ଭୁବନେଶ୍ୱର,୧୩।୪(ବ୍ୟୁରୋ): ଭୁବନେଶ୍ୱର ମହାନଗର ନିଗମ(ବିଏମ୍ସି) ବିନାଶରୁ ନୂଆ ଇନିଂସ ଆରମ୍ଭ କରୁଛି। ସକାରାତ୍ମକ ମନୋବୃତ୍ତି ଛାଡ଼ି ନକାରାତ୍ମକ ଚିନ୍ତାଧାରା ଆପଣାଉଛନ୍ତି। ଝାରପଡ଼ା ସ୍ଥିତ ହାଟ ଭଙ୍ଗା ଘଟଣା ପରେ କ୍ଷତିଗ୍ରସ୍ତ ବ୍ୟବସାୟୀଙ୍କୁ ଭେଟିବା ପରେ ଗଣମାଧ୍ୟମକୁ ଏମ୍ପି ଅପରାଜିତା ଷଡ଼ଙ୍ଗୀ ଏହା କହିଛନ୍ତି। ଅପରାଜିତା ଆହୁରି କହିଛନ୍ତି, ୪୩୦ ଲୋକଙ୍କୁ ରାତାରାତି ବାସଚ୍ୟୁତ କରାଗଲା। ସେମାନେ ନିଜ ଜୀବିକା ହରାଇଲେ। ଭୁବନେଶ୍ୱର ବିକାଶ ହେଉ, କିନ୍ତୁ ଲୋକଙ୍କ ସୁବିଧାକୁ ସର୍ବୋଚ୍ଚ ପ୍ରାଥମିକତା ଦେବା କଥା। ମାର୍କେଟ ବିଲ୍ଡିଂ ନାଁରେ ଯେଉଁମାନଙ୍କୁ ରାତାରାତି ଝାରପଡ଼ା ହାଟରୁ ହଟାଗଲା ସେମାନଙ୍କୁ ପ୍ରଥମେ ଥଇଥାନ କରାଯିବା ଆବଶ୍ୟକ। ଏହି ଉଠା ଦୋକାନୀ ଏବେ ଜୀବିକା ହରାଇଥିବା ବେଳେ ଆସନ୍ତା ୭ ଦିନ ମଧ୍ୟରେ ସେମାନଙ୍କୁ ବିକଳ୍ପ ଜାଗା ଦେଖାନ୍ତୁ। ଆମେ ସମସ୍ତେ ସେହି ଜାଗା ଦେଖିବୁ। ହେଲେ ଏପରି ଜାଗା ଦେଖାଇବେ ଯେଉଁଠି ବେପାର ହେବ। ଏହି ଗରିବ ଲୋକଙ୍କ ଦୋକାନ ବିଏମ୍ସି ଉଜାଡି ଦେଲା। ତେଣୁ ଥଇଥାନ ସହ ସେମାନଙ୍କୁ କ୍ଷତିପୂରଣ ଦିଆଯାଉ। ବର୍ଷେ ତଳେ ଏଠାକୁ ଆସିଥିଲି ଏବଂ ଗୋଟିଏ ଚିଠି ଲେଖି କମିଶନରଙ୍କୁ ହାଟକୁ ଭଙ୍ଗା ନ ଯାଉ ବୋଲି ଅନୁରୋଧ କରିଥିଲି। ପାର୍ଲାମେଣ୍ଟ ଚାଲିଥିବାରୁ ଦିଲ୍ଲୀରେ ଥିଲି ଏବଂ ଫେରିବାର ଦିନକ ଆଗରୁ ଏସବୁ ଘଟିଛି। ଦିଲ୍ଲୀରେ ଥିବା ସମୟରେ ଏଭଳି କାହିଁକି କରାଗଲା। ସ୍ଥାନୀୟ ଏମ୍ପି ଆସିବା ପର୍ଯ୍ୟନ୍ତ କାହିଁକି ଅପେକ୍ଷା କରାଗଲା ନାହିଁ ବୋଲି ସେ ପ୍ରଶ୍ନ କରିଛନ୍ତି।
ମଙ୍ଗଳବାର ରାତି ସୁଦ୍ଧା ୪୩୦ କ୍ଷତିଗ୍ରସ୍ତ ଦୋକାନୀଙ୍କ ତାଲିକା ପ୍ରସ୍ତୁତ କରି ବିଏମ୍ସିକୁ ଦିଆଯିବ। ଏହାସହ ୩ଟି ଦାବି ସମ୍ପର୍କରେ ଚିଠିରେ ଉଲ୍ଲେଖ ରହିବ। ଏହି ଚିଠି ସାର୍ବଜନୀନ କରାଯିବ। ବିଏମ୍ସିର ପ୍ରଥମ ମହାନଗର ନିଗମ ବୈଠକରେ ସ୍ଥାନୀୟ କର୍ପୋରେଟର ଏହି କଥା ଉଠାଇବେ ବୋଲି ଅପରାଜିତା କହିଛନ୍ତି।
