ଓ୍ବାଶିଂଟନ,୧୮।୭ : ଆମେରିକାରେ ବନ୍ଧୁକ ସଂସ୍କୃତି ଯୋଗୁ ବିଭିନ୍ନ ସମୟରେ ଗୁଳିକାଣ୍ଡ ଘଟଣା ଘଟିବାରେ ଲାଗିଛି। ଏଭଳି ଘଟଣା ଧୀରେଧୀରେ ବଢ଼ିବାରେ ମଧ୍ୟ ଲାଗିଛି। ସିଏନଏନ ରିପୋର୍ଟ ଅନୁଯାୟୀ, ରବିବାର ସାରେ ଇଣ୍ଡିଆନାର ଗ୍ରୀନଉଡ ପାର୍କ ଶପିଂ ମଲରେ ଗୁଳିକାଣ୍ଡ ଘଟିଛି।
ଏହି ଘଟଣାରେ ସନ୍ଦିଗ୍ଧଙ୍କ ସମେତ ୪ ଜଣଙ୍କ ମୃତ୍ୟୁ ଘଟିଥିବା ପୋଲିସ ପକ୍ଷରୁ କୁହାଯାଇଛି। ବହୁ ଲୋକ ଆହତ ହୋଇଥିବା ଜଣାପଡିଛି। ଆହତଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ଡାକ୍ତରଖାନାରେ ଭର୍ତ୍ତି କରାଯାଇଛି। ଗ୍ରୀନଉଡ ମେୟର ମାର୍କ ମାୟର୍ସଙ୍କ ଅନୁଯାୟୀ ସନ୍ଦିଗ୍ଧ ସୁଟର ମୃତକଙ୍କ ମଧ୍ୟରେ ଅଛନ୍ତି। ଏନକାଉଣ୍ଟର ସମୟରେ ବନ୍ଧୁକଧାରୀଙ୍କୁ ଗୁଳି କରାଯାଇଥିଲା। ମେୟର ମାର୍କ ମାୟର୍ସ ଟୁଇଟ କରି କହିଛନ୍ତି, ଏହି ଦୁଃଖଦ ଘଟଣା ଆମକୁ ଗଭୀର ଆଘାତ ଦେଇଛି।
ଗ୍ରୀନଉଡ ପୋଲିସ ବିଭାଗର ମୁଖ୍ୟ ଜିମ ଆଇସନ କହିଛନ୍ତି ଯେ ଜଣେ ବ୍ୟକ୍ତି ରାଇଫଲ ଏବଂ ଗୁଳି ନେଇ ଗ୍ରୀନଉଡ ପାର୍କ ଶପିଂ ମଲ ଭିତରକୁ ପ୍ରବେଶ କରିଥିଲେ। ସେ ଫୁଡ କୋର୍ଟରେ ଗୁଳି ଚଳାଇବା ଆରମ୍ଭ କରିଥିଲେ। ଏକ ଗଣମାଧ୍ୟମ ସମ୍ମିଳନୀରେ ଇସାନ କହିଛନ୍ତି ଯେ ବନ୍ଧୁକଧାରୀଙ୍କୁ ଜଣେ ସଶସ୍ତ୍ର ନାଗରିକ ହତ୍ୟା କରିଛନ୍ତି। ଗ୍ରୀନଉଡ ମେୟର ମାର୍କ ମାୟର୍ସ କହିଛନ୍ତି ଯେ ଗ୍ରୀନଉଡ ପୋଲିସ ବିଭାଗ ଏହି ମଲକୁ ନିୟନ୍ତ୍ରଣରେ ରଖିଛି। ମୁଁ କମାଣ୍ଡ ପୋଷ୍ଟ ସହିତ ସିଧାସଳଖ ଯୋଗାଯୋଗରେ ଅଛି । ଏହି ଅଞ୍ଚଳଠାରୁ ଦୂରରେ ରହିବାକୁ ସେ ଲୋକଙ୍କୁ ନିବେଦନ କରିଛନ୍ତି।
