ତାଳଚେର,୬ା୩ (ନି.ପ୍ର.)
ମାର୍ଚ୍ଚ ୩୧ ତାରିଖ ପରେ ତାଳଚେର ଥର୍ମାଲ ପାଓ୍ବାର ଷ୍ଟେଶନ (ଟିଟିପିଏସ୍) ଚଳାଇବାକୁ ଏନ୍ଟିପିସି କର୍ତ୍ତୃପକ୍ଷଙ୍କ ନିକଟରେ ଆବଶ୍ୟକ ଅନୁମତି ନାହିଁ। ଏ ଦିଗରେ ଏନ୍ଟିପିସି କର୍ତ୍ତୃପକ୍ଷ ଏଯାଏ ନୀରବ ରହିଥିବାରୁ ଏହି ପ୍ଲାଣ୍ଟ ବନ୍ଦ ହୋଇଯିବା ନେଇ ଆଶଙ୍କା ପ୍ରକାଶ ପାଇଛି। ଫଳରେ ଟିଟିପିଏସ୍ କର୍ମଚାରୀ, ଶ୍ରମିକମାନଙ୍କ ମଧ୍ୟରେ ହତାଶାଭାବ ଦେଖାଦେଇଛି। ପ୍ଲାଣ୍ଟ ଚାଲୁ ରଖିବା ଓ ଫେଜ-୩ରେ ୧୩୨୦ ମେଗାଓ୍ବାଟ୍ ଉତ୍ପାଦନ କ୍ଷମତା ବିଶିଷ୍ଟ ୨ଟି ୟୁନିଟ୍ ସ୍ଥାପନ ଦାବିରେ ଗତ ୧୩ ଦିନ ହେଲା ସର୍ବଦଳୀୟ କ୍ରିୟାନୁଷ୍ଠାନ କମିଟି ପକ୍ଷରୁ ପ୍ଲାଣ୍ଟ ମୁଖ୍ୟ ଫାଟକ ସମ୍ମୁଖରେ ଶ୍ରମିକମାନେ ଗଣଧାରଣା ଦେଇଥିଲେ ମଧ୍ୟ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ଆଶ୍ୱାସନା ଦିଆଯାଉ ନାହିଁ। ଏପରି କି ପ୍ରଶାସନ,ଏନ୍ଟିପିସି ଅଧିକାରୀମାନେ ଆନ୍ଦୋଳନକାରୀଙ୍କ ସହିତ ଆଲୋଚନା କରିବା ତ ଦୂରର କଥା, ଆନ୍ଦୋଳନସ୍ଥଳକୁ ଯାଇ ସମବେଦନା ଜଣାଉ ନାହାନ୍ତି। ଏହାକୁ ନେଇ ଶ୍ରମିକ ମହଲରେ ତୀବ୍ର ପ୍ରତିକ୍ରିୟା ଦେଖାଦେଇଛି।
କେନ୍ଦ୍ର-ରାଜ୍ୟ ମଧ୍ୟରେ ସମନ୍ବୟ ଅଭାବ
ଏନ୍ଟିପିସର ଅବହେଳା, କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ସମନ୍ବୟ ଅଭାବ ଟିଟିପିଏସ୍ ବନ୍ଦ ହେବାକୁ ଯିବାର ପ୍ରମୁଖ କାରଣ। ଏହାଦ୍ୱାରା ବହୁ ସଂଖ୍ୟକ ଠିକାଶ୍ରମିକଙ୍କ ପେଟ ପାଟଣା ଚାଲିଯିବ। ତାଳଚେରର ଅର୍ଥନୀତି ପ୍ରଭାବିତ ହେବ।
-ସମର ସାହୁ, ସମ୍ପାଦକ, ଏନ୍ଟିପିସି ପାୱାର ୱାର୍କର୍ସ ୟୁନିୟନ
ଦୁର୍ବଳ ରାଜନୀତି ଦାୟୀ
ଏନ୍ଟିପିସି ପରିଚାଳନାରେ ୪ ହଜାର କୋଟି ଟଙ୍କା ଲାଭ କରିଥିବା ଏହି ପ୍ଲାଣ୍ଟ ବନ୍ଦ ହେଲେ ତାଳଚେର ଶିଳ୍ପାଞ୍ଚଳ କରିଡର ବାଧାପ୍ରାପ୍ତ ହେବ। ଏହା ବନ୍ଦ ହେବାକୁ ଯାଉଥିବା ପଛରେ ଦୁର୍ବଳ ରାଜନୀତି ଦାୟୀ। ପ୍ଲାଣ୍ଟ କର୍ତ୍ତୃପକ୍ଷ ଆଗ୍ରହ ପ୍ରକାଶ କଲେ ଟିଟିପିଏସ୍ ଚାଲୁ ରହିପାରିବ।
-ଅରବିନ୍ଦ ମିଶ୍ର, ସାଧାରଣ ସମ୍ପାଦକ, ଆଇଏନ୍ଟିୟୁସି
ଶ୍ରମିକଙ୍କ ଜୀବନ ସହ ଖେଳ
୨୨ବର୍ଷ କାମ କରିବା ପରେ ଏବେ ଆମ ଦାନାପାଣି ଚାଲିଯିବ। ଏଭଳି ସମସ୍ୟା ସମ୍ପର୍କରେ ଏନ୍ଟିପିସି, କେନ୍ଦ୍ର ସରକାର, ରାଜ୍ୟ ସରକାର ଓ ସ୍ଥାନୀୟ ନେତାମାନେ କ’ଣ ଜାଣି ନ ଥିଲେ। ଜାଣିଶୁଣି ଶ୍ରମିକଙ୍କ ଜୀବନ ସହ ଖେଳ ଖେଳାଯାଉଛି।
-ଜିତେନ୍ଦ୍ର ବେହେରା,ଶ୍ରମିକ
ଏଫ୍ସିଆଇ ଭଳି ପରିସ୍ଥିତି ହେବ
ଖୁବ୍ କମ ଦରମାରେ କାମ କରୁଥିଲୁ। ଏବେ ଚାକିରି ଯିବ। ଏନ୍ଟିପିସିର ଅବହେଳା ଯୋଗୁ ଏହି ପରିସ୍ଥିତି ସୃଷ୍ଟି ହୋଇଛି। ତାଳଚେର ସାର କାରଖାନା ପରି ଟିଟିପିଏସ୍ କ୍ଷେତ୍ରରେ ମଧ୍ୟ ସମାନ ପରିସ୍ଥିତି ହେବାକୁ ଯାଉଛି।
-ମାତୃକା ପ୍ରସାଦ ରଥ, ଶ୍ରମିକ
ରାଜନୀତି ପାଇଁ ବଳିପଡ଼ିବ ଟିଟିପିଏସ୍
୧୩ ଦିନ ହେଲା ଆମେ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ ଚଳାଇଛୁ। ପ୍ରଶାସନିକ ଅଧିକାରୀ, ଏନ୍ଟିପିସି କର୍ତ୍ତୃପକ୍ଷଙ୍କ ଦେଖାନାହିଁ। ଏନ୍ଟିପିସି ଭିତରେ ଭିତରେ ବଡ଼ ଚକ୍ରାନ୍ତ ଚାଳାଇଛି। କେନ୍ଦ୍ର ଓ ରାଜ୍ୟ ରାଜନୀତିର ପଶାପାଲିରେ ଟିଟିପିଏସ୍ ବଳି ପଡ଼ିବାକୁ ଯାଉଛି।
-ନୀର୍ମଳ ସେଠୀ, ଶ୍ରମିକ