ନବରଙ୍ଗପୁର/ଝରିଗାଁ,୧୬ା୧୧(ସଦାଶିବ ପ୍ରହରାଜ): ନବରଙ୍ଗପୁର ଜିଲା ଝରିଗାଁ ବ୍ଲକ ପାଲିଆ ପଞ୍ଚାୟତ ଅଧୀନ ବାସୁଦେବଗୁଡ଼ା ଗାଁର ଡମନା ଭତରା(୩୦)ଙ୍କୁ ସେହିଗାଁର କପୁର ଭତରା ଦେଶୀ ବନ୍ଧୁକରେ ଗୁଳି କରିଛନ୍ତି। ଡମନାଙ୍କ ଡାହାଣ କାନ୍ଧରେ ଗୁଳି ବାଜିଛି। ସ୍ଥାନୀୟ ଲୋକଙ୍କ ସହାୟତାରେ ଝରିଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇ ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ନବରଙ୍ଗପୁର ସଦର ମହକୁମା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଶନିବାର ସନ୍ଧ୍ୟାରେ ଡମନା ଘରୁ ବାହାରି ଖଳାକୁ ଯାଉଥିଲେ। ଏହି ସମୟରେ ରାସ୍ତାରେ କିଛିଲୋକ ଠିଆ ହୋଇଥିଲେ। କପୁର ଡମନା ଆସୁଛି କହି ଦେଶୀ ବନ୍ଧୁକରେ ଗୁଳି ମାରିଥିଲେ। ଗୁଳି ଆସି କାନ୍ଧରେ ବାଜିଥିଲା। ସ୍ଥାନୀୟ ଲୋକଙ୍କ ସହାୟତାରେ ୧୦୮ ଆମ୍ବୁଲାନ୍ସ ଯୋଗେ ଝରିଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରେ ନବରଙ୍ଗପୁରକୁ ସ୍ଥାନାନ୍ତର କରାଯାଇଛି। ଡମନା ବିଜେଡି ପଞ୍ଚାୟତ ସଭପତି ଅଛନ୍ତି। ପୂର୍ବରୁ କପୁର ସହିତ କୌଣସି ଶତ୍ରୁତା ନ ଥିବା ଓ କେଉଁ କାରଣରୁ ଗୁଳି ଚଳାଇଛନ୍ତି ତାହା ସେ ଜାଣି ନ ଥିବା ଡମନା କହିଛନ୍ତି। କପୁର ମଦ ପିଇବା ସହିତ ଦେଶୀ ବନ୍ଧୁକ ଧରିବା ଜାଣିଛନ୍ତି। କିନ୍ତୁ ତାହା ନକଲି ବନ୍ଧୁକ ଭାବୁଥିଲି ବୋଲି ଡମନା କହିଛନ୍ତି। ଏହି ଘଟଣା ପରେ ସ୍ଥାନୀୟ ଲୋକେ କପୁରଙ୍କୁ ମାଡ଼ ମାରିଛନ୍ତି। ଏଥିରେ କପୁରଙ୍କ ମୁହଁରେ ଜୋରରେ ଆଘାତ ହୋଇଛି।
ଝରିଗାଁ ଏଏସ୍ଆଇ କେଦାର ନାଥ ରାଉତ ଓ ବେଦବ୍ୟାସ ବଞ୍ଜରା,ହାବିଲଦାର ମୁରଲୀ ବିଶୋଇ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। କପୁର ଗୁଳି କରିଥିବା ବନ୍ଧୁକ ବାହାରେ କେଉଁ ଆଡେ ଫିଙ୍ଗି ଦେଇଛନ୍ତି। ପୋଲିସ କପୁରଙ୍କୁ ଥାନାରେ ଆଣି ଅଟକ ରଖି ଅଧିକ ପଚରାଉଚରା ଜାରି ରଖିଛି। ଖବର ଲେଖାହେବା ପର୍ଯ୍ୟନ୍ତ ଥାନାରେ କୌଣସି ମାମଲା ରୁଜୁ ହୋଇନାହିଁ।
