ନୂଆପଡା ଅଫିସ,୨୧ା୫: ନୂଆପଡ଼ା ଜିଲାରେ ଚାଷୀଙ୍କ ଉନ୍ନତି ପାଇଁ କୋମନା ବ୍ଲକ ଅନ୍ତର୍ଗତ ଜଟଗଡ଼ ପଞ୍ଚାୟତ ସାହଜଟ-ବାଲିପାଟି ଗ୍ରାମରେ ଭୃଷି ଡୋଙ୍ଗରୀ, ଭାଲୁ ଡୋଙ୍ଗରୀ, ସିରିଆଲ ଖୋଲ ଡୋଙ୍ଗରୀ ମଧ୍ୟ ଭାଗରେ କ୍ଷୁଦ୍ର ଜଳ ସେଚନ ପ୍ରକଳ୍ପ ନିର୍ମାଣ ହୋଇଛି। ଏହି ପ୍ରକଳ୍ପରେ ଲୋକେ ଉପକୃତ ହେବା ପରିବର୍ତ୍ତେ କ୍ଷତି ସହୁଛନ୍ତି। ମୁଖ୍ୟ କେନାଲର କବାଟ ଭଲଭାବେ ଲଗା ଯାଇ ନ ଥିବାରୁ ଅନବରତ ପାଣି ବୋହି ଯାଉ ଥିବାରୁ ପ୍ରକଳ୍ପରେ ପାଣି କ୍ଷମତା କମି ଯାଉଛି। ଚାଷୀଙ୍କୁ ଚାଷ ସମୟରେ ପାଣିର ଅସୁବିଧା ହେଉଛି। ପ୍ରାପ୍ତ ସୁଚନା ମୁତାବକ ୨୦୧୨-୧୩ ମସିହାରେ ସାହଜଟ-ବାଲିପାଟି ଗ୍ରାମର ଭାଲୁ ଡୋଙ୍ଗରୀ,ଭୃଷି ଡୋଙ୍ଗରୀ ଓ ସିରିଆଲ ଖୋଲ ଡୋଙ୍ଗରୀ ଅଞ୍ଚଳର ଜମି ଅଧି ଗ୍ରହଣ କରି ଏକ କ୍ଷୁଦ୍ର ଜଳ ସେଚନ ପ୍ରକଳ୍ପ ନିର୍ମାଣ କରାଯାଇଛି। ଏଥିରେ ବାଲିପାଟି ଗଁାର ୭ ଜଣଙ୍କ ଜମି ସଂପୂର୍ଣ୍ଣ ବୁଡି ଯାଇଥିବା ବେଳେ ୧୫ ଜଣଙ୍କ ଜମି ଆଂଶିକ ଭାବେ ବୁଡ଼ିଛି। ଗୁରୁବାରୁ ମାଝିଙ୍କ ଜମି ସଂପୂର୍ଣ୍ଣ ବୁଡି ଯାଇଥିବା ବେଳେ ତାଙ୍କ ଘର ମଧ୍ୟ ବୁଡ଼ି ଯାଇଛି। ଗୁରୁବାରୁଙ୍କୁ ଥଇଥାନ ନ କରିଥିବାରୁ ବାର ଦ୍ୱାର ହୋଇ ବୁଲୁଛନ୍ତି। ଦାଦନ ଶ୍ରମିକ ହୋଇ ବାହାର ରାଜ୍ୟରେ ଦିନ କାଟୁଛନ୍ତି। ସେହିପରି ବାଲିପାଟି ଗ୍ରାମର ଭାଗିରଥି ମାଝି, ଭଗତ ମାଝି, ସଗତ ମାଝି, ମାଣିକ୍ୟ ମଜି, ମାଲଗୁଜାର ଅହିର, ସୁନାଫୁଲ ମାଝିଙ୍କ ଜମି ପ୍ରକଳ୍ପରେ ସଂପୂର୍ଣ୍ଣ ବୁଡ଼ି ଯାଇଛି। କ୍ଷତି ପୁରଣ ରାଶି କମ ପରିମାଣରେ ମିଳିଥିବାରୁ ଅନ୍ୟ ସ୍ଥାନରେ ଜମି କିଣି ନ ପାରି ଦାଦନ ଶ୍ରମିକ ସାଜିଛନ୍ତି। ମାର୍କଣ୍ଡ ମାଝି, ଘାସିରାମ ମାଝି, ବୃଷ ମାଝି, ନୃପତି ମାଝି, ବିକ୍ରମ ମାଝି, ତ୍ରିନାଥ ମାଝି, ରୁଖ ମାଝି, ନେହେରୁ ହରିଜନ, କେଶବ ମାଝି, ବିଶ୍ୱମ୍ବର ମାଝି, ସମୁଦ୍ର ଘାସି, ରେହେନୁ ଜଗତ, ଧରମ ସିଂ ମାଝି, ଝାଲି ମାଝି, ଲୋକନାଥ ଖଏରା ପ୍ରମୁଖଙ୍କ ଜମି ଆଂଶିକ ଭାବରେ ବୁଡି ଯାଇଛି। ଯାହା ଜମି ରହିଛି ପ୍ରକଳ୍ପ ପାଣିରେ ଚାଷ କରିବୁ ଓ ପରିବାର ପ୍ରତିପୋଷଣ କରିବୁ ବୋଲି ଭାବିଥିଲେ। ତାହା ବିପରିତ ଦିଗକୁ ଗତି କରୁଛି। ପ୍ରକଳ୍ପରେ ୫୦ ଏକର ଜମିରେ ପାଣି ରହୁଥିବା ବେଳେ ୨୭ ଚାଷି ୪୦ ରୁ ୪୫ ଏକର ଜମିରେ ରବି ରୁତୁରେ ଧାନ ଚାଷ କରନ୍ତି। ମୁଖ୍ୟ କେନାଲର ଗେଟରେ କବାଟ ଭଲ ଭାବରେ ଲଗା ଯାଇ ନ ଥିବାରୁ ସବୁ ଦିନ ଅନବରତ ପାଣି ବୋହି ଯାଉଛି। ଫଳରେ ପ୍ରକଳ୍ପରେ କ୍ଷମତା ଠାରୁ କମ ପାଣି ରହୁଛି। ଖରିଫ ରୁତୁରେ ଫସଲ ଠିକ ଭାବେ ହେଉଥିବା ବେଳେ ରବି ରୁତୁରେ ପାଣି କମି ଯାଉଥିବାରୁ ଚାଷ ଅମଳ ପର୍ଯ୍ୟନ୍ତ ଯାଇ ପାରୁନାହିଁ। ଫଳରେ ଚାଷି କ୍ଷତି ସହୁଛି। ଏ ସଂକ୍ରାନ୍ତରେ ଯନ୍ତ୍ରୀ ଅନ୍ତର୍ଯ୍ୟାମୀ ନାୟକଙ୍କୁ ପଚାରିବାରୁ ପ୍ରକଳ୍ପରେ ଗେଟ ଲଗାଇବା ସମୟରେ ଠିକ ଥିଲା। ଯେଉଁମାନେ ଗେଟ ଖୋଲୁଛନ୍ତି ସେମାନେ ଠିକ ଭାବେ ଖୋଲୁ ନ ଥିବାରୁ ଗେଟ ଠିକ ଭାବରେ ଲାଗୁ ନାହିଁ। ସେଥିପାଇଁ ପାଣି ଝରୁଛି ବୋଲି କହିଛନ୍ତି।
