ଦାରିଙ୍ଗବାଡି,୨୯ା୫(ଡି.ଏନ୍.ଏ.): ଜନଜାତି ଅଧ୍ୟୁଷିତ କନ୍ଧମାଳ ଜିଲାରେ ଏବେ ଜଙ୍ଗଲଜାତ ଦ୍ରବ୍ୟ ଶାଳମଞ୍ଜିର ଅଭାବୀ ବିକ୍ରି ଗରିବ ଲୋକଙ୍କୁ କଷ୍ଟରେ ପକାଇଛି । ଏବେ ଅଞ୍ଚଳରେ ଏକାଧିକ ଜଙ୍ଗଲଜାତ ଦ୍ରବ୍ୟ ଲୋକେ ସଂଗ୍ରହ କରୁଥିଲେ ସୁଦ୍ଧା ବଜାରରେ ଉଚିତ ଦର ମିଳୁ ନ ଥିବା ଅଭିଯୋଗ ହୋଇଛି। ଶାଳ ଗଛରୁ ସିଧା କାଳବୈଶାଖୀ ହେଉ କି ସାଧାରଣ ପବନରେ ଶାଳମଞ୍ଜି ଆପେ ଆପେ ତଳେ ପଡିଥାଏ । ଏବେ ବଣ ଜଙ୍ଗଲ ସମେତ ପାହାଡ଼, ରାଜପଥ କଡରେ ଶାଳମଞ୍ଜି ଚାଦର ଘୋଡାଇଲା ଭଳି ପଡିରହିଛି। ଶାଳମଞ୍ଜିକୁ ଜନଜାତି ଓ ଅନ୍ୟ ବର୍ଗର ଲୋକେ ସଂଗ୍ରହ କରି ପୋଡିବା, ଶୁଖାଇବା, ଚୋପା ଛଡାଇବା ସହ ଡାଲି ପ୍ରସ୍ତୁତ କରି ବିକ୍ରି କରିଥାନ୍ତି। ଏତିକି କାର୍ଯ୍ୟ କରିବାକୁ ଗୋଟିଏ ପରିବାରକୁ ୧୦ରୁ ୧୫ ଦିନ ସମୟ ଲାଗିଥାଏ। ହେଲେ ଏହାର ବଜାର ମୂଲ୍ୟ ଧାର୍ଯ୍ୟ କରାଯାଇଥିଲେ ସୁଦ୍ଧା ସରକାରଙ୍କ ପକ୍ଷରୁ ପ୍ରତି ପଞ୍ଚାୟତରେ କିଣା ବିକା କରାଯାଉ ନ ଥିବାରୁ ଏହାକୁ ସଂଗ୍ରହ କରୁଥିବା ପରିବାର ଅତି ଶସ୍ତା ଦରରେ ଦଲାଲମାନଙ୍କୁ ବିକ୍ରି କରୁଛନ୍ତି। ଏହାର ଦର ଟିଡିସିସିଓଏଲ(ଟ୍ରାଇବାଲ ଡେଭଲପମେଣ୍ଟ କୋଅପରେଟିଭ କର୍ପୋରେଶନ ଓଡ଼ିଶା ଲିମିଟେଡ) ସର୍ବନମ୍ନ ଦର ଧାର୍ଯ୍ୟ କରିଥିବା ବେଳେ କିଲୋ ପିଛା ୨୦ଟଙ୍କାରେ କିଣିବା ପାଇଁ ଧାର୍ଯ୍ୟ କରିଥିବା ଟିଡିସିସିଓଏଲର ରାଜ୍ୟ ଉପାଧ୍ୟକ୍ଷ ଦିଲୀପ କୁମାର ପ୍ରଧାନ କହିଛନ୍ତି। ଏଥିପାଇଁ ଶାଳମଞ୍ଜି ସଂଗ୍ରହକାରୀ ନିଜ ଅଞ୍ଚଳର ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ବିକ୍ରି କରିବେ। ଚାଷୀ ନିଜର ବ୍ୟାଙ୍କ ଆକାଉଣ୍ଟ ଓ ଆଧାର ଦେବା ବାଧ୍ୟତାମୂଳକ ରହିବ ଏବଂ ମଞ୍ଜି ବିକ୍ରିର ୩ ଦିନରୁ ଏକ ସପ୍ତାହ ମଧ୍ୟରେ ସେମାନଙ୍କୁ ଟିଡିସିସିଓଏଲ ପକ୍ଷରୁ ମଞ୍ଜିର ଉଚିତ ମୂଲ୍ୟ ହିସାବରେ ଅର୍ଥ ପ୍ରଦାନ କରାଯିବ ବୋଲି କହିଛନ୍ତି। ଏବେ ଜିଲାର ବିଭିନ୍ନ ସ୍ଥାନରେ ଶାଳମଞ୍ଜି ସଂଗ୍ରହ ହେଉଥିଲେ ସୁଦ୍ଧା ସଂଗ୍ରହକାରୀ କିଲୋ ପିଛା ମାତ୍ର ୧୦ରୁ ୧୫ଟଙ୍କା ପର୍ଯ୍ୟନ୍ତ ବିକ୍ରି କରୁଛନ୍ତି ା ଫଳରେ ପରିବାରର ଛୋଟ, ବଡ଼ ସମସ୍ତ ପରିବାର ଏଥିପାଇଁ ପରିଶ୍ରମ କରି ଦିନକୁ ୧ଶହରୁ୨ଶହ ରୋଜଗାର କରନ୍ତି। ତେଣୁ ରାଜ୍ୟ ସରକାର ଏହାର ସର୍ବନିମ୍ନ ମୂଲ୍ୟ କିଲୋ ପିଛା ୩୦ ଟଙ୍କାରୁ ଊର୍ଦ୍ଧ୍ୱ ଦର କରିବାକୁ ଦାବି ହୋଇଛି। ପ୍ରକାଶ ଯେ, କନ୍ଧମାଳ ଜିଲାରେ ଅତି ଶସ୍ତାରେ କ୍ରୟ କରାଯାଉଛି ଶାଳମଞ୍ଜି। ଏଥିରୁ ତେଲ ବାହାର କରାଯିବା ସହ ସାବୁନ ଇତ୍ୟାଦି ପ୍ରସ୍ତୁତ କରାଯାଏ ା ତେବେ କନ୍ଧମାଳରୁ କଞ୍ଚାମାଲ ଯାଇ ବାହାରେ ତେଲ, ସାବୁନ ଆଦି କରାଯାଇଥାଏ। ଏଠାରେ ତାକୁ ମୂଲ୍ୟଯୁକ୍ତ କରାଯିବା ବ୍ୟବସ୍ଥା ନ ଥିବାରୁ ଏହା ଶସ୍ତା ବୋଲି ବୁଦ୍ଧିଜୀବୀ ମହଲରେ କୁହାଯାଉଛି।