ନୂଆଦିଲ୍ଲୀ,୧।୧: ଭାରତୀୟ ଦଳ ମେଲବର୍ନ ଟେଷ୍ଟକୁ ୮ ଉଇକେଟରେ ଜିତିି ଅଷ୍ଟ୍ରେଲିଆଠାରୁ ଆଡିଲେଡ୍ ଟେଷ୍ଟର ପ୍ରତିଶୋଧ ନେଇଥିଲା। କାମଚଳା ଅଧିନାୟକ ଅଜିଙ୍କ୍ୟ ରାହାନେ ଦଳର ନେତୃତ୍ୱରେ ଦଳର ଏହି ବିଜୟ ଯୋଗୁ ସିରିଜ ଏବେ ୧-୧ ସମାନ ସ୍ତରରେ ପହଞ୍ଚିଛି। ତେବେ ମ୍ୟାଚ୍ରେ ବ୍ୟକ୍ତିଗତ ଭାବେ ରାହାନେ ୧୧୨ରନ୍ କରିବା ଯୋଗୁ ଦଳ ମଜଭୂତ ସ୍ଥିତିରେ ପହଞ୍ଚିଥିଲା। ଏବେ ପାକିସ୍ତାନର ପୂର୍ବ ଦ୍ରୁତ ବୋଲର ଶୋଏବ ଅଖତର ରାହାନେଙ୍କ ପ୍ରଶଂସା କରିଛନ୍ତି।
ମୁଁ ଉଭୟ ମ୍ୟାଚ୍ ଦେଖିଛି। ଅଷ୍ଟ୍ରେଲିଆ ଭାରତ ବିପକ୍ଷରେ ଭଲ ପ୍ରଦର୍ଶନ କରିଥିଲା। ମୋତେ ଲାଗିଥିଲା ସ୍କୋର ୩୬୯ ଅଛି, ହେଲେ ତାହା ୩୬/୯ ଥିଲା। ହେଲେ ବିପଦ ବେଳେ ପ୍ରକୃତ ପରିଚୟ ଜଣାପଡେ। ଭାରତୀୟ ଦଳ ଚାପରେ ଥିବା ସତ୍ତ୍ୱେ ଦ୍ୱିତୀୟ ଟେଷ୍ଟରେ ଦମ୍ଦାର ପ୍ରଦର୍ଶନ କରିଛନ୍ତି। ରାହାଣେ ବହୁତ ଶାନ୍ତ ସ୍ବଭାବର ଏବଂ ଚୁପ୍ ରହୁଥିବା ଖେଳାଳି। ସେ ଫାଲତୁ କଥାରେ ରାଗନ୍ତି ନାହିଁ। ନିରବ ରହି ଭଲ ନେତୃତ୍ୱ ନେଇପାରନ୍ତି। ତାଙ୍କର ଅଧିନାୟକତ୍ୱରେ ଭାରତୀୟ ଦଳ ଅଚାନକ ପ୍ରଦର୍ଶନ କରିଛି। ଭାରତ ପାଖରେ ସିରିଜ ଜିତିବାର ସୁଯୋଗ ରହିଛି ବୋଲି ଶୋଏବ କହିଛନ୍ତି।
୧୦-୧୫ ବର୍ଷ ପୂର୍ବେ ଅଷ୍ଟ୍ରେଲିଆକୁ ଅନ୍ୟ ଉପମହାଦ୍ୱିପ ଟିମ୍ ହରାଇବା କଥା କେହି ଭାବି ପାରୁ ନ ଥିଲେ। ହେଲେ ଏବେ ତାହା ହେଉଛି। ପୁରା ସିରିଜ ରୋମାଞ୍ଚକର ଲାଗୁଛି। ମୁଁ ଭାରତକୁ ବିଜେତା ଭାବେ ଦେଖିବାକୁ ଚାହେଁ। କାରଣ ସେ ଭଲ ପ୍ରତ୍ୟାବର୍ତ୍ତନ କରିଛି। ରାହାନେଙ୍କ ଶତକ ଅଧିକ ପ୍ରଭାବ ପକାଇଲା ବୋଲି ମଧ୍ୟ ସେ କହିଛନ୍ତି।
