ଭୁବନେଶ୍ୱର,୧୦ା୬(ବ୍ୟୁରୋ): ପର୍ଯ୍ୟଟନ, ଡାଉନ୍ଷ୍ଟ୍ରିମ ଷ୍ଟିଲ୍ ଇତ୍ୟାଦି କ୍ଷେତ୍ରରେ ହେବାକୁ ଥିବା ୨୦୮୨.୧୭ କୋଟି ଟଙ୍କାର ୧୧ ପ୍ରକଳ୍ପକୁ ରାଜ୍ୟ ସରକାର ଅନୁମୋଦନ କରିଛନ୍ତି। ଏହି ଶିଳ୍ପ ପ୍ରକଳ୍ପ କାର୍ଯ୍ୟକାରୀ ହେଲେ ରାଜ୍ୟରେ ୩୬୧୨ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ଗୁରୁବାର ଲୋକସେବା ଭବନଠାରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟସ୍ତରୀୟ ସିଙ୍ଗଲଓ୍ବିଣ୍ଡୋ କ୍ଲିୟରାନ୍ସ ଅଥରିଟି (ଏସ୍ଏଲ୍ଏସ୍ଡବ୍ଲ୍ୟୁସିଏ) ବୈଠକରେ ଉକ୍ତ ପ୍ରକଳ୍ପଗୁଡ଼ିକୁ ଅନୁମୋଦନ କରାଯାଇଛି। ମିଳିଥିବା ସୂଚନା ଅନୁଯାୟୀ ନାଲ୍କୋ କୋରାପୁଟ ଜିଲାରେ ୭୩୨ କୋଟି ଟଙ୍କା ପୁଞ୍ଜନିବେଶରେ ଆଲୁମିନିୟମ ପ୍ରକଳ୍ପ ସ୍ଥାପନ କରିବ। ଏଥିରେ ୨୨୯ ଜଣଙ୍କୁ ନିଯୁକ୍ତି ମିଳିପାରିବ। ସେହିପରି କୋଣାର୍କ ଇସ୍ପାତ ଝାରସୁଗୁଡ଼ାଠାରେ ୩୭୯ କୋଟି ଟଙ୍କା ବ୍ୟୟରେ ଏକ ଇସ୍ପାତ କାରଖାନା ସ୍ଥାପନ କରିବ। ଏଥିରେ ୧୧୫୬ ଜଣଙ୍କୁ ନିଯୁକ୍ତି ମିଳିବା ବେଳେ ଏଏସ୍ଏଲ୍ ଏଣ୍ଟରପ୍ରାଇଜର୍ସ ଲିମିଟେଡ ଯାଜପୁର ଜିଲା କଳିଙ୍ଗନଗରଠାରେ ୧୬୭ କୋଟି ଟଙ୍କା ପୁଞ୍ଜିନିବେଶରେ ୫ଲକ୍ଷ ନିୟୁତ ଟନ୍ର ରେବାର ମିଲ୍ ସ୍ଥାପନ କରିବ । ଏଥିରେ ୫୦୦ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ସେହିପରି ପିଏସ୍ପିଏଲ୍ ପ୍ରୋସେସର୍ସ ଲିମିଟେଡ ଯାଜପୁର ଜିଲାର କଳିଙ୍ଗନଗରଠାରେ ୧୫୦ କୋଟି ଟଙ୍କା ବିନିଯୋଗରେ ଡାଉନ୍ଷ୍ଟ୍ରିମ ଷ୍ଟିଲ୍ ପ୍ଲାଣ୍ଟ ସ୍ଥାପନ କରିବ। ଏଥିରେ ୩୧୦ ଜଣଙ୍କୁ ନିଯୁକ୍ତି ମିଳିପାରିବ। ଖେତାନ ଭିନିୟୋଗ ଲିମିଟେଡ ଯାଜପୁର ଜିଲାର କଳିଙ୍ଗନଗରଠାରେ ଏକ ଡାଉନ୍ଷ୍ଟ୍ରିମ ଷ୍ଟିଲ୍ ପ୍ଲାଣ୍ଟ ସ୍ଥାପନ କରିବ। ଏଥିରେ ୨୩୮ ଜଣଙ୍କୁ ନିଯୁକ୍ତି ମିଳିପାରିବ। ଖୋର୍ଦ୍ଧା ଇନ୍ଫୋସିଟି ଶିଳ୍ପାଞ୍ଚଳରେ ସିଟିଆରଏଲ୍ଏସ୍ ଡାଟାସେଣ୍ଟର ଲିମିଟେଡ ୧୫୨.୨୫ କୋଟି ଟଙ୍କା ବ୍ୟୟରେ ଆଇଟି ଆଣ୍ଡ ଇଏସ୍ଡିଏମ୍ ସ୍ଥାପନ କରିବ। ଏଥିରେ ୧୧୦ ଜଣଙ୍କୁ ନିଯୁକ୍ତି ମିଳିପାରିବ। ସୁନ୍ଦରଗଡ଼ ଶିଳ୍ପାଞ୍ଚଳରେ ଆଇଏଫ୍ଜିଏଲ ରେଫ୍ରାକ୍ଟୋରିଜ ଲିମିଟେଡ ପକ୍ଷରୁ ୬୬.୨୭ କୋଟି ଟଙ୍କା ବ୍ୟୟରେ ୧୪, ୭୦୦ ମେଟ୍ରିକ ଟନ୍ର ମନୋଲିଥିକ୍ସ ଆଣ୍ଡ ସ୍ଥାଇଡ ଗେଷ୍ଟ ଫାସିଲିଟି କରାଯିବ। ଏଥିରେ ୪୧୦ ଜଣଙ୍କୁ ନିଯୁକ୍ତି ମିଳିପାରିବ। ସେହିପରି ଓଡିଆନା ଇକୋ ରିସର୍ଟ ପ୍ରାଇଭେଟ ଲିମିଟେଡ ୧୨୮ କୋଟି ଟଙ୍କା ବ୍ୟୟରେ ପୁରୀ ମେରାଇନ ଡ୍ରାଇଭରେ ଲକ୍ ହୋଟେଲ କମ୍ ରିସର୍ଟ ନିର୍ମାଣ କରିବ। ଏଥିରେ ୨୬୪ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ପୁରୀ ଜିଲା କୋଣାର୍କଠାରେ ଲାଇଫ୍ଲାଇନ ମଲ୍ଟିଭେଞ୍ଚର୍ସ ପକ୍ଷରୁ ୧୦୦ କୋଟି ଟଙ୍କା ବ୍ୟୟରେ ଏକ ହୋଟେଲ ନିର୍ମାଣ କରାଯିବ। ଏଥିରେ ୨୬୬ ଜଣଙ୍କୁ ନିଯୁକ୍ତି ସୁଯୋଗ ମିିଳିପାରିବ। ଖୋର୍ଦ୍ଧାଠାରେ ହୋଟେଲ ସୁଖମାୟ ପ୍ରାଇଭେଟ ଲିମିଟେଡ ପକ୍ଷରୁ ୮୮.୦୯ କୋଟି ଟଙ୍କା ବ୍ୟୟରେ ଏକ ହୋଟେଲ ନିର୍ମାଣ ହେବ। ଏଥିରେ ୬୦ ଜଣଙ୍କୁ ନିଯୁକ୍ତି ମିଳିପାରିବ। ସେହିପରି ଆସପେନ ଲେକ ସଲ୍ଟସ ଖୋର୍ଦ୍ଧା ଜିଲା ବରକୁଳଠାରେ ୬୯.୨୩ କୋଟି ଟଙ୍କା ବ୍ୟୟରେ ଏକ ୫ ତାରକା ରିସର୍ଟ ନିର୍ମାଣ କରିବ। ଏଥିରେ ୬୦ ଜଣଙ୍କୁ ନିଯୁକ୍ତି ମିଳିପାରିବ। ଅନୁମୋଦିତ ପ୍ରକଳ୍ପଗୁଡ଼ିକ କିପରି ଶୀଘ୍ର କାର୍ଯ୍ୟକ୍ଷମ ହେବ ସେ ନେଇ ଇପିକଲ ଓ ବିଭିନ୍ନ ବିଭାଗକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ଏହି ବୈଠକରେ ଉନ୍ନୟନ କମିଶନର ପ୍ରଦୀପ କୁମାର ଜେନା, ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଅତିରିିକ୍ତ ମୁଖ୍ୟ ଶାସନ ସଚିବ ମୋନା ଶର୍ମା, ଜଳ ସମ୍ପଦ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଅନୁଗର୍ଗ, ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ, ଶିଳ୍ପ ସଚିବ ହେମନ୍ତ ଶର୍ମା, ଶକ୍ତି ସଚିବ ନିକୁଞ୍ଜ ବିହାରୀ ଧଳ, ଇସ୍ପାତ ଓ ଖଣି ସଚିବ ଦେଓରଞ୍ଜନ କୁମାର ସିଂ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ ସଚିବ ଅଶୋକ କୁମାର ମୀନା, ଇପିକଲ ଏମ୍ଡି ଭୂପେନ୍ଦ୍ର ସିଂ ପୁନିଆ ଓ ଅନ୍ୟ ବରିଷ୍ଠ ଅଧିକାରୀ ଯୋଗ ଦେଇଥିଲେ।
