ନୂଆଦିଲ୍ଲୀ,୧୯ା୫: ଭାରତର ରିଜର୍ଭ ବ୍ୟାଙ୍କ (ଆର୍ବିଆଇ)ର ପୂର୍ବତନ ଗଭର୍ନର ରଘୁରାମ ରାଜନ ନିକଟରେ କୋଭିଡ୍-୧୯ ମହାମାରୀକୁ ଦେଶ ପାଇଁ ସ୍ବାଧୀନତା ପରେ ସବୁଠୁ ବଡ଼ ଚ୍ୟାଲେଞ୍ଜ ଭାବେ ଅଭିହିତ କରିଥିଲେ। ଏହାସହ ଦେଶର ନେତୃତ୍ୱ କେମିତି ରହିଛି ତାହା ସାମ୍ପ୍ରତିକ ଅବସ୍ଥାରୁ ଜଣାପଡ଼ିଥାଏ ବୋଲି କହିଥିଲେ। ଏହି ବିଶିଷ୍ଟ ଅର୍ଥନୀତିଜ୍ଞଙ୍କ ମନ୍ତବ୍ୟ ସାମ୍ପ୍ରତିକ ସ୍ଥିତିରେ ଅତି ତାତ୍ପର୍ଯ୍ୟପୂର୍ଣ୍ଣ ମନେକରାଯାଏ। ବିଶେଷକରି ଯେତେବେଳେ କରୋନା ଭାଇରସ୍ ୨୪ ଘଣ୍ଟା ମଧ୍ୟରେ ୪,୩୨୯ ଜଣଙ୍କ ଜୀବନ ନେବାରେ ସକ୍ଷମ ହୋଇଛି ଭାରତୀୟଙ୍କ ମନରେ ଦେଶର ନେତୃତ୍ୱ ପ୍ରତି ସନ୍ଦେହ ଜାତ ହେବା ଅସ୍ବାଭାବିକ ନୁହେଁ। କାରଣ ଭୂତାଣୁ ମାଡ଼ରେ ବିପର୍ଯ୍ୟସ୍ତ ସ୍ବାସ୍ଥ୍ୟସେବାର ଦୟନୀୟ ଚିତ୍ର ଅନ୍ତର୍ଜାତୀୟ ସମୁଦାୟର ଦୃଷ୍ଟି ଆକର୍ଷଣ କରିଛି। ପୋଲିସ ପ୍ରଶାସନ, ସରକାର ସମସ୍ତେ ଅସହାୟ। ସତେଯେମିତି ଟୋଟାଲ ସିଷ୍ଟମ୍ ଆଣ୍ଠେଇ ପଡ଼ିଛି ଅଦୃଶ୍ୟ ଭୂତାଣୁର ଦ୍ୱିତୀୟ ଲହର ଆଗରେ। ଶ୍ମାଶାନରେ ନିଆଁ ଲିଭୁନାହିଁ। ଆତ୍ମୀୟଙ୍କ ଆଖିରୁ ଲୁହ ଶୁଖୁନାହିଁ। ସର୍ବତ୍ର ମୃତ୍ୟୁର ଆତଙ୍କ।
ଭାରତର ସ୍ବାସ୍ଥ୍ୟ ମନ୍ତ୍ରଣାଳୟ ମଙ୍ଗଳବାର ସକାଳ ୮ଟାରେ କୋଭିଡ୍ ଡାଟା ଅପ୍ଡେଟ୍ କରିଛି। ଏଥିରେ କୁହାଯାଇଛି ଯେ, ଗତ ୨୪ ଘଣ୍ଟା ମଧ୍ୟରେ ଦେଶରେ ୪,୩୨୯ ଜଣ କରୋନା ସଂକ୍ରମିତ ପ୍ରାଣ ହରାଇଛନ୍ତି। ଭୂତାଣୁ ଆସିବା ପରଠାରୁ କୌଣସି ଦିନ ଏତେ ସଂଖ୍ୟକ ସଂକ୍ରମିତଙ୍କ ଜୀବନ ଯାଇ ନ ଥିଲା। ଏଥିସହ ଦେଶରେ ମୋଟ କରୋନାଜନିତ ମୃତ୍ୟୁସଂଖ୍ୟା ୨,୭୮,୭୧୯ରେ ପହଞ୍ଚତ୍ଥିବା କୁହାଯାଉଛି, ଯାହାକୁ ବିଶେଷଜ୍ଞମାନେ ଗ୍ରହଣ କରିପାରୁ ନାହାନ୍ତି। ପ୍ରକୃତ ସଂଖ୍ୟା ଢେର ଅଧିକ ବୋଲି ବିଭିନ୍ନ ମହଲରେ କୁହାଯାଉଛି। ସରକାରୀ ରିପୋର୍ଟ ଅନୁସାରେ ମହାରାଷ୍ଟ୍ରରେ ସର୍ବାଧିକ ୧,୦୦୦, କର୍ନାଟକ ୪୭୬, ଦିଲ୍ଲୀରେ ୩୪୦, ତାମିଲନାଡୁ ୨୭୨, ଉତ୍ତରପ୍ରଦେଶରେ ୨୨୩ ଜଣ ଦିନକ ମଧ୍ୟରେ ପ୍ରାଣ ହରାଇଛନ୍ତି। ଅନ୍ୟପକ୍ଷେ ୨୪ ଘଣ୍ଟାରେ ୨.୬୩ ଲକ୍ଷ ନୂଆ ସଂକ୍ରମିତ ଚିହ୍ନଟ ହେବା ପରେ ଏହାକୁ ୨୮ ଦିନ ମଧ୍ୟରେ ସର୍ବନିମ୍ନ ସଂକ୍ରମଣ ବୋଲି କୁହାଯାଉଛି। ଭାରତରେ ମୋଟ ସଂକ୍ରମିତଙ୍କ ସଂଖ୍ୟା ୨,୫୨,୨୮,୯୯୬ରେ ପହଞ୍ଚତ୍ଛି।
ସେହିପରି ଦିନକରେ ୪.୨୨ ଲକ୍ଷ ସଂକ୍ରମିତ ଆରୋଗ୍ୟ ହେବା ଏକ ବଡ଼ ଉପଲବ୍ଧି ବୋଲି କେନ୍ଦ୍ର ସରକାର ବିବେଚନା କରିଛନ୍ତି।
