ଲକ୍ଷ୍ନୌ,୨୯।୧୦: ରାଜ୍ୟ ସଭା ନିର୍ବାଚନ ପୂର୍ବରୁ ମାୟାବତୀଙ୍କ କ୍ୟାମ୍ପରେ ବିଦ୍ରୋହ ଦେଖାଦେଇଛି। ବହୁଜନ ସମାଜ ପାର୍ଟି(ବିଏସ୍ପି)ର ରାଜ୍ୟ ସଭା ପ୍ରାର୍ଥୀ ରାମଜୀ ଗୌତମଙ୍କଠାରୁ ଦଳର ୪ ବିଧାୟକ ସେମାନଙ୍କର ସମର୍ଥନ ପ୍ରତ୍ୟାହାର କରିନେଇଛନ୍ତି। ଗୌତମଙ୍କ ପ୍ରସ୍ତାବକ ଭାବେ ସେମାନଙ୍କର ସ୍ବାକ୍ଷର ଜାଲ୍ ବୋଲି ବିଧାୟକମାନେ ରିଟର୍ନିଂ ଅଫିସରଙ୍କୁ ଜଣାଇଦେଇଛନ୍ତି। ସେମାନଙ୍କ ସହ ବିଏସ୍ପିର ଅନ୍ୟ ଦୁଇଜଣ ବିଧାୟକ ମଧ୍ୟ ରିଟର୍ନିଂ ଅଫିସରଙ୍କୁ ଭେଟିଥିଲେ। ଏହି ବିଧାୟକମାନେ ସମାଜବାଦୀ ପାର୍ଟି (ଏସ୍ପି) ଅଫିସକୁ ଯାଇ ଏହାର ଅଧ୍ୟକ୍ଷ ଅଖିଳେଶ ଯାଦବଙ୍କୁ ସାକ୍ଷାତ କରିଛନ୍ତି। ସେମାନେ ଏସ୍ପିରେ ସାମିଲ ହୋଇପାରନ୍ତି ବୋଲି କୁହାଯାଉଛି।
ପ୍ରଥମ ଥର ପାଇଁ ବିଏସ୍ପିକୁ ଏହାର ୨୦୧୯ ମେଣ୍ଟ ସହଯୋଗୀ ସମାଜବାଦୀ ପାର୍ଟିଠାରୁ ଶକ୍ତ ଧକ୍କା ଲାଗିଛି। ବୁଧବାର ରାଜନୈତିକ ସମୀକରଣରେ ଘଟିଥିବା ଏହି ନାଟକୀୟ ମୋଡ ଆଗାମୀ ୨୦୨୨ ଉତ୍ତରପ୍ରଦେଶ ବିଧାନସଭା ନିର୍ବାଚନକୁ ପ୍ରଭାବିତ କରିବ। ଜାଲ୍ ଦସ୍ତଖତ ସମ୍ପର୍କରେ ବିଧାୟକମାନଙ୍କ ଅଭିଯୋଗ ସତ୍ତ୍ୱେ ଗୌତମଙ୍କ ନାମାଙ୍କନ ପତ୍ର କାଏମ ରହିଛି। ଅନ୍ୟପକ୍ଷରେ ଏସ୍ପି ସମର୍ଥତ୍ତ ସ୍ବାଧୀନ ପ୍ରାର୍ଥୀ ପ୍ରକାଶ ବଜାଜଙ୍କ ପ୍ରାର୍ଥତ୍ପତ୍ର ନାକଚ ହୋଇଯାଇଛି।
