ନୂଆଦିଲ୍ଲୀ,୨୭।୧: ଚଳିତ ବର୍ଷ ଅକ୍ଟୋବର-ନଭେମ୍ବରରେ ଅନୁଷ୍ଠିତ ହେବ ଟି -୨୦ ବିଶ୍ୱକପ। ଅକ୍ଟୋବର ୨୩ରେ ଭାରତ ଏବଂ ପାକିସ୍ତାନ ମଧ୍ୟରେ ହେବାକୁ ଥିବା ବିଶ୍ୱକପ ମ୍ୟାଚ ପାଇଁ ପ୍ରଶଂସକମାନେ ଉତ୍ସାହର ସହିତ ଅପେକ୍ଷା କରିଛନ୍ତି। ଏହି ମ୍ୟାଚ ଅଷ୍ଟ୍ରେଲିଆର ମେଲବୋର୍ନ କ୍ରିକେଟ ଗ୍ରାଉଣ୍ଡରେ ଖେଳାଯିବ। ଉଭୟ ଦଳ ଏହି ମ୍ୟାଚ ମାଧ୍ୟମରେ ନିଜର ଟି -୨୦ ବିଶ୍ୱକପ ଅଭିଯାନ ଆରମ୍ଭ କରିବେ। ଏହାପୂର୍ବରୁ ପାକିସ୍ତାନର ପୂର୍ବତନ ବୋଲର ଶୋଏବ ଅଖତର ଏହି ମ୍ୟାଚ ବିଷୟରେ ଭବିଷ୍ୟବାଣୀ କରିଛନ୍ତି। ଏହି ମ୍ୟାଚରେ ପାକିସ୍ତାନ ଦଳ ଜିତିବ ବୋଲି ସେ କହିଛନ୍ତି। ସେ କହିଛନ୍ତି, ଆମ ଦଳ ପୁଣି ଭାରତକୁ ପରାସ୍ତ କରିବାରେ ସକ୍ଷମ ହେବ। ଟି -୨୦ ରେ ଭାରତ ଅପେକ୍ଷା ପାକିସ୍ତାନ ଦଳ ଭଲ। ଭାରତୀୟ ଗଣମାଧ୍ୟମ ହିଁ ନିଜ ଦଳ ଉପରେ ଅନାବଶ୍ୟକ ଚାପ ପକାଇଥାଏ। ଏଭଳି ପରିସ୍ଥିତିରେ ଭାରତ ହାରିଯିବା ସ୍ବାଭାବିକ।
ଗତ ବର୍ଷ ସଂଯୁକ୍ତ ଆରବ ଏମିରେଟ୍ସରେ ଆୟୋଜିତ ଟି -୨୦ ବିଶ୍ୱକପରେ ଭାରତ ଏବଂ ପାକିସ୍ତାନର ଦଳ ମୁହାଁମୁହିଁ ହୋଇଥିଲେ। ଏହି ମ୍ୟାଚ୍ରେ ପାକିସ୍ତାନ ଦୁବାଇ ଇଣ୍ଟରନ୍ୟାସନାଲ ଷ୍ଟାଡିୟମରେ ୧୦ ଉଇକେଟରେ ଭାରତକୁ ପରାସ୍ତ କରଥିଲା। କୌଣସି ବିଶ୍ୱକପରେ ପାକିସ୍ତାନ ହାତରେ ଭାରତୀୟ ଦଳ ପାଇଁ ଏହା ପ୍ରଥମ ପରାଜୟ ଥିଲା। ଏହି ପରାଜୟ ପରେ ସୁପର -୧୨ ରାଉଣ୍ଡରେ ଭାରତ ନ୍ୟୁଜିଲାଣ୍ଡ ବିପକ୍ଷରେ ପରାଜୟର ସାମ୍ନା କରିବାକୁ ପଡିଥିଲା ଏବଂ ଦଳ ସେମିଫାଇନାଲରେ ପ୍ରବେଶ କରିପାରି ନ ଥିଲା।
