ନବରଙ୍ଗପୁର,୨୦।୧୧(ସଦାଶିବ ପ୍ରହରାଜ): ନବରଙ୍ଗପୁର ଜିଲା ଜଳଣି ମାତା ହାଇସ୍କୁଲରେ ବିଭିନ୍ନ ଅନିୟମିତତା ଓ କର୍ମଚାରୀଙ୍କ ଅବହେଳା, ଛାତ୍ରୀଛାତ୍ର ଉପସ୍ଥାପନ ବ୍ୟତିକ୍ରମ ଓ ମଧ୍ୟାହ୍ନ ଭୋଜନରେ ମେନ୍ୟୁ ପରିବର୍ତ୍ତନ କରିବା ଭଳି ଘଟଣାରେ ପ୍ରଧାନ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ ସହିତ ବିଦ୍ୟାଳୟ ସମସ୍ତ କର୍ମଚାରୀଙ୍କ ଦିନକ ଦରମା ବନ୍ଦ କରାଯାଇଛି ।
ଜିଲା ଶିକ୍ଷା ଅଧିକାରୀ ଛତ୍ରପତି ସାହୁ ସାନମସି ଗାଁ ଜଳଣି ମାତା ହାଇସ୍କୁଲକୁ ୧୭ତାରିଖ ଦିନ ପରିଦର୍ଶନରେ ଜିଲା ବିଜ୍ଞାନ ନିରୀକ୍ଷକ ଚିତ୍ତ ରଞ୍ଜନ ପଟ୍ଟନାୟକଙ୍କ ସହିତ ଯାଇଥିଲେ । ସ୍କୁଲ ପରିସର, ବିଶେଷକରି କ୍ଲାସ ରୁମ ଗୁଡିକର ପରିବେଶ କଦର୍ଯ୍ୟକର ଦେଖି ଜିଲାଶିକ୍ଷା ଅଧିକାରୀ ପ୍ରଧାନ ଶିକ୍ଷକ, ସହାୟକ ଶିକ୍ଷକ ଓ କର୍ମଚାରୀଙ୍କ ଉପରେ ବିରକ୍ତ ଭାବ ପ୍ରକାଶ କରିଥିଲେ । ଶେଷରେ ବିଦ୍ୟାଳୟ କର୍ତ୍ତୃପକ୍ଷ ଓ କର୍ମଚାରୀଙ୍କ କୌଣସି ପ୍ରତିକ୍ରିୟା ଦେଖିବାକୁ ମିଳି ନ ଥିଲା । ଏ ନେଇ ଜିଲା ଶିକ୍ଷା ଅଧିକାରୀ ଛତ୍ରପତି ସାହୁ ଝାଡୁ ଧରି ଅଳନ୍ଧୁ ଓ ବୁଢିଆଣୀ ଜାଲ ସଫାକରିଥିଲେ। ଶିକ୍ଷକ ଓ କର୍ମଚାରୀ ଦେଖୁଥିଲେ ମଧ୍ୟ ସେମାନେ ନୀରବ ରହିଥିଲେ। ପରେ ଜିଲା ଶିକ୍ଷା ଅଧିକାରୀ ମଧ୍ୟାହ୍ନ ଭୋଜନ କାର୍ଯ୍ୟକ୍ରମ ଦେଖିଥିଲେ। ମେନ୍ୟୁରେ ଅଣ୍ଡା ତରକାରି ଥିବା ବେଳେ ଡାଲମା ଭାତ ଛାତ୍ରୀଛାତ୍ରଙ୍କୁ ଦିଆଯାଇଥିଲା । ତାହା ମଧ୍ୟ ଅତିନିମ୍ନ ମାନର। ଅଣ୍ଡା ପରିବର୍ତ୍ତେ କଦଳୀ ଦେବା ପାଇଁ କଦଳୀ ଅଣା ଯାଇଥିଲା । ତାହା ବିଦ୍ୟାଳୟ କାର୍ଯ୍ୟଳୟରେ ରଖା ଯାଇଥିଲା । ସେଗୁଡିକ କଳା ପଡିଯାଇଥିଲା । ବିଦ୍ୟାଳୟରେ ତିନି ଜଣ ଗ୍ରୁପଡି କର୍ମଚାରୀ (ଦୁଇଜଣ ପିଅନ ଓ ଗୋଟିଏ ରାତ୍ର ଜଗୁଆଳି ତଥା ଝାଡୁଦାର ) ଉପସ୍ଥିତ ଥିବା ସତ୍ୱେ ମଧ୍ୟ ବିଦ୍ୟାଳୟ ପରିସର ଅତ୍ୟନ୍ତ ଅବହେଳିତ ରହିଥିଲା । ଯାହା ଅବହେଳା ଓ ଦାୟିତ୍ୱହୀନତାକୁ ପ୍ରକାଶ କରେ ବୋଲି ଜିଲା ଶିକ୍ଷା ଅଧିକାରୀ ସାହୁ ଚିଠିରେ ଜଣାଇଛନ୍ତି । ଛାତ୍ରୀଛାତ୍ରଙ୍କ ସହ ଆଲୋଚନାରେ ଜାଣିବାକୁ ପାଇଥିଲେ ଯେ, ଶିକ୍ଷାଦାନ ଅତି ଦୁର୍ବଳ । ସ୍ପଷ୍ଟ ନିର୍ଦ୍ଦେଶ ରହିଥିବା ସତ୍ତ୍ୱେ ସ୍ପାର୍କ
(SPARKS) କାର୍ଯ୍ୟକ୍ରମ ସ୍ଲାସ ରୁମରେ ସଠିକ କାର୍ଯ୍ୟ ହେଉ ନାହିଁ । ମଧ୍ୟାହ୍ନ ୧୨ଟା ୩୦ ପର୍ଯ୍ୟନ୍ତ ଛାତ୍ରୀ ଛାତ୍ରଙ୍କ ମଧ୍ୟାହ୍ନଭୋଜନ ଉପସ୍ଥାପନରେ ବ୍ୟତିକ୍ରମ ଦେଖା ଦେଇଥିଲା । ବିଜ୍ଞାନ ଲ୍ୟାବ ବହୁ ଦିନ ହେଉଛି ବ୍ୟବହାର ହୋଇନାହିଁ। ଏହିଭଳି ପ୍ରମୁଖ ବ୍ୟତିକ୍ରମକୁ ନେଇ ଜିଲା ଶିକ୍ଷା ଅଧିକାରୀ ସାହୁ ୧୯ ତାରିଖ ଦିନ ୩ ଦିନ ମଧ୍ୟରେ କାରଣ ଦର୍ଶାଅ ନୋଟିସର ଉତ୍ତର ଦେବାକୁ ଓ ୧୭ ତାରିଖ ଦିନକର ଦରମା ସମସ୍ତ କର୍ମଚରୀଙ୍କ ବନ୍ଦ କରାଯାଇଥିବା ଚିଠି ନମ୍ବର ୭୪୬୧ ଦର୍ଶାଇଛନ୍ତି ।
