ପୁରୀ ଅଫିସ,୨।୧୧: ଗୋବର୍ଦ୍ଧନ ପୀଠର ଶଙ୍କରାଚାର୍ଯ୍ୟ ଭାବେ ସ୍ବାମୀ ଅଧୋକ୍ଷଜାନନ୍ଦ ନିଜକୁ ପରିଚୟ ଦେବା ପରେ ନୂଆ ବିବାଦ ଉପୁଜିଛି। ଉତ୍ତର ପ୍ରଦେଶର ମଥୁରାରେ ଆୟୋଜିତ ଏକ କାର୍ଯ୍ୟକ୍ରମରେ ସ୍ବାମୀ ଅଧୋକ୍ଷଜାନନ୍ଦ ଯୋଗଦେଇଥିଲେ। ସେଠାରେ ତାଙ୍କୁ ନେତା ଏବଂ ଅନେକ ବଡ଼ବଡ଼ିଆ ପୁରୀ ଶଙ୍କରାଚାର୍ଯ୍ୟ କହି ସ୍ବାଗତ କରିଥିଲେ। ତେବେ ଏହାକୁ ନେଇ ପୁରୀ ଗୋବର୍ଦ୍ଧନ ପୀଠର ଶଙ୍କରାଚାର୍ଯ୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀ ଖପ୍ପା ହୋଇପଡ଼ିଛନ୍ତି। ଏଥିପାଇଁ ସେ ଉତ୍ତରପ୍ରଦେଶ ଓ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି। ତାଙ୍କ ନୀରବତାକୁ ଦୁର୍ବଳତା ନ ଭାବିବାକୁ ସେ ଚେତାଇ ଦେଇଛନ୍ତି। ନକଲି ଶଙ୍କରାଚାର୍ଯ୍ୟଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କୁ ସ୍ବାମୀ ନିଶ୍ଚଳାନନ୍ଦ ସରସ୍ବତୀ ଚିଠି ଲେଖିଛନ୍ତି। ସେ ନିଜ ପ୍ରତିକ୍ରିୟାରେ କହିଛନ୍ତି, ଏଥିପାଇଁ ତାଙ୍କୁ ଅପହରଣ ଓ ହତ୍ୟା ଷଡ଼ଯନ୍ତ୍ର କରାଯାଇଛି। ଅନେକ ଥର ଆକ୍ରମଣ ଉଦ୍ୟମ ମଧ୍ୟ ହୋଇଛି। ଏହାସତ୍ତ୍ବେ ସେ ନୀରବ ରହିଛନ୍ତି। କାରଣ ତାଙ୍କ ପଦର ସ୍ବତନ୍ତ୍ରତା ରହିଛି। ତାଙ୍କର ଏହି ନୀରବତାକୁ ସରକାର ଦୁର୍ବଳତା ବୋଲି ଭାବନ୍ତୁ ନାହିଁ। ଭାରତର ଧର୍ମଗୁରୁ ହେଉଛନ୍ତି ଶଙ୍କରାଚାର୍ଯ୍ୟ। ତାଙ୍କ ପ୍ରତି ଅବମାନନା ଓ ଅପମାନ କଦାପି ଗ୍ରହଣୀୟ ନୁହେଁ। ତେଣୁ ନକଲି ଶଙ୍କରାଚାର୍ଯ୍ୟଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରି ସେ କେନ୍ଦ୍ର ଓ ରାଜ୍ୟ ସରକାରଙ୍କୁ ଚିଠି ଲେଖିଛନ୍ତି। ନିଜର ଭୁଲ ପରିଚୟ ଦେଇ ଅରାଜକତା ସୃଷ୍ଟି କରିବା ଗ୍ରହଣୀୟ ନୁହେଁ। ଧର୍ମ ନଁାରେ ଏପରି ଅରାଜକତାକୁ ପ୍ରଶୟ ଦେବା ଦେଶର ଅସ୍ତିତ୍ୱ ଓ ଆଦର୍ଶ ପାଇଁ ଘାତକ। ତେଣୁ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବା ନିହାତି ଆବଶ୍ୟକ। ଧର୍ମଗୁରୁ ଓ ଧର୍ମୀୟ ପୀଠ ଆଉ ସୁରକ୍ଷିତ ନୁହେଁ ବୋଲି ସେ କ୍ଷୋଭର ସହ କହିଛନ୍ତି।
