ମୁମ୍ବାଇ: ଏବେ କରୋନା ମହାମାରୀ ସାରା ଦେଶରେ କାୟା ବିସ୍ତାର କରି ସାରିଥିବା ବେଳେ ପ୍ରାୟ ଘରେ ଘରେ କରୋନା ରୋଗୀ ଚିହ୍ନଟ କରାଗଲେଣି । ତେବେ ଏହି ସମୟରେ କେତେକ ଲୋକେ ଆପଣାଛାଏଁ କରୋନା ରୋଗୀଙ୍କ ସେବା କରିବାକୁ ଆଗେଇ ଆସୁଛନ୍ତି । ସେମାନଙ୍କ ମଧ୍ୟରେ ଜଣେ ହେଉଛନ୍ତି ଅଭିନେତ୍ରୀ ଶିଖା ମାଲହୋତ୍ରା । ସେ ନିଜ ଇଚ୍ଛାରେ ଜଣେ ନର୍ସ ଭାବେ ଦୀର୍ଘ ୬ମାସ ହେବ କରୋନା ରୋଗୀଙ୍କ ସେବା କରି ଆସୁଥିଲେ । ହେଲେ ଗୁରୁବାର ସେ ତାଙ୍କ କରୋନା ରିପୋର୍ଟ ସମ୍ପର୍କରେ କିଛି କହିଛନ୍ତି । ଇନଷ୍ଟାଗ୍ରାମ ମାଧ୍ୟମରେ ସେ କରୋନାରେ ପୀଡ଼ିତ ହୋଇଥିବା ଜଣାଇଛନ୍ତି । ନିକଟରେ ଶିଖା ଦୁଇଟି ଫଟୋ କୋଲାଜ କରି ଏହାର କ୍ୟାପଶନରେ ଲେଖିଛନ୍ତି, କରୋନା ପଜିଟିଭ ହେବା ପରେ ହସ୍ପିଟାଲରେ ଆଡମିଟ ହୋଇଛି । ଏବେ ଅକ୍ସିଜେନ କମି ଯାଉଥିବା ଅନୁଭବ କରୁଛି । ଏହି ପୋଷ୍ଟ ସେହିମାନଙ୍କ ପାଇଁ ଯେଉଁମାନେ କରୋନାକୁ କିଛି ନୁହେଁ ବୋଲି କହୁଥିଲେ । ଆପଣମାନଙ୍କ ଶୁଭକାମନା ଓ ପ୍ରାର୍ଥନା ସହ ଗତ ୬ ମାସ ହେବ କରୋନା ରୋଗୀଙ୍କ ସେବା କରି ଆସୁଥିଲି । ଉକ୍ତ ଫଟୋରେ ସେ ଗୋଟିଏ ପଟେ ହସ୍ପିଟାଲ ବେଡ୍ରେ ଥିବା ବେଳେ ଅନ୍ୟପଟେ ପିପିଇ କିଟ୍ ପିନ୍ଧି ସେବା କରିବାକୁ ପ୍ରସ୍ତୁତ ଥିବା ଦେଖାଯାଇଛି ।
ସୂଚନାଯୋଗ୍ୟ, ଗତ ମାର୍ଚ୍ଚରେ ଶିଖା ଏକ ୱେସାଇଟରେ କଥା ହେବା ସମୟରେ ସେ ମୁମ୍ବାଇର ଏକ ହସ୍ପିଟାଲରେ କରୋନା ସହ ଲଢିବାକୁ ସ୍ୱୟଂସେବକ ରୂପେ କାମ କରୁଛନ୍ତି । ଏହାକୁ ଦେଖିବା ପରେ ବଲିଉଡ୍ର କେତେଜଣ ସେଲିବ୍ରିଟି ଶିଖାଙ୍କର ପ୍ରଶଂସା କରିଥିଲେ । ତେବେ ଶିଖାଙ୍କ ନିକଟରେ ଦିଲ୍ଲୀର ବର୍ଦ୍ଧମାନ ମହାବୀର ମେଡିକାଲ କଲେଜ ଓ ସଫଦରଜଙ୍ଗ ହସ୍ପିଟାଲର ନର୍ସିଂ ଡିଗ୍ରୀ ରହିଛି । ହେଲେ ସେ ବଲିଉଡ୍ରେ କ୍ୟାରିୟର କରିବାକୁ ଚାଲିଆସିଥିଲେ ।
