ସ୍କିପିଂ କରିବା ଏକ ଭଲ ବ୍ୟାୟାମ। ଯେଉଁମାନେ ଫିଟ୍ ରହିବାକୁ ଚାହାନ୍ତି ସେମାନେ ଏହାକୁ ନିଜ ବ୍ୟାୟାମର ରୁଟିନ୍ରେ ନିଶ୍ଚୟ ସାମିଲ କରନ୍ତି। ତେବେ ଜଣେ କିମ୍ବା ଦୁଇଜଣ ସାମ୍ନା ସାମ୍ନି ଠିଆ ହୋଇ ସ୍କିପିଂ ଖେଳିବା ଅନେକେ ଦେଖିଥିବେ। ହେଲେ ନିକଟରେ ତିନିଜଣ ଭିନ୍ନ ଧରଣର ସ୍କିପିଂ ଖେଳି ଚର୍ଚ୍ଚାର ପରିସରଭୁକ୍ତ ହୋଇଛନ୍ତି। ଦିଲ୍ଲୀର ଜମ୍ପ ରୋପ୍ ଫ୍ୟୁଜନ୍ କ୍ରୁର ସଦସ୍ୟ ହେଉଛନ୍ତି ଏହି ତିନିଜଣ। ଉକ୍ତ ଭିଡିଓରେ ଦେଖିବାକୁ ମିଳେ ଜଣେ ବ୍ୟକ୍ତିଙ୍କ କାନ୍ଧରେ ଅନ୍ୟ ଜଣେ ଯୁବକ ବସିଛନ୍ତି। ଆଉ କାନ୍ଧରେ ବସିଥିବା ଯୁବକଙ୍କ କାନ୍ଧ ଉପରେ ବସିଛନ୍ତି ଜଣେ ଯୁବତୀ। ମଝିରେ ଥିବା ଯୁବକଙ୍କ ହାତରେ ଥାଏ ଏକ ଲମ୍ବା ସ୍କିପିଂ ଦଉଡି। ମଝି ଯୁବକ ସ୍କିପିଂ ବୁଲାଇବା ସହ ତଳେ ଠିଆ ହୋଇଥିବା ଯୁବକ ଡେଇଁଥାନ୍ତି। ଆଉ ସବୁଠାରୁ ଉପରେ ଥିବା ଯୁବତୀ ସନ୍ତୁଳନ ରକ୍ଷା କରି ବସିଥାନ୍ତି। ଏହିଭଳିଭାବେ ଏକାସାଙ୍ଗରେ ତିନିଜଣ ସ୍କିପିଂ କରିପାରୁଛନ୍ତି। ଏହି କାରନାମାର ଭିଡିଓକୁ ଲୋକେ ବହୁତ ପସନ୍ଦ କରୁଛନ୍ତି। ଜମ୍ପ ରୋପ୍ ଫ୍ୟୁଜନ କ୍ରୁର ସଦସ୍ୟମାନେ ଇଣ୍ଡିଆଜ୍ ଗଟ୍ ଟ୍ୟାଲେଣ୍ଟରେ ମଧ୍ୟ ଅଜବ କାରନାମା ଦେଖାଇ ଜଜ୍ଙ୍କ ସହ ଦର୍ଶକଙ୍କର ମନ ଜିଣିଥିଲେ।
