ମୁମ୍ବାଇ,୯।୪: ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶ ରବିବାର ଉତ୍ତର ପ୍ରଦେଶରେ ପହଞ୍ଚିଛନ୍ତି। ଉଭୟ ନେତା ସେଠାରେ ଥିବା ଅଯୋଧ୍ୟା ଗସ୍ତ କରିବେ। ଅଯୋଧ୍ୟା ଯିବା ପୂର୍ବରୁ ଲକ୍ଷ୍ନୌରେ ମୁଖ୍ୟମନ୍ତ୍ରୀ ସିନ୍ଦେ କହିଛନ୍ତି, ମୁଁ ଅଯୋଧ୍ୟା ଯାଉଛି, ସେଠାରେ ରାମଲଲାଙ୍କ ଦର୍ଶନ କରିବି, ଆଳତି କରିବି, ପ୍ରଭୁ ରାମଚନ୍ଦ୍ରଙ୍କ ଆଶୀର୍ବାଦ ଆମ ଉପରେ ରହିଛି। ସେଥିପାଇଁ ଧନୁଷ ବାଣ ଆମକୁ ମିଳିଛି। ଏପଟେ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶ କହିଛନ୍ତି, ମୋତେ ଖୁସି ଲାଗୁଛି କି ଆଜି ମୁଁ ରାମଲଲାଙ୍କ ଦର୍ଶନ କରିବାକୁ ଅଯୋଧ୍ୟା ଆସିଛି। ମୁଁ ରାମ ଜନ୍ମଭୂମି ଆନ୍ଦୋଳନ ସହିତ ଜଡିତ ରହିଛି। ସମସ୍ତ କରସେବାରେ ମୁଁ ଉପସ୍ଥିତ ରହିଛି।
ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀଙ୍କ ଗସ୍ତକୁ ନେଇ ଏବେ ଉଦ୍ଧବ ଠାକରେ ଗ୍ରୁପର ନେତା ସଞ୍ଜୟ ରାଉତ ତାଙ୍କ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ଏହାକୁ ଭାରତୀୟ ଜନତା ପାର୍ଟି(ଭାଜପା) ସ୍ପନସର କରିଛି।
ସଞ୍ଜୟ ଆହୁରି ମଧ୍ୟ କହିଛନ୍ତି ମୁଁ କିଛିଥର ଅଯୋଧ୍ୟା ଯାଇଛି, ଆମ ସହ ଭାଜପା ତ ଯାଇ ନ ଥିଲା ଯେତେବେଳେ ବାବରି ପ୍ରସଙ୍ଗ ଉଠିଥିଲା। ସେତେବେଳେ ଭାଜପା ପଳାୟନ କରିଥିଲା। ଆଉ ଏବେ ଦେଶଦ୍ରୋହୀଙ୍କ ଆଙ୍ଗୁଠି ଧରି ଯାଉଛି। ଏମିତି ଲୋକଙ୍କୁ ପ୍ରଭୁ ରାମଙ୍କ ଆଶୀର୍ବାଦ ମିଳିବ ନାହିଁ।
