ମାଥିଲି,୨୬।୪ (ଡି.ଏନ.ଏ.) ମାଲକାନଗିରି ଜିଲା ମାଥିଲି ବ୍ଲକ ଅନ୍ତର୍ଗତ ଧୂଙ୍ଗିଆପୁଟ ପଞ୍ଚାୟତରେ ସରକାରୀ କେନ୍ଦୁପତ୍ର ଫଡ଼ିରେ ଶିଶୁ ଶ୍ରମିକଙ୍କୁ ନିୟୋଜିତ କରି କାର୍ଯ୍ୟ କରାଯାଉଥିବା ଅଭିଯୋଗ ହେଉଛି। ରାଜ୍ୟ ସରକାର ଆଦିବାସୀଙ୍କ ପାଇଁ ଅନେକ ଯୋଜନା କାର୍ଯ୍ୟକାରୀ କରିଛନ୍ତି। ସେମାନଙ୍କ ପିଲାମାନେ ଯେପରି ପାଠପଢି ଉଚ୍ଚ ଶିକ୍ଷିତ ହେବେ ସେନେଇ ବହୁ ଅର୍ଥ ବ୍ୟୟ କରୁଛନ୍ତି। ମାତ୍ର ଏଥିରୁ ସୁଫଳ ସେମାନେ ପାଉନାହାନ୍ତି। ପରିବାରର ଆର୍ଥତ୍କ ସମସ୍ୟା ଦୂରକରିବା ଲାଗି ସେମାନେ ବିଭିନ୍ନ କାର୍ଯ୍ୟରେ ନିଜକୁ ସାମିଲ କରୁଛନ୍ତି। ଧୂଙ୍ଗିଆପୁଟ ଗ୍ରାମର ପିଲାମାନେ ପାଠ ପଢିବାକୁ ସ୍କୁଲ ଯିବା ବଦଳରେ ଏଠାରେ କେନ୍ଦୁପତ୍ର ଫଡିରେ କାର୍ଯ୍ୟ କରୁଛନ୍ତି। ସେମାନଙ୍କୁ ଦାୟିତ୍ୱରେ ଥିବା କର୍ମଚାରୀ ଅଳ୍ପ କିଛି ଟଙ୍କା ଦେଇ ଟାଣଖରାରେ ଦିନ ସାରା କାର୍ଯ୍ୟ କରାଉଛନ୍ତି। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
