ସୋନପୁର,୧୬।୯(ନି.ପ୍ର.): ସୁବର୍ଣ୍ଣପୁର ସହରରେ ଏବେ ବିଦେଶୀ, ଦେଶୀ ମଦ ଏବଂ କଫ୍ ସିରପ୍ କାରବାର ବୃଦ୍ଧି ପାଇଛି। ରାସ୍ତାପାର୍ଶ୍ୱରେ ଖୁଲମଖୁଲା ମଦ ବିକ୍ରି କରାଯାଉଛି। ଲୋକେ ସଙ୍କୋଚ ନ କରି ବେଆଇନଭାବେ ସର୍ବସାଧାରଣ ସ୍ଥାନରେ ନିଶା ସେବନ କରୁଛନ୍ତି। ମଦ୍ୟପଙ୍କ ଉତ୍ପାତ ବୃଦ୍ଧି ପାଇବାରେ ଲାଗିଛି। ପୋଲିସ ଓ ଅବକାରୀ ବିଭାଗ ସବୁ ଜାଣି ନୀରବଦ୍ରଷ୍ଟା ସାଜିଥିବା ଅଭିଯୋଗ ହେଉଛି ।
ସହରର ବ୍ଲକ ଛକ ସ୍ଥିତ ରୟାଲ ପଡିଆ, ମହାନଦୀର ଦଶମତି ଘାଟ, ରିଂରୋଡରେ ମଦ୍ୟପଙ୍କ ରାଜ୍ ଚାଲିଛି। ରିଂରୋଡ ଓ ଦଶମତି ଘାଟରେ ସବୁ ସମୟରେ ଏବଂ ରୟାଲ ପଡିଆରେ ସନ୍ଧ୍ୟା ପରେ ସେମାନଙ୍କ ଆସର ଜମୁଛି। ନଦୀକୁ ଗାଧୋଇବା ପାଇଁ ଯିବାକୁ ଲୋକେ ଭୟ କରୁଛନ୍ତି। ପଡିଆ, ରିଂ ରୋଡକୁ ସାନ୍ଧ୍ୟ ଭ୍ରମଣରେ ଯାଉଥିବା ମହିଳା, ପୁରୁଷ ଓ ବରିଷ୍ଠ ନାଗରିକ ନିଜକୁ ଅସୁରକ୍ଷିତ ମଣୁଛନ୍ତି। ଚାଖନା ସାଙ୍ଗକୁ ସବୁଠି ମଦ ବୋତଲ, କଫ୍ ସିରପ ବୋତଲ ଓ ଦେଶୀ ମଦ ପାଉଚ ଜରି ପଡିଥିବା ଦେଖିବାକୁ ମିଳୁଛି। ବୁଦ୍ଧିଜୀବୀ ଏ ସବୁକୁ ସୋସିଆଲ ମିଡିଆରେ ପୋଷ୍ଟ କରୁଥିଲେ ହେଁ ତାହା ପୋଲିସ ଓ ଅବକାରୀ ବିଭାଗର ଦୃଷ୍ଟିକୁ ଆସୁନି। ଏ ସମ୍ପର୍କରେ ବରିଷ୍ଠ ଆଇନଜୀବୀ ବଳଦେବ ପ୍ରସାଦ ବେଦ୍ବାକ କୁହନ୍ତି, ସନ୍ଧ୍ୟା ହେବା ମାତ୍ରେ ରୟାଲ ପଡିଆ ବାର୍ ପାଲଟି ଯାଉଛି। ଲୋକେ ପଡିଆକୁ ଯିବାକୁ ଭୟ କରୁଛନ୍ତି। କ୍ରୀଡାବିତ୍ମାନେ ସେଠାରେ କ୍ରୀଡା ଅଭ୍ୟାସ କରିବାରେ ଅସୁବିଧା ଭୋଗୁଛନ୍ତି। ପଡିଆରେ କାଚ ବୋତଲ ପଡି ରହୁଛି। ସେହିପରି ଦଶମତିଘାଟ ପାର୍ଶ୍ୱରେ ମଦ୍ୟପଙ୍କ ଆଡ୍ଡା ଜମୁ ଥିବାରୁ ମଝିପଡାର ମହିଳା ଓ ପୁରୁଷମାନେ ମହାନଦୀକୁ ଗାଧୋଇବାକୁ ଯାଇ ପାରୁନାହାନ୍ତି। ରିଂ ରୋଡରେ ବସି ନିଶାସକ୍ତମାନେ ମଦ୍ୟପାନ କରୁଥିବାରୁ ବଡବଜାର, ନୂଆପଡା ଓ ଭଗବତୀପ୍ଲଟ ଅଞ୍ଚଳର ଲୋକେ ସାନ୍ଧ୍ୟ ଭ୍ରମଣ କରିପାରୁ ନାହାନ୍ତି। ଜରୁରୀ ସହାୟତା ଯାନ ସହରରେ ପାଟ୍ରୋଲିଂ କରୁଥିବା ବେଳେ ତାହା ଏ ସବୁ ଅଞ୍ଚଳକୁ ଯାଉ ନ ଥିବା ସହରବାସୀ ଅଭିଯୋଗ କରିଛନ୍ତି। ଏସ୍ପି ଅମରେଶ କୁମାର ପଣ୍ଡାଙ୍କୁ ଏ ସମ୍ପର୍କରେ ପଚାରିବାରୁ ପୋଲିସ ପାଟ୍ରୋଲିଂକୁ କଡାକଡି କରାଯିବ ଓ ସୋନପୁର ଆଇଆଇସିଙ୍କୁ ଏସବୁ ବନ୍ଦ ପାଇଁ ନିର୍ଦ୍ଦେଶ ଦେବେ ବୋଲି କହିଥିଲେ।
