ଭୁବନେଶ୍ୱର,୧୨।୧୨(ବ୍ୟୁରୋ): ରାଜ୍ୟରେ ବର୍ତ୍ତମାନ କେତେକ ସ୍ଥାନରେ ଗୋରୁଙ୍କଠାରେ ଭୂତାଣୁଜନିତ ଚର୍ମବିଣ୍ଡି ରୋଗ ଦେଖାଯାଇଛି। ଏହା ବ୍ୟାପୁଥିବାରୁ ଚିନ୍ତା ବଢ଼ିଛି। ଏହି ରୋଗର ନିରାକରଣ ପାଇଁ ସରକାରଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି। ରାଜ୍ୟର ୫୪୧ ପ୍ରାଣୀ ଚିକିତ୍ସାଳୟ, ୩,୨୩୯ ପ୍ରାଣୀସମ୍ପଦ ସହାୟକ କେନ୍ଦ୍ର ଓ ୩୧୪ ଭ୍ରାମ୍ୟମାଣ ପ୍ରାଣୀଚିକିତ୍ସା ୟୁନିଟ୍ ମାଧ୍ୟମରେ ଆକ୍ରାନ୍ତ ଗୋରୁଙ୍କୁ ଚିକିତ୍ସା କରାଯାଉଛି। ଗତ ଶନିବାର ସୁଦ୍ଧା ୧୦,୦୪୭ ଗୋରୁଙ୍କ ଶରୀରରେ ଚର୍ମବିଣ୍ଡି ରୋଗର ଲକ୍ଷଣ ଦେଖାଯାଇଛି। ଏଥିମଧ୍ୟରୁ ୪,୮୩୭ ଗୋରୁ ଚିକିତ୍ସା ପରେ ଆରୋଗ୍ୟ ଲାଭ କରିଛନ୍ତି। କେବଳ ଶନିବାର ୬୨୬ଟି ଗୋରୁ ଆରୋଗ୍ୟ ହୋଇଛନ୍ତି। ଅନ୍ୟ ଆକ୍ରାନ୍ତଙ୍କ ଚିକିତ୍ସା ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ବିଭାଗ ଦ୍ୱାରା ଚାଲୁ ରହିଛି। ଏହି ରୋଗର ନିରାକରଣ ପାଇଁ ଶନିବାର ୬୭,୪୦୦ ଗୋରୁଙ୍କ ଟିକାକରଣ କରାଯାଇଛି। ଏହାକୁ ମିଶାଇ ରାଜ୍ୟରେ ଏପର୍ଯ୍ୟନ୍ତ ୬,୩୨,୮୦୦ ଗୋରୁଙ୍କୁ ଟିକାକରଣ କରାଯାଇଛି ଏବଂ ଟିକାକରଣ କାର୍ଯ୍ୟକ୍ରମ ଚାଲୁରହିଛି। ଏଥିସହ ସଂକ୍ରମଣ ରୋକିବା ପାଇଁ ବାଲେଶ୍ୱର, ବରଗଡ଼, ଦେବଗଡ଼, ଗଜପତି, ଗଞ୍ଜାମ, ଝାରସୁଗୁଡ଼ା, କଳାହାଣ୍ଡି, କେନ୍ଦୁଝର, କୋରାପୁଟ, ମାଲକାନଗିରି, ମୟୂରଭଞ୍ଜ, ନୂଆପଡ଼ା, ରାୟଗଡ଼ା ଓ ସୁନ୍ଦରଗଡ଼ ପରି ରାଜ୍ୟର ସୀମାନ୍ତ ଜିଲାଗୁଡ଼ିକରେ ଗୋରୁଙ୍କୁ ଆନ୍ତଃରାଜ୍ୟ ନେବା ଆଣିବାକୁ ନିଷେଧ କରାଯାଇଛି। ସେହିଭଳି ରାଜ୍ୟରେ ଗୋରୁ ପ୍ରଦର୍ଶନୀ, ମେଳା ଓ ଗୋରୁହାଟ ବନ୍ଦ କରାଯାଇଛି ବୋଲି ରବିବାର ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗ ପକ୍ଷରୁ କୁହାଯାଇଛି।
