଛୋଟରାଏ, ସଦସ୍ୟ କାଁହୁ ଚରଣ ନାହାକ, ସୁଧୀର, ସଦାନନ୍ଦ, ସମ୍ପଦ, ଅକ୍ଷୟ ପ୍ରମୁଖଙ୍କୁ ସର୍ବ ସଂମତି କ୍ରମେ ଦାୟିତ୍ୱ ବହନ କରିଥିଲେ। ପ୍ରଶାସନର ବିଭିନ୍ନ ନିୟମାବଳୀ ମାନିବା ସହ ଆଗାମୀ ବୈଠକରେ ଅନୁଷ୍ଠାନର ନିୟମାବଳୀ ପ୍ରସ୍ତୁତ କରାଯିବ ବୋଲି ମତ ପ୍ରକାଶ ପାଇଥିଲା । ଏହି ଟୁର୍ନାମେଣ୍ଟରେ ଗୋଟିଏ ମଞ୍ଚରେ ପାଞ୍ଚଟି ନାଟ୍ୟ ସାଂସଦ ଭାଗ ନେଇ ନାଟକ ପରିବେଷଣ କରିବେ । ବିଚାରକମାନଙ୍କ ଦ୍ୱାରା ବିବେଚିତ ଦୁଇଟି ନାଟକକୁ ପ୍ରଥମ ଓ ଦ୍ୱିତୀୟ ଶ୍ରେଷ୍ଠ ନାଟକ ଘୋଷିତ କରାଯିବ ଏବଂ ପ୍ରଥମ ହୋଇଥିବା ନାଟକ ପରିଚାଳକଙ୍କୁ ଟ୍ରଫି ସହ ପଚାଶ ହଜାର ଓ ଦ୍ୱିତୀୟଙ୍କୁ ତିରିଶ ହଜାର ଟଙ୍କା ଓ ଟ୍ରଫି ପ୍ରଦାନ କରାଯିବ ବୋଲି ଆଲୋଚନା ହୋଇଛି। ଅନ୍ୟମାନଙ୍କ ମଧ୍ୟରେ ଲକ୍ଷ୍ମଣ ସାହୁ,ଦୀପକ କୁମାର ବେହେରା, କୁନା ନାହାକ, ସତ୍ୟ ନନ୍ଦ ନାହାକ,ଶିଶିର କୁମାର ନାହାକ ପ୍ରମୁଖ ଉପସ୍ଥିତ ଥିଲେ ।
