ଦିଗପହଣ୍ଡି,୨୦।୪(ଅଶେଷ ନାଥ ମିଶ୍ର) ଗଞ୍ଜାମ ଜିଲା ଦିଗପହଣ୍ଡି ବ୍ଳକ ସିଦ୍ଧେଶ୍ୱର ଗ୍ରାମ ରଘୁନାଥ ମନ୍ଦିର ନିକଟରେ ନବ ନିର୍ମିତ କଲ୍ୟାଣ ମଣ୍ଡପ ଦଖଲକୁ ନେଇ ଦୀର୍ଘ ବର୍ଷ ହେଲା ବାଦବିବାଦ ଲାଗି ରହିଥିଲା । ସୋମବାର ଦିଗପହଣ୍ଡି ପୋଲିସ ଟିମ ଉପସ୍ଥିତିରେ ବ୍ଲକ ପ୍ରଶାସନ ଉକ୍ତ କଲ୍ୟାଣ ମଣ୍ଡପକୁ ଦଖଲ କରିବା ସହ ଗେଟ ଚାବି ପଞ୍ଚାୟତ କାର୍ଯ୍ୟାଳୟକୁ ହସ୍ତାନ୍ତର କରାଯାଇଥିବା ଜଣାପଡିଛି । ୩୫ ଲକ୍ଷ ଟଙ୍କା ବ୍ୟୟରେ ଏହି କଲ୍ୟାଣ ମଣ୍ଡପର ନିର୍ମାଣ କାର୍ଯ୍ୟ ଦୀର୍ଘ ୪ ବର୍ଷ ହେଲା ସମ୍ପୂର୍ଣ୍ଣ ହୋଇଥିଲେ ମଧ୍ୟ ସରପଞ୍ଚ ବିଜୟ ପ୍ରଧାନଙ୍କ ବିପକ୍ଷ ଗୋଷ୍ଠୀର ଜଣେ ଠିକାଦାର ଏହାକୁ ପଞ୍ଚାୟତକୁ ହସ୍ତାନ୍ତର କରିନଥିଲେ । ଏନେଇ ପଞ୍ଚାୟତ ପକ୍ଷରୁ ବାରମ୍ବାର ଗଞ୍ଜାମ ଜିଲା ଓ ବ୍ଳକ ପ୍ରଶାସନ ନିକଟରେ ଅଭିଯୋଗ କରାଯାଇଥିଲା । ଯାହାକୁ ନେଇ ପ୍ରଶାସନ ମଧ୍ୟ କଲ୍ୟାଣ ମଣ୍ଡପକୁ ପଞ୍ଚାୟତକୁ ହସ୍ତାନ୍ତର କରିବାକୁ ଠିକାଦାର ଜଣକୁ ବାରମ୍ବାର ନୋଟିସ କରିଥିଲେ ମଧ୍ୟ ପ୍ରଶାସନିକ ନିର୍ଦ୍ଦେଶକୁ ଖାତିର ନ କରି ସେ ବେଆଇନ ଭାବେ ସେଠାରେ ଭୋଜି ପାଇଁ ଲୋକଙ୍କୁ ଭଡ଼ା ଦେଇ ଟଙ୍କା ଆଦାୟ କରୁଥିବା ନେଇ ଗତ ପଞ୍ଚାୟତସ୍ତରୀୟ ଜନ ଅଭିଯୋଗ ଶୁଣାଣୀରେ ପଞ୍ଚାୟତ ପକ୍ଷରୁ ଦାବିପତ୍ର ପ୍ରଦାନ କରାଯାଇଥିଲା । ଏନେଇ ବ୍ରହ୍ମପୁର ଉପଜିଲାପାଳ ଅବିନାଶ କୁମାର ବ୍ଳକ ପ୍ରଶାସନକୁ ଏକ ଚିଠି କରିଥିଲେ । ଏହାପରେ ବ୍ଳକ ପ୍ରଶାସନ ମଧ୍ୟ ଉକ୍ତ ଠିକାଦାରକୁ ନୋଟିସ କରି ଚାବି ହସ୍ତାନ୍ତର କରିବାକୁ କହିଥିଲେ । ଶେଷରେ ସେ ନଶୁଣିବାରୁ ସୋମବାର ଅପରାହ୍ନରେ ଦିଗପହଣ୍ଡି ଏକଜିକ୍ୟୁଟିଭ ମାଜିଷ୍ଟ୍ରେଟ ତଥା ତହସିଲଦାର ସନ୍ତୋଷ କୁମାର ସାହୁ , ବିଡ଼ିଓ ଅନାମିକା ପାଣ୍ଡେ , ଅତିରିକ୍ତ ବିଡ଼ିଓ ଉମେଶ କୁମାର ସେଠୀ , ଦିଗପହଣ୍ଡି ଥାନା ଆଇଆଇସି କିଶୋର କୁମାର ସାମଲ , ରାଜସ୍ବ ନୀରିକ୍ଷୀକା ସରସତୀ କହଁର , ପଞ୍ଚାୟତ ନିର୍ବାହୀ ଅଧିକାରୀ ଅକ୍ଷୟ କୁମାର ଦାସ , ସ୍ଥାନୀୟ ସରପଞ୍ଚ ବିଜୟ କୁମାର ପ୍ରଧାନଙ୍କ ଉପସ୍ଥିତିରେ କଲ୍ୟାଣ ମଣ୍ଡପ କୁ ଦଖଲ କରାଯାଇଥିଲା। ପରେ କଲ୍ୟାଣ ମଣ୍ଡପ ଗେଟ ଚାବିକୁ ପଞ୍ଚାୟତ କାର୍ଯ୍ୟାଳୟକୁ ହସ୍ତାନ୍ତର କରାଯାଇଥିଲା ।