ବ୍ରହ୍ମପୁର ଅଫିସ,୧୯ା୮: ଗଣେଶ ପୂଜା ଆସନ୍ତା ୨୨ ତାରିଖରେ ଅନୁଷ୍ଠିତ ହେବାକୁ ଥିବା ବେଳେ କରୋନା କଟକଣା ଯୋଗୁ ସର୍ବସାଧାରଣଙ୍କ ପାଇଁ ଦର୍ଶନ ପାଇଁ ବନ୍ଦ ରହିବ। ସ୍ଥାନୀୟ ହିଲପାଟଣାସ୍ଥିତ ଶ୍ରୀ ଶ୍ରୀ ଶ୍ରୀ ସିଦ୍ଧିବିନାୟକ ପୀଠରେ ଗଣେଶ ପୂଜା ବେଳେ ଦୂରଦୂରାନ୍ତରୁ ହଜାର ହଜାର ଭକ୍ତଙ୍କ ସମାଗମ ହୋଇଥାଏ। ସେହିଭଳି ଜିଲାରେ ଥିବା ବିଭନ୍ନ ଗଣେଶ ପୀଠ ସମେତ ସ୍କୁଲ ଓ କଲେଜ ଓ ସାହି ଗଳିକନ୍ଦିରେ ଅନୁଷ୍ଠିତ ଗଜାନନଙ୍କ ମୃଣ୍ମୟ ମୂର୍ତ୍ତି ସ୍ଥାପନ ହୋଇଥିବା ପୀଠଗୁଡ଼ିକରେ ଲୋକମାନେ ଏକାଠି ହେବା ସହ ସଂକ୍ରମଣ ବଢ଼ିବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ଚଳିତବର୍ଷ ଗଣେଶ ପୂଜା ପାଳନ ହେବ ନାହିଁ ବୋଲି ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ସୂଚନା ଦେଇଛନ୍ତି। ଗତ ମାର୍ଚ୍ଚ ୧୦ ତାରିଖରୁ ଜିଲାରେ କରୋନା କଟକଣା ଆରମ୍ଭ ହୋଇଛି।
ସୂଚନାଯୋଗ୍ୟ, କରୋନା ଯୋଗୁ ତାରାତାରିଣୀଙ୍କ ଚୈତ୍ର ଯାତ୍ରା, ଭଞ୍ଜନଗର, କବିସୂର୍ଯ୍ୟନଗର ଓ ଛତ୍ରପୁର ଠାକୁରାଣୀ ଯାତ୍ରା ଓ ଗଞ୍ଜାମର ପ୍ରସିଦ୍ଧ ଦଣ୍ଡ ଯାତ୍ରା, ରଜପର୍ବ ଆଦି ବନ୍ଦ କରାଯାଇଥିଲା। ହିଲପାଟଣା ସିଦ୍ଧିବିନାୟକ ପୀଠରେ କେବଳ ପୂଜକଙ୍କ ଜରିଆରେ ଗଜାନନଙ୍କ ସମସ୍ତ ପୂଜା, ନୀତି-କାନ୍ତି ସମ୍ପାଦନ କରାଯିବ ବୋଲି ମନ୍ଦିର ପରିଚାଳନା କମିଟି ସଭାପତି ସୁରେନ୍ଦ୍ର ନାଥ ଚୌଧୁରୀ ସୂଚନା ଦେଇଛନ୍ତି।
