ମୁମ୍ବାଇ,୨୯ ।୫: ଶିବସେନା ତା’ର ମୁଖପତ୍ର ସାମନା ଜରିଆରେ ଦେଶରେ ବେକାରୀ, କଶ୍ମୀର ସମସ୍ୟା ଓ ଜ୍ଞାନବ୍ୟାପି ମସଜିଦ ଭଳି ବିଷୟକୁ ନେଇ ଭାରତୀୟ ଜନତା ପାର୍ଟି(ଭାଜପା)କୁ ଟାର୍ଗେଟ କରିଛି । ଶିବସେନା ସାମନାର ସମ୍ପାଦକୀୟରେ ଲେଖିଛି ଯେ ଦେଶରେ ବେକାରୀ ସମସ୍ୟା ବେଳକୁ ବେଳ ବଢିବାରେ ଲାଗିଛି । ପଞ୍ଜାବ ଓ କଶ୍ମୀର ଅଶାନ୍ତ ହେବାରେ ଲାଗିଛି ଆଉ ରାଜନୀତି ଭିନ୍ନ ଦିଗରେ ଗତି କରୁଛି । ଦେଶର ନୂଆ ପିଢି କେଉଁ ଦିଗରେ ଗତି କରୁଛନ୍ତି ବୋଲି ଶିବସେନା ପ୍ରଶ୍ନ କରିଛି । ହେଲେ ଏହି ସମୟରେ ବିଶ୍ୱକୁ ମାର୍ଗଦର୍ଶନ ଦେଉଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚୁପ ରହିଛନ୍ତି, ଯାହା ଆଶ୍ଚର୍ଯ୍ୟ ଲାଗୁଛି ।
ସାମନାରେ ଲେଖାଯାଇଛି, ହିନ୍ଦୁ ଓ ମୁସଲମାନଙ୍କ କଥା ଚିନ୍ତା କରିବା ପରିବର୍ତ୍ତେ କଶ୍ମୀର ଘାଟିରେ ଆତଙ୍କବାଦୀଙ୍କ ସହ ରକ୍ତପାତ ଚାଲିଛି । ଯେଉଁ ଲୋକ ଦେଶର ଗୁଣଗାନ କରୁଛନ୍ତି ସେମାନଙ୍କୁ ଶେଷ କରିବା ଆତଙ୍କବାଦୀଙ୍କ ନୀତି । ଘାଟିରେ ଗତ ୨ ମାସ ମଧ୍ୟରେ ୧୨ ମୁସଲମାନ ପୋଲିସ ଅଧିକାରୀଙ୍କ ମୃତ୍ୟୁ ହେଲାଣି । ଭାଜପାକୁ କେବଳ ଗୋଟିଏ ଧର୍ମ ଓ ଗୋଟିଏ ବଳିଦାନ କଥା ଦେଖାଯାଉଛି । ଯାହା ରାଷ୍ଟ୍ରୀୟ ଏକତାର ଲକ୍ଷ୍ୟ ନୁହେଁ । ଦେଶପାଇଁ ବଳିଦାନ ଦେଉଥିବା ହିନ୍ଦୁମାନଙ୍କୁ ଯେତିକି ସମ୍ମାନ ଦିଆଯାଉଛି ଦେଶପାଇଁ ବଳିଦାନ ଦେଉଥିବା ମୁସଲମାନମାନଙ୍କର ବି ସେତିକି ସମ୍ମାନ କରିବା ଦରକାର । ସମାନାରେ ଆହୁରି ଲେଖାଯାଇଛି, ଜାପାନରେ ଅନୁଷ୍ଠିତ କ୍ୱାଡ ଶିଖର ସମ୍ମିଳନୀରେ ବିଭିନ୍ନ ଦେଶର ନେତାଙ୍କ ସହ ମୋଦିବି ଖୁବ୍ ଆଗରେ ଥିଲେ । ହେଲେ ଦେଶରେ ବଢି ଚାଲୁଥିବା ବେକାରୀ ସମସ୍ୟାର କ’ଣ ସମାଧାନ ରହିଛି ବୋଲି ପ୍ରଶ୍ନ କରିଛି ଶିବସେନା ।
