ବୌଦ୍ଧ,୧୧ା୮(ଅଜିତ କୁମାର ବାରିକ): ବୌଦ୍ଧ ଜିଲାରେ ଦିନକୁ ଦିନ ଚୋରି ଡକାୟତି ବୃଦ୍ଧି ପାଉଥିବା ବେଳେ ପୋଲିସ ପକ୍ଷରୁ ଏକ ଡକାୟତି ଘଟଣାରେ ଜଣେ ନାବାଳକଙ୍କ ସହ ୪ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି। ପୋଲିସ ଅଭିଯୁକ୍ତମାନଙ୍କ ପାଖରୁ ଗୋଟିଏ ଖଣ୍ଡା, ଦୁଇଟି ଛୁରି, ଗୋଟିଏ ମୋବାଇଲ ସହ ନଗଦ ଅର୍ଥ ୨୮ ହଜାର ୫୦୦ ଟଙ୍କା ଓ କିଛି ଲୁଗାପଟା ଜବତ କରିଛି। ଅଭିଯୁକ୍ତକୁ ଧରିବା ପରେ ବୌଦ୍ଧ ଆରକ୍ଷୀ ଅଧୀକ୍ଷକ ରାହୁଲ ଗୋଏଲ ସୋମବାର ଏକ ଖବରଦାତା ସମ୍ମିଳନୀ କରି ସୂଚନା ଦେଇଥିଲେ। ସୂଚନା ଅନୁସାରେ ଗତ ୫.୮.୨୫ରେ କୁଲତାଖଲି ଗ୍ରାମର ରାଜକିଶୋର ନାୟକ ଓ ତାଙ୍କ ଭାଇ ୧ ମୋଟରସାଇକେଲରେ ଘରକୁ ଫେରୁଥିବା ବେଳେ ତେଲିବନ୍ଧ-ମୁଣ୍ଡାପଡ଼ା ରାସ୍ତାର ତୁଳସୀପୁରଠାରେ ୪ ଜଣ ଯୁବକ ମାରଣାସ୍ତ୍ର ଦେଖାଇ, ଆକ୍ରମଣ କରିବା ସହ ସେମାନଙ୍କଠାରୁ ମୋବାଇଲ, ନଗଦ ଟଙ୍କା ୧ ଲକ୍ଷ ୭ ହଜାର ଟଙ୍କା ହଜାର, ସୁନା ଚେନ୍, ବ୍ୟାଗ୍ ନେଇ ଯାଇଥିଲେ। ଏନେଇ ରାଜ କିଶୋର ଗତ ୬.୮.୨୫ ବୌଦ୍ଧ ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ପୋଲିସ ଏକ ସ୍ବତନ୍ତ୍ର ଟିମ୍ ଗଠନ କରି ତଦନ୍ତ ଆରମ୍ଭ କରିଥିଲା। ପୋଲିସ ଏହି ଘଟଣାରେ ୪ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ଜଣେ ନାବାଳକଙ୍କୁ ମଧ୍ୟ ଗିରଫ କରିଛି। ଅଭିଯୁକ୍ତମାନେ ହେଲ ବୌଦ୍ଧ ଜିଲା ପନଖିମାଳ ଗ୍ରାମର ଦିଲ୍ଲୀପ କଲତା ( ୩୨) , ମୁଣ୍ଡାପଡ଼ା ଗ୍ରାମର ସୁଧା ଓରଫ ସୁଦାମ ମହାନନ୍ଦିଆ ( ୩୨), ବନ୍ଧାପଥର ଗ୍ରାମର ଶକ୍ତି ଓରଫ ତୁଷାରକାନ୍ତ ବେହେରା (୧୯) , ବନ୍ଧାପଥର ଗ୍ରାମର ସିଦ୍ଧାନ୍ତ ଭବସାଗର (୧୯) ଓ ଜଣେ ନାବାଳକକୁ ଗିରଫ କରିବାରେ ସଫଳ ହୋଇଛନ୍ତି। ପୋଲିସ ସେମାନଙ୍କ ନିକଟରୁ ଗୋଟିଏ ଖଣ୍ଡା, ଦୁଇଟି ଛୁରି, ଗୋଟିଏ ମୋବାଇଲ ନଗଦ ଅର୍ଥ ୨୮ ହଜାର ୫୦୦ ଟଙ୍କା ଓ କିଛି ଲୁଗାପଟା ଜବତ କରିଥିଲା। ପୋଲିସ ଗିରଫ ଅଭିଯୁକ୍ତ ଓ ନାବାଳକକୁ ସୋମବାର କୋର୍ଟ ଚାଲାଣ କରିଛି । ଏହା ସହ ୫ଟି ଚୋରି ମାମଲାରେ ମଧ୍ୟ ଜଣେ ନାବାଳକଙ୍କୁ ଗିରଫ କରିଥିବା ବେଳେ ନାବାଳକ ଠାରୁ ଲାପଟପ୍, ସୁନାମୁଦି, ଟାବଲେଟ, ପାଣିପମ୍ପ, ନଗଦ ୨ଲକ୍ଷ ୨୮ ହଜାର , ୟୁପିଏସ୍, ମନିଟର ସହ ବିଭିନ୍ନ ସାମଗ୍ରୀ ଜବତ କରିଛି।
