ଚମଡ଼ା ଉତାରି ଦେଉଛନ୍ତି, ଡିଟେନଶନ ସେଣ୍ଟରରେ ସୈନ୍ୟ ବାହିନୀର ବର୍ବରତା…
01 ନାପିତ୍ୱ,୨୮।୧୦: ମ୍ୟାନ୍ମାରରେ ସୈନ୍ୟ ବାହିନୀର ବର୍ବରତା ସୀମା ଟପୁଛି। ଦେଶର ବିଭିନ୍ନ ଅଟକ କେନ୍ଦ୍ର (ଡିଟେନଶନ ସେଣ୍ଟର)ରେ ଲୋକଙ୍କ ଉପରେ ନାନା ପ୍ରକାର ନିର୍ଯାତନା କରାଯାଉଛି। ନିକଟରେ ଜଣେ ଗ୍ରାମୀଣ ଯୁବକଙ୍କ ଚମଡ଼ା ଉତାରିବା ସହିତ ତାଙ୍କ ଛାତିକୁ ବାରମ୍ବାର ଗୋଇଠା ମରାଯାଇଥିଲା। ଗୋଇଠା ମାଡ଼ରେ ଯୁବକ ଜଣଙ୍କ ନିଶ୍ୱାସ ନେଇ ପାରି ନ ଥିଲେ। ଶେଷରେ ତାଙ୍କର ମୃତ୍ୟୁ ଘଟିଥିଲା।
ସମ୍ପୃକ୍ତ ଯୁବକ ଏବଂ ତାଙ୍କ ବନ୍ଧୁ, ବାଇକ ଯୋଗେ ଘରକୁ ଯିବାବେଳେ ସେମାନଙ୍କୁ କୌଣସି କାରଣ ନ ଦର୍ଶାଇ ଗିରଫ କରାଯାଇଥିଲା। ପରେ ସେମାନଙ୍କୁ ଅଟକ କେନ୍ଦ୍ରକୁ ପଠାଇ ଦିଆଯାଇଥିଲା। ଏଭଳି ଅବସ୍ଥା ବହୁ ଲୋକଙ୍କର ହେବାରେ ଲାଗିଛି।
ଫେବୃଆରୀରେ କ୍ଷମତା ଦଖଲ କରିବା ପରଠାରୁ ମ୍ୟାନ୍ମାର ସୈନ୍ୟବାହିନୀ ମିଲିଟାରୀ ଢଙ୍ଗରେ ଅଟକ ଲୋକଙ୍କୁ ନିର୍ଯାତନା ଦେଉଛନ୍ତି। ଆସୋସିଏଟେଡ ପ୍ରେସ (ଏପି) ଗତ କିଛି ମାସ ମଧ୍ୟରେ କାରାଗାରରେ ଥିବା ୨୮ଜଣଙ୍କ ସାକ୍ଷାତକାର ନେଇଛନ୍ତି। ଫଟୋଗ୍ରାଫି ପ୍ରମାଣ, ସ୍କେଚ ଏବଂ ଚିଠି ଭିତ୍ତିକ ପ୍ରମାଣକୁ ଆଧାର କରି ଦୁଇଜଣ ସାମରିକ କ୍ୟାପଟେନ ଏବଂ ଜଣେ ଉଚ୍ଚ ପଦାଧିକାରୀ କମାଣ୍ଡରଙ୍କ ସହକାରୀଙ୍କ ସାକ୍ଷୀଙ୍କ ସାକ୍ଷ୍ୟ ସହିତ, ଏପି ପକ୍ଷରୁ ଅନୁସନ୍ଧାନ କରାଯାଇ ତଥ୍ୟ ପ୍ରକାଶ ପାଇଛି ଯେ, ଅଟକ କେନ୍ଦ୍ରରେ ୯,୦୦୦ରୁ ଅଧିକ ଲୋକଙ୍କୁ ରଖାଯାଇଥିଲା।
ଲୋକଙ୍କୁ ମିଲିଟାରୀ ଶୈଳୀରେ ନିର୍ଯାତନା ଦିଆଯାଉଛି। ସାମରିକ ଅଧିକାରୀ ତାତମାଦଓ୍ବଙ୍କ ନିର୍ଦ୍ଦେଶରେ କମ୍ୟୁନିଟି ହଲକୁ ଅଟକ କେନ୍ଦ୍ରରେ ପରିଣତ କରାଯାଉଛି। ସେଠାରେ ଲୋକେ ଅତି ଦୟନୀୟ ଅବସ୍ଥାରେ ରହୁଛନ୍ତି। କୌଣସି ସାଧାରଣ ସୁବିଧା ସେଠାରେ ନାହିଁ।
ମ୍ୟାନ୍ମାର୍ରେ ଏଭଳି ୧୨ରୁ ଅଧିକ ଅଟକ କେନ୍ଦ୍ରକୁ ଆସୋସିଏଟେଡ ପ୍ରେସ ପକ୍ଷରୁ ଚିହ୍ନଟ କରାଯାଇଛି। ସାକ୍ଷାତକାର ହୋଇଥିବା କଏଦୀମାନେ ଦେଶର ବିଭିନ୍ନ ଅଞ୍ଚଳରୁ ଆସିଥିଲେ। ସେମାନଙ୍କ ମଧ୍ୟରେ ୧୬ ବର୍ଷ ବୟସ୍କ ବାଳିକାଙ୍କଠାରୁ ଆରମ୍ଭ କରି ବୌଦ୍ଧ ଭିକ୍ଷୁମାନେ ମଧ୍ୟ ରହିଥିବା ପ୍ରେସ୍ କହିଛି।
କେତେକ ସୈନ୍ୟବାହିନୀ ବିରୋଧରେ ପ୍ରଦର୍ଶନ କରି ଗିରଫ ହୋଇଥିଲେ, ଆଉ କିଛି ଅଜ୍ଞାତ କାରଣରୁ ଅଟକ ରହିଥିଲେ। ସେମାନଙ୍କୁ ଏକାଧିକ ମିଲିଟାରୀ ୟୁନିଟ ଏବଂ ପୋଲିସ ପଚରାଉଚରା କରିବା ସହିତ ଅକଥନୀୟ ନିର୍ଯାତନା ଦେଇଥିବା ପ୍ରେସ୍ ପକ୍ଷରୁ କୁହାଯାଇଛି। ଲୋକଙ୍କୁ ଇଲେକ୍ଟ୍ରିକ୍ ଶକ୍, ପାଣିରେ ବୁଡ଼ାଇବା, ଲଗାତାର ମାଡ ଦିଆ ଯାଉଛି। ମୃତ୍ୟୁ ଏବଂ ଗିରଫଦାରୀ ଉପରେ ନଜର ରଖୁଥିବା ଆସିଷ୍ଟାଣ୍ଟ ଆସୋସିଏସନ ଫର ପଲିଟିକାଲ ପ୍ରିଜନରର୍ସ (ଏଏପିପି) କହିବାନୁସାରେ, ଲୋକଙ୍କ ଉପରେ ବର୍ବରତା ପୂର୍ବକ ନିର୍ଯାତନା ଦିଆଯାଉଛି।
ଫେବୃଆରୀରୁ ସୁରକ୍ଷା ବାହିନୀ ୧,୨୦୦ ରୁ ଅଧିକ ଲୋକଙ୍କୁ ହତ୍ୟା କରିଛନ୍ତି । ସେହିପରି ଅତି କମରେ ୧୩୧ ଜଣଙ୍କର ନିର୍ଯାତନା ଯୋଗୁ ମୃତ୍ୟୁ ଘଟିଛି। ନ୍ (ଏଏପିପି)ର ଯୁଗ୍ମ ସଚିବ ତଥା ପୂର୍ବତନ ରାଜନୈତିକ ବନ୍ଦୀ କୋ ବୋ କି କହିଛନ୍ତି, ଅଟକ ଲୋକମାନଙ୍କୁ ପ୍ରଥମେ ପ୍ରତିଶୋଧ ପାଇଁ, ପରେ ସୂଚନା ପାଇଁ ନିର୍ଯାତନା ଦିଆଯାଉଛି। ଦେଶରେ ସୈନ୍ୟବାହିନୀ ଅଧିକ ନିଷ୍ଠୁର ହୋଇପଡ଼ିଛନ୍ତି ବୋଲି ସେ କହିଛନ୍ତି।
ବନ୍ଦୀମାନଙ୍କୁ ନିର୍ଯାତନା ଦେଇଥିବା ପ୍ରମାଣ ଲୁଚାଇବା ପାଇଁ ବିଭିନ୍ନ ଉଦ୍ୟମ ହେଉଛି। ବହୁ କଏଦୀ କହିଛନ୍ତି ଯେ ପଚରାଉଚରା ସମୟରେ କେବଳ ସେମାନଙ୍କ ଶରୀରର କିଛି ଅଂଶକୁ ଲୁଚାଇ ରଖାଯାଉଛି। ପଶ୍ଚିମ ମିଆଁମାରର ଚିନ ରାଜ୍ୟର ସର୍ବୋଚ୍ଚ ସେନା ଅଧିକାରୀଙ୍କ ଜଣେ ସହଯୋଗୀ ଏପିଙ୍କୁ କହିଛନ୍ତି ଯେ ଦୁଇଜଣ ନିର୍ଯାତିତ କଏଦୀଙ୍କ ମୃତ୍ୟୁକୁ ସୈନ୍ୟମାନେ ଲୁଚାଇ ରଖିଥିଲେ ଏବଂ ଡାକ୍ତରଙ୍କୁ ସେମାନଙ୍କ ଶବ ବ୍ୟବଚ୍ଛେଦ ରିପୋର୍ଟକୁ ମିଥ୍ୟା ପ୍ରମାଣିତ କରିବାକୁ ବାଧ୍ୟ କରିଥିଲେ।