ବର୍ତ୍ତମାନ ଅନେକ ଯୁବତୀ ଯୁବକଙ୍କ ପାଇଁ ସିଗାରେଟ୍ ଟାଣିବା କିମ୍ବା ତମାଖୁ ସେବନ କରିବା ଯେମିତି ଏକ ଫ୍ୟାଶନ୍ ହୋଇଗଲାଣି। ହେଲେ ଆପଣ ଜାଣିନ୍ତି କି, ଧୂମପାନ ଏବଂ ତମାଖୁସେବନ ଭଳି ବଦଭ୍ୟାସ ଧୀରେ ଧୀରେ ଶରୀରର ପ୍ରତ୍ୟେକ ଅଙ୍ଗପ୍ରତ୍ୟଙ୍ଗକୁ ନଷ୍ଟ କରିଦେବା ସହ ବିଭିନ୍ନ ରୋଗ ସୃଷ୍ଟି କରିଥାଏ। ତେଣୁ ସୁସ୍ଥ ରହିବା ଲାଗି ଏଥିରୁ ଦୂରେଇ ରହିବା ଆବଶ୍ୟକ…
ସିଗାରେଟ୍ରେ ହାରାହାରି ୪୦୦୦ ପ୍ରକାରର ରାସାୟନିକ ପଦାର୍ଥ ବା’ କେମିକାଲ୍ସ ଥାଏ। ଯାହା ମଧ୍ୟରୁ ନିକୋଟିନ୍ ସ୍ବାସ୍ଥ୍ୟ ପ୍ରତି ଖୁବ୍ ହାନିକାରକ। ଏହା ବ୍ୟତୀତ ବହୁ ପ୍ରକାରର କ୍ୟାନ୍ସର୍ ରୋଗ ସୃଷ୍ଟି କରୁଥିବା କାର୍ସିନୋଜେନ୍ସ ଏବଂ ଅନ୍ୟ ବିଷାକ୍ତ ପଦାର୍ଥ ଥାଏ।
ଧୂଆଁରେ ଥିବା କାର୍ବନ୍ ମନୋକ୍ସାଇଡ, ସିଲିଟକ୍ସିନ୍ସ ଏବଂ ଅନ୍ୟ କେମିକାଲଗୁଡ଼ିକ ଶ୍ୱାସକ୍ରିୟାରେ ବ୍ୟାଘାତ ସୃଷ୍ଟି କରିଥା’ନ୍ତି। ସିଗାରେଟ୍ରେ ଥିବା ଧୂଆଁ ମଣିଷର ମୁଖ ଓ ଶ୍ୱାସନଳୀ ଦେଇ ଯାଇ ଫୁସ୍ଫୁସ୍ ମାଧ୍ୟମରେ ରକ୍ତରେ ମିଶିଥାଏ ଏବଂ ଦେହର ବିଭିନ୍ନ ପ୍ରକାର ରୋଗ ଯଥା ହୃଦ୍ରୋଗ, ଫୁସ୍ଫୁସ୍ ରୋଗ ଏବଂ ଫୁସ୍ଫୁସ୍ କ୍ୟାନ୍ସର୍ ଆଦି ସୃଷ୍ଟି କରିଥାଏ।
ଏହାଛଡ଼ା ସ୍ବରଯନ୍ତ୍ର, ଖାଦ୍ୟନଳୀ, ପାଟି, ପାକସ୍ଥଳୀ, ଅଗ୍ନ୍ୟାଶୟ, ଅନ୍ତନଳୀ, ମଳଦ୍ୱାର, ଯକୃତ, ପରିସ୍ରାଗାର, ବୃକ୍କ, ଜରାୟୁଗ୍ରୀବା ଏବଂ ସ୍ତନକର୍କଟ ରୋଗ ମଧ୍ୟ ହୋଇଥାଏ।
ତମାଖୁ, ଦୋକ୍ତା ଓ କଡ଼ାପାନ ଖାଇଲେ ଏବଂ ତା’ର ରସ ପିଇଲେ, ପାଟିରେ ଥିବା ଶୈଷ୍ମିକ ଝିଲ୍ଲୀ ଦେଇ ରସ ଶୋଷି ହୋଇଯାଏ। ଏଥିରେ ପାଟି ଭିତରେ କ୍ଷତ ସୃଷ୍ଟିହୁଏ ଏବଂ କ୍ରମେ ପାଟିରେ କ୍ୟାନ୍ସର୍ ରୋଗ ସୃଷ୍ଟି ହୋଇଥାଏ। ଧୂମପାନ ଦ୍ୱାରା ରକ୍ତରେ ଟକ୍ସିନ ବା ବିଷ ମିଶି ଧମନୀ ଭିତର ପାର୍ଶ୍ୱରେ ଚର୍ବି ସୃଷ୍ଟି ହୋଇ ଧମନୀକୁ ଅଣଓସାରିଆ କରିଦିଏ। ଯୁବାବୟସରେ ଅନେକଙ୍କର ରକ୍ତଚାପ ବୃଦ୍ଧି ସହ ହୃଦ୍ରୋଗ, କରୋନାରୀ ଧମନୀ ଜନିତ ରୋଗ ଏବଂ ହଠାତ୍ ମୃତ୍ୟୁ ହୋଇଥାଏ (ସଡନ୍ ଡେଥ୍ ସିଣ୍ଡ୍ରୋମ୍)।
ଯୁବତୀମାନଙ୍କର ମଧ୍ୟ ଶ୍ୱାସ ଓ ଫୁସ୍ଫୁସ୍ ସଂକ୍ରମଣ ସହ ଅନିୟମିତ ଋତୁସ୍ରାବ ଏବଂ ବନ୍ଧ୍ୟାଦୋଷ ଆଦି ଦେଖାଦେଇଥାଏ।
ଯୁବାବସ୍ଥାରେ ଧୂମପାନ କଲେ ପୁରୁଷମାନଙ୍କର ମଧ୍ୟ ବନ୍ଧ୍ୟାଦୋଷ ହୋଇଥାଏ।
ତେବେ ଧୂମପାନ କରୁଥିବା ବ୍ୟକ୍ତିଙ୍କ ଯୋଗୁ ଆଖପାଖରେ ଥିବା ଅନ୍ୟମାନେ ମଧ୍ୟ ପ୍ରଭାବିତ ହୋଇଥା’ନ୍ତି ଅର୍ଥାତ୍ ସେମାନେ ନିଷ୍କ୍ରିୟ ଧୂମପାନର ଶିକାର ହୋଇ ଶ୍ୱାସରୋଗ ଓ ଫୁସ୍ଫୁସ୍ ସଂକ୍ରମଣ ଭୋଗିଥା’ନ୍ତି।
