ନିରାକାରପୁର,୨୯ା୧୦(ମାନସ ଚନ୍ଦ୍ର ପଟ୍ଟନାୟକ): ଜଣେ ବ୍ୟକ୍ତି ଗତ ଦେଢ଼ମାସ ହେଲା ଘରୁ ନିଖୋଜ ଥିବାବେଳେ ବୁଧବାର ଖୋର୍ଦ୍ଧା ଜିଲା ଜଙ୍କିଆ ଥାନା ଅଧୀନ ନାଲସିଂସ୍ଥିତ ଅଟଳା ପାହାଡ଼ ନିକଟ ଏକ ବୁଦାମୂଳରୁ ତାଙ୍କର କଙ୍କାଳ ମିଳିଛି। କଙ୍କାଳ ପାଖରୁ ୨ଟି ମୋବାଇଲ ଫୋନ୍, ପ୍ୟାନକାର୍ଡ, ଏଟିଏମ୍ କାର୍ଡ ସହ ଏକ ବାଇକ (ନଂ. ଓଡି -୦୨ ପି-୬୮୯୮)କୁ ପୋଲିସ ଜବତ କରିଛି। ମୃତକ କଟକ ଜିଲା ନିଆଳି ଥାନା ଅଧିନସ୍ଥ କୂଳଶ୍ରୀ ଗ୍ରାମର ସୁନୀଲ ସାହୁ (୩୫)ବୋଲି ଜଣାପଡ଼ିଛି। ତେବେ ତାଙ୍କର ମୃତ୍ୟୁ କିପରି ହେଲା ଏବଂ ସେଠାରେ କିପରି ମୃତଦେହ ପଡ଼ିଲା ସେ ନେଇ କିଛି ସ୍ପଷ୍ଟ ହୋଇପାରି ନ ଥିବାବେଳେ ପୋଲିସ ତଦନ୍ତ ଜାରି ରଖିଛି।
ଜଙ୍କିଆ ଥାନା ଅଧିକାରୀ ସୁଶାନ୍ତ କୁମାର ବେହେରାଙ୍କ ସୂଚନା ଅନୁଯାୟୀ, ବୁଧବାର ନାଲସିଂହ ଗ୍ରାମର କେତେଜଣ ବ୍ୟକ୍ତି ଜାଳେଣି କାଠ ପାଇଁ ଅଟଳା ପାହାଡ଼ ପାଖକୁ ଯାଉଥିଲେ। ପ୍ରଥମେ ରାସ୍ତାରେ ଏକ ବାଇକ ପଡ଼ିରହିଥିବା ସେମାନେ ଦେଖିବାକୁ ପାଇଥିଲେ। ତେବେ କିଛି ବାଟ ଆଗକୁ ଯିବା ପରେ ସମ୍ପୃକ୍ତ ବ୍ୟକ୍ତିଙ୍କ କଙ୍କାଳ ପଡ଼ିଥିବା ଦେଖିଥିଲେ। ବାଇକ୍ ନମ୍ବରରୁ ଘରର ଠିକଣା ପାଇ ପରିବାର ଲୋକଙ୍କୁ ଜଣାଇଥିଲେ। ପରେ ପୋଲିସ ଘଟଣାସ୍ଥଳରେ ପହଞ୍ଚି କଙ୍କାଳ ଜବତ କରିବା ସହ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ମୃତକଙ୍କ ବାପା ଅମୂଲ୍ୟ ସାହୁଙ୍କ କହିବା ଅନୁଯାୟୀ, ସୁନୀଲ ଏଇ ୪ମାସ ହେଲା ବିବାହ କରିଥିଲେ। ସେ ଭୁବନେଶ୍ୱରର ମଞ୍ଚେଶ୍ୱରଠାରେ ଏକ ମୋବାଇଲ ଦୋକାନ ଖୋଲିଥିଲେ। ଦେଢ଼ମାସ ତଳେ ସେ ହଠାତ କେଉଁଆଡ଼େ ଚାଲିଯାଇଥିଲେ। ପରିବାର ପକ୍ଷରୁ ଅନେକ ଖୋଜାଖୋଜି କରିବା ପରେ ମଧ୍ୟ କୌଣସି ପତ୍ତା ମିଳି ନ ଥିଲା। ମଞ୍ଚେଶ୍ୱର ଥାନାରେ ଏ ନେଇ ନିଖୋଜ ଅଭିଯୋଗ କରି ଖୋଜାଖୋଜି ଜାରି ରଖିଥିବାବେଳେ ପାରିବାରିକ ଅଶାନ୍ତିରୁ ସେ ଘର ଛାଡ଼ିଥିବା ବାପା ଅଭିଯୋଗ କରିଛନ୍ତି। ତେବେ ଏଠାକୁ ସୁନୀଲ କିପରି, କାହିଁକି ଓ କାହା ସହିତ ଆସିଥିଲେ। ଯଦି ଆସିଲେ ସେ ଏକୁଟିଆ ଥିଲେ ନାଁ ତାଙ୍କ ସାଙ୍ଗରେ କିଏ ଥିଲେ। ସେ ଆତ୍ମହତ୍ୟା କରିଛନ୍ତି ନାଁ ତାଙ୍କୁ କିଏ ହତ୍ୟା କରିଛି, ତାହାକୁ ନେଇ ସାଧାରଣରେ ବିଭିନ୍ନ ପ୍ରଶ୍ନ ଉଙ୍କିମାରୁଛି। ଏ ନେଇ ଜଙ୍କିଆ ଥାନା ପକ୍ଷରୁ ଏକ ଅପମୃତ୍ୟୁ ମାମଲା (ନଂ. ୨୬/୨୫) ରୁଜୁ କରାଯାଇ ଜବତ କଙ୍କାଳକୁ ଖୋର୍ଦ୍ଧା ସରକାରୀ ମେଡିକାଲରେ ବ୍ୟବଚ୍ଛେଦ କରାଯିବା ପରେ ପରିବାରକୁ ହସ୍ତାନ୍ତର କରାଯାଇଛି। ବ୍ୟବଚ୍ଛେଦ ରିପୋର୍ଟ ଆସିଲେ ପ୍ରକୃତ ତଥ୍ୟ ଜଣାପଡ଼ିବ ବୋଲି ଥାନା ଅଧିକାରୀ ବେହେରା କହିଛନ୍ତି।
Dharitri – Odisha’s No.1 Odia Daily
