ବାରିପଦା ଅଫିସ,୪ା୧୧: ପ୍ରାକୃତିକ ପରିବେଶ ଭରା ମୟୂରଭଞ୍ଜ ଜିଲାର ଶିମିଳିପାଳ ଅଭୟାରଣ୍ୟ। ଏହାର ଚତୁଃପାର୍ଶ୍ୱରେ ଥିବା ଅନେକ ପର୍ଯ୍ୟଟନସ୍ଥଳୀ ମଧ୍ୟରୁ ସୀତାକୁଣ୍ଡ ଜଳପ୍ରପାତ ଅନ୍ୟତମ। ଶାମାଖଣ୍ଟା ବ୍ଲକ ଅଧୀନ ଶିମିଳିପାଳ ପାଦଦେଶ ଲୁଲୁଙ୍ଗ ନିକଟରେ ରହିଛି ଏହି ଜଳପ୍ରପାତ। ପ୍ରାକୃତିକ ସବୁଜିମାରେ ପରିପୂର୍ଣ୍ଣ ତଥା ବଣ ପାହାଡ଼ ଘେରା ଏଠାକାର ପରିବେଶ ପର୍ଯ୍ୟଟକଙ୍କୁ ବିଭୋର କରିଥାଏ। ୫୦ଫୁଟ ଉଚ୍ଚରୁ ଝରୁଥିବା ପାଣିରେ ସୂର୍ଯ୍ୟଙ୍କ ସୁନେଲୀକିରଣ କୁଣ୍ଡ ଉପରେ ପଡ଼ି ଝଲମଲ ହେବା ଦୃଶ୍ୟ ସମସ୍ତଙ୍କୁ ଆକୃଷ୍ଟ କରିଥାଏ। ଏହି ମନୋରମ ଦୃଶ୍ୟକୁ ଉପଭୋଗ କରିବା ପାଇଁ ବର୍ଷଯାକ ଏଠାରେ ପର୍ଯ୍ୟଟକଙ୍କ ଭିଡ଼ ପରିଲକ୍ଷିତ ହୋଇଥାଏ। ବଣଭୋଜି ପାଇଁ ସୀତାକୁଣ୍ଡ ଏକ ପ୍ରକୃଷ୍ଠ ସ୍ଥାନ ରୂପେ ପରିଚିତ।
ଶୀତର ପ୍ରକୋପ ବୃଦ୍ଧି ପାଇଲେ ବଣଭୋଜି କରିବାକୁ ଏଠାରେ ଲୋକଙ୍କ ଭିଡ଼ ଜମିଥାଏ। ଏଠାକୁ ଆସୁଥିବା ଲୋକେ ସୀତାକୁଣ୍ଡରେ ଗାଧୋଇବା ସହ ସେଲ୍ଫି ଉଠାଇଥାନ୍ତି।
ଏହି ପାଣି ବୋହିଯାଇ ମୁନିଦର ସ୍ଥିତ ପଳପଳା ନଦୀରେ ମିଶୁଛିି। ପଳପଳା ନଦୀର ପାଣି ବୁଢ଼ାବଳଙ୍ଗରେ ମିଶୁଛି। ସୀତାକୁଣ୍ଡ ସମ୍ପର୍କରେ ଅନେକ ଜନଶ୍ରୁତି ରହିଛି। ଝରଣା ପାଣି ସାତଟି କୁଣ୍ଡଦେଇ ପ୍ରବାହିତ ହେଉଥିବା ତଥା ବନବାସ ସମୟରେ ସୀତା ଏହି କୁଣ୍ଡରେ ଗାଧୋଇବା ଯୋଗୁ ଏହି ସ୍ଥାନଟିର ନାମକରଣ ସୀତାକୁଣ୍ଡ ହୋଇଥିବା ଲୋକକଥା ରହିଛି। ସେହିପରି ସୀତାକୁଣ୍ଡ ନିକଟ ପଥର ସନ୍ଦିରେ ହନୁମାନଙ୍କ ମୂର୍ର୍ତ୍ତିି ବହୁ ପୁରାତନ କାଳରୁ ପୂଜା ପାଇ ଆସୁଛି। ଏହାକୁ ଦେଖିବା ଓ ପୂଜା କରିବା ପାଇଁ ଶ୍ରଦ୍ଧାଳୁମାନେ ଆସିବା ସହିତ ପ୍ରକୃତିର ଅପରୂପ ଶୋଭାକୁ ଅତି ନିକଟରୁ ଦେଖିଥାନ୍ତି। ଜିଲା ସଦର ମହକୁମା ବାରିପଦାଠାରୁ ୨୦କି.ମି. ଓ ଶିମିଳିପାଳ ଅଭୟାରଣ୍ୟର ପିଠାବଟା ଗେଟ୍ର ବାମକୁ ୧କି.ମି. ଯିବା ପରେ ଏହି ସ୍ଥାନ ପଡ଼ିଥାଏ। ନଭେମ୍ବର ୧ରୁ ଜୁନ୍ ୧୫ପର୍ଯ୍ୟନ୍ତ ଶିମିଳିପାଳ ଖୋଲା ରହୁଥିବାରୁ ପ୍ରତିଦିନ ପର୍ଯ୍ୟଟକମାନେ ସୀତାକୁଣ୍ଡ ବୁଲି ଶିମିଳିପାଳକୁ ପ୍ରବେଶ କରିଥାନ୍ତି। ସଞ୍ଜ ନଇଁଲେ ଜଙ୍ଗଲୀ ଜୀବଜନ୍ତୁ ପାଣି ପିଇବାକୁ ଏହି କୁଣ୍ଡ ନିକଟକୁ ଆସିଥାନ୍ତି। ସେମାନଙ୍କୁ ଦେଖିବା ପାଇଁ ବିଭାଗ ପକ୍ଷରୁ କୌଣସି ବ୍ୟବସ୍ଥା କରାଯାଇ ନାହିଁ। ଫଳରେ ସନ୍ଧ୍ୟା ହେବା ପୂର୍ବରୁ ଦୂରଦୂରାନ୍ତରୁ ଆସୁଥିବା ପର୍ଯ୍ୟଟକମାନେ ପୁଣି ବାରିପଦାକୁ ଫେରିଆସନ୍ତି। ପର୍ଯ୍ୟଟନସ୍ଥଳୀର ମାନ୍ୟତା ପାଇଥିଲେ ମଧ୍ୟ ପାରିପାର୍ଶ୍ୱିକ ଉନ୍ନତି ପାଇଁ ବିଭାଗ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନାହିଁ। ଏଠାକାର ବିକାଶ କରାଗଲେ ଅଞ୍ଚଳବାସୀଙ୍କ ସମେତ ଜିଲାବାସୀ ବେଶ ଉପକୃତ ହେବେ ବୋଲି ମତପ୍ରକାଶ ପାଇଛି।
