ନୂଆଦିଲ୍ଲୀ,୩୦।୩: ଅଷ୍ଟ୍ରେଲିଆର ପୂର୍ବତନ ଅଧିନାୟକ ଏବଂ କିମ୍ବଦନ୍ତୀ ବ୍ୟାଟ୍ସମ୍ୟାନ୍ ଷ୍ଟିଭ୍ ସ୍ମିଥ୍ ପୁଣିଥରେ ଦଳର ନେତୃତ୍ୱ ନେବାକୁ ଇଚ୍ଛା ପ୍ରକାଶ କରିଛନ୍ତି। ଦଳ ପାଇଁ ସେ ଶ୍ରେଷ୍ଠ ବୋଲି କ୍ରିକେଟ ଅଷ୍ଟ୍ରେଲିଆ ଭାବିଲେ ସେ ଖୁସି ହେବେ। ଏପରିକି ଦାୟିତ୍ୱ ନେବାକୁ ନିଶ୍ଚିତ ଭାବେ ସେ ଆଗ୍ରହ ପ୍ରକାଶ କରିବେ ବୋଲି କହିଛନ୍ତି।
୨୦୧୮ରେ ଦକ୍ଷିଣ ଆଫ୍ରିକା ବିପକ୍ଷରେ କେପ୍ ଟାଉନ୍ରେ ଖେଳାଯାଇଥିବା ତୃତୀୟ ଟେଷ୍ଟରେ ବଲ୍ ଟ୍ୟାମ୍ପରିଂ ବିବାଦରେ ଛନ୍ଦି ହୋଇଥିଲେ ସ୍ମିଥ୍। ଏହାକୁ ନେଇ ତାଙ୍କ ଖେଳିବା ଉପରେ ବର୍ଷକ ପର୍ଯ୍ୟନ୍ତ ପ୍ରତିବନ୍ଧ ଲାଗିଥିଲା। ଏହାଛଡ଼ା ଦୁଇବର୍ଷ ଯାଏ ତାଙ୍କର ଅଧିନାୟକତ୍ୱ ଉପରେ ବ୍ୟାନ୍ କରାଯାଇଥିଲା। ତାଙ୍କ ପରେ ଟେଷ୍ଟ ଟିମ୍ର ଅଧିନାୟକ ଦାୟିତ୍ୱ ଟିମ୍ ପେନ୍ଙ୍କୁ ଏବଂ ଟି୨୦ ଦଳର ଅଧିନାୟକତ୍ୱ ଆରୋନ ଫିଞ୍ଚଙ୍କୁ ଦିଆଯାଇଥିଲା।
ଏହାକୁ ନେଇ ସ୍ମିଥ୍ ଏବେ କହିଛନ୍ତି, ପୁଣିଥରେ ନେତୃତ୍ୱ ନିଏ କି ନ ନିଏ, କେପ୍ଟାଉନ୍ରେ ଘଟିଥିବା ଘଟଣା ସହ ମୋତେ ବଞ୍ଚିବାକୁ ହେବ। ଅନେକ ଜିନିଷ ଦେଇ ମୁଁ ଗତି କରି ସାରିଛି। ସମୟ ଆଗକୁ ବଢ଼େ, ବିଗତ କିଛି ବର୍ଷରେ ମୁଁ ନିଜ ବିଷୟରେ ବହୁତ କିଛି ଜାଣିବାକୁ ପାଇଛି। ନିଜ ଭିତରେ ପରିବର୍ତ୍ତନ ହୋଇଛି। ଯଦି ସୁଯୋଗ ମିଳେ ତେବେ ଅଷ୍ଟ୍ରେଲିଆର ନେତୃତ୍ୱ ଭଲ ଭାବେ ନେଇପାରିବେ। ନଚେତ ଯିଏ ବି ଅଧିନାୟକ ଥିବେ ତାଙ୍କୁ ସମର୍ଥନ ଦେବେ। ଏବେ ସେ ଫିଞ୍ଚ ଏବଂ ପେନ୍ଙ୍କୁ ଲଗାତାର ଭାବେ ସମର୍ଥନ କରି ଆସୁଥିବା କହିଛନ୍ତି।
