ମୁମ୍ବାଇ,୩।୮: ସମଗ୍ର ଦେଶରେ ସୋମବାର ପବିତ୍ର ରକ୍ଷାବନ୍ଧନ ପାଳିତ ହେଉଛି। ଭାଇଭଉଣୀଙ୍କ ପବିତ୍ର ବନ୍ଧନକୁ ଦର୍ଶାଉଥିବା ରାକ୍ଷୀ ସବୁ ପର୍ବଠାରୁ ଅନ୍ୟତମ। ବର୍ଷକୁ ଥରେ ଭଉଣୀମାନେ ଭାଇଙ୍କ ହାତରେ ରାକ୍ଷୀ ବାନ୍ଧିବାକୁ ଅନେଇ ବସିଥାନ୍ତି। ଆଉ ଭାଇମାନେ ସାରା ଜୀବନ ତାଙ୍କର ରକ୍ଷା କରିବେ ବୋଲି ପ୍ରତିଶ୍ରୁତି ଦେଇଥାନ୍ତି। ହେଲେ ଚଳିତବର୍ଷ କରୋନା ଯୋଗୁ ପ୍ରାୟ ସ୍ଥାନରେ ଏହା ସମ୍ଭବପର ହୋଇପାରିନାହିଁ। ଇତିମଧ୍ୟରେ ରକ୍ଷାବନ୍ଧନ ଅବସରରେ ସୁରସାମ୍ରାଜ୍ଞୀ ଲତା ମଙ୍ଗେସକର ମଧ୍ୟ ପ୍ରଧାନମନ୍ତ୍ରୀଙ୍କୁ ଏକ ସ୍ବତନ୍ତ୍ର ବାର୍ତ୍ତା ପଠାଇଛନ୍ତି। ଚଳିତ ବର୍ଷ ଭାଇ ମୋଦିଙ୍କ ନିକଟକୁ ରାକ୍ଷୀ ପଠାଇ ପାରି ନ ଥିବାରୁ ଲତା ଦିଦି ତାଙ୍କ ପାଇଁ ଏକ ଭିଡିଓ ବାର୍ତ୍ତା ପଠାଇଛନ୍ତି। ତେବେ ତାଙ୍କର ଏହି ବାର୍ତ୍ତାର ଜବାବ ରଖିଛନ୍ତି ମୋଦି। ସୂଚନାଯୋଗ୍ୟ, ଲତା ଦିଦି ଭିଡିଓ ଶେୟାର କରି କ୍ୟାପଶନ୍ରେ ଲେଖିଛନ୍ତି, ପବିତ୍ର ରାକ୍ଷୀ ଅବସରରେ ଭାଇ ମୋଦିଙ୍କୁ ଅଭିବାଦନ ଜଣାଉଛି। ଚଳିତ ବର୍ଷ କରୋନା ଯୋଗୁ ରାକ୍ଷୀ ପଠାଇ ପାରିନାହିଁ। ଦେଶ ପାଇଁ ମୋଦିଙ୍କ ଅତୁଳନୀୟ ଅବଦାନ ରହିଛି, ଯାହା ସମଗ୍ର ଦେଶବାସୀ କେବେ ଭୁଲିପାରିବେ ନାହିଁ। ଆଜିକା ଦିନରେ ଭାରତ ସମସ୍ତ ମହିଳା ଆପଣଙ୍କ ହାତରେ ରାକ୍ଷୀ ବାନ୍ଧିବାକୁ ଚାହୁଁଥିବେ, ହେଲେ ଦେଶରେ ବର୍ତ୍ତମାନ ଜାରି ରହିଥିବା ସଙ୍କଟ ଯୋଗୁ ଏହା ସମ୍ଭବପର ନୁହେଁ। କିନ୍ତୁ ଯଦି ସମ୍ଭବ, ରାକ୍ଷୀ ଅବସରରେ ଆମକୁ ପ୍ରତିଜ୍ଞା କର ଯେ, ଦେଶକୁ ଆପଣ ସୁଉଚ୍ଚକୁ ନେବେ। ଅନ୍ୟପଟେ ମୋଦି ମଧ୍ୟ ତାଙ୍କର ଏହି ବାର୍ତ୍ତାରେ ଜବାବ ରଖି କହିଛନ୍ତି, ରକ୍ଷାବନ୍ଧନ ଅବସରରେ ତୁମର ଏହି ଭାବପୂର୍ଣ୍ଣ ବାର୍ତ୍ତା ପ୍ରେରଣା ଦେବା ସହ ଶକ୍ତି ମଧ୍ୟ ଯୋଗାଇବ। କୋଟି କୋଟି ମା’ ଓ ଭଉଣୀମାନଙ୍କ ଆଶୀର୍ବାଦ ସହିତ ଦେଶ ଉଚ୍ଚତାକୁ ଛୁଇଁବ ଓ ନୂତନ ସଫଳତା ହାସଲ କରିବ। ଏଥିସହ ମୋଦି ଲତା ଦିଦିଙ୍କ ସୁସ୍ଥ ଓ ଦୀର୍ଘାୟୁ ପାଇଁ କାମନା କରିଛନ୍ତି।
