ଯାଜପୁର ଅଫିସ,୨୯ା୭: ରାଜ୍ୟରେ ଆପରାଧିକ ମାମଲା ବୃଦ୍ଧି ପାଇବା ସାଧାରଣରେ ଚିନ୍ତାର କାରଣ ହୋଇଛି। ସରକାରଙ୍କ ପକ୍ଷରୁ ଜାରି ଶ୍ୱେତପତ୍ରରୁ ଜଣାପଡିଛି ଯେ, ଗତ ବର୍ଷଠାରୁ ଚଳିତବର୍ଷ ଅପରାଧ ଦେଢ଼ଗୁଣ ବଢ଼ିଛି। ବିଶେଷକରି ୩,୩୧୭ ବଳାତ୍କାର, ୪,୦୯୫ ମହିଳା ନିର୍ଯାତନା, ୫,୧୩୮ ପ୍ରତାରଣା, ୯୩ ମାନବ ଚାଲାଣ ଭଳି ସାମାଜିକ ଅପରାଧ ଘଟିଛି। ଦାମ୍ପତ୍ୟ ସମ୍ପର୍କରେ ବିବାଦ ନେଇ ସାରା ଦେଶରେ ଏବଂ ରାଜ୍ୟରେ ନାହିଁ ନ ଥିବା ଆଲୋଡ଼ନ ସୃଷ୍ଟି ହୋଇଛି।
ସରକାରୀ ତଥ୍ୟ ଅନୁଯାୟୀ, ୨୦୨୧ରେ ମୋଟ ୧,୫୫,୪୨୦ ଧର୍ତ୍ତବ୍ୟ ଅପରାଧ ମାମଲା ରୁଜୁ ହୋଇଛି। ବେସରକାରୀ ଭାବେ ହିସାବ କଲେ ଉଲ୍ଲେଖ ସଂଖ୍ୟାଠାରୁ ୩ ଗୁଣା ଅପରାଧ ଘଟିଥିବ ବୋଲି ମତ ପ୍ରକାଶ ପାଇଛି। ଏହି କାରଣରୁ ଚାରି ଆଡ଼େ ଭୟ, ଆଶଙ୍କା ଓ ଅସନ୍ତୋଷ ବଢ଼ି ଚାଲିଛି। ସେଥିପାଇଁ ଅଖିଳଚକ୍ର ଓଡ଼ିଶା ପକ୍ଷରୁ ଏହାର ନିରାକରଣ ନିମନ୍ତେ ମତାମତ ସଂଗ୍ରହ କରାଯାଇଥିଲା। ଏଥିରେ ପଣ୍ଡିତ ମହେଶ୍ୱର ନନ୍ଦ କହିଛନ୍ତି, ଅତୀତରେ ହିନ୍ଦୁଶାସ୍ତ୍ରରେ ଥିବା ସାମ-ଦାନ-ଦଣ୍ଡ-ଭେଦ ପ୍ରଥା ଉଠିଯିବା ଫଳରେ ସମାଜରେ ବିଲକ୍ଷଣ ବୃଦ୍ଧି ପାଉଛି। ଏମାନଙ୍କ ବ୍ୟତୀତ ଶିକ୍ଷାବିତ୍ ଗୋପୀନାଥ ଦାଶ, ଶିକ୍ଷୟିତ୍ରୀ ମିତା ଦାଶ, ଲେଖିକା ସୁଜାତା ପତି, ସାମାଜିକ କର୍ମୀ ମମତା ନାୟକ, ସୁପ୍ରିୟା ମହାପାତ୍ର, ନିର୍ମଳା ମିଶ୍ର, ବିଭୂତି ରଞ୍ଜନ ସାହୁ ପ୍ରମୁଖ ଅଂଶ ଗ୍ରହଣ କରି ପାଶ୍ଚାତ୍ୟ ସଂସ୍କୃତି ପରିହାର, ସଂକୀର୍ଣ୍ଣ ସ୍ବାର୍ଥର ଊର୍ଦ୍ଧ୍ୱରେ ରହିବା, ନିଶା ନିବାରଣ, ଘୃଣ୍ୟ ପରକୀୟା ପ୍ରୀତି ବିଲୋପ, ଅଶ୍ଳୀଳତା ଦୂରୀକରଣ, ନାରୀ ନିର୍ଯାତନା, ଅଧିକ ବସ୍ତୁବାଦୀ ନ ହେବା ଉପରେ ଗୁରୁତ୍ୱ ଦେଇଥିଲେ। ନିରାକରଣ ପାଇଁ ଆଇନ, ସଚେତନତା, ନୈତିକ ଶିକ୍ଷାର ପ୍ରସାର ନିମନ୍ତେ ପ୍ରସ୍ତାବ ଆଗତ କରିଥିଲେ। ଅନୁଷ୍ଠାନର ସମ୍ପାଦକ ହରେକୃଷ୍ଣ ପଣ୍ଡା ସୂଚନା ପ୍ରଦାନ କରି କହିଲେ, ସମାଜରେ ବ୍ୟଭିଚାର ବୃଦ୍ଧି ପାଇବା ଯୋଗୁ ଗରିବରୁ ଧନୀ ପର୍ଯ୍ୟନ୍ତ ସମସ୍ତେ ଅନ୍ଧକାର ମଧ୍ୟରେ ପଡିଛନ୍ତି। ଏଥିପାଇଁ ଶାସନ ବା ରାଜନୈତିକ ପ୍ରୋତ୍ସାହନ ସମ୍ପୂର୍ଣ୍ଣ ରୂପେ ବନ୍ଦ କରାଯିବା ଆବଶ୍ୟକ। କେବଳ ରାଜନୈତିକ ବ୍ୟକ୍ତିମାନେ ଏହାକୁ ନିୟନ୍ତ୍ରଣ କରିପାରିବେ ବୋଲି ସେ ମତବ୍ୟକ୍ତ କରିଥିଲେ। ଅପରାଧମୁକ୍ତ ସମାଜ ଗଠନ ନିମନ୍ତେ ସମସ୍ତେ ସଂକଳ୍ପ ନେବା ଆବଶ୍ୟକ। ସରକାର ମଧ୍ୟ ଏଥିପାଇଁ ଆଇନ ତିଆରି କରିବା ଆବଶ୍ୟକ ବୋଲି କହିଛନ୍ତି।
