ନୂଆଦିଲ୍ଲୀ,୩୧।୧: ପରଲୋକରେ ପ୍ରଶାନ୍ତ ଭୂଷଣଙ୍କ ପିତା ତଥା ପୂର୍ବତନ ଆଇନ ମନ୍ତ୍ରୀ ଶାନ୍ତି ଭୂଷଣ। ଦିଲ୍ଲୀସ୍ଥିତ ବାସଭବନରେ ମଙ୍ଗଳବାର ସନ୍ଧ୍ୟା ୭ ଟାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ମୃତ୍ୟୁବେଳକୁ ତାଙ୍କୁ ୯୭ ବର୍ଷ ବୟସ ହୋଇଥିଲା। ୧୯୭୭ରୁ ୧୯୭୯ ପର୍ଯ୍ୟନ୍ତ ସେ ମୋରାର୍ଜୀ ଦେଶାଇ ମନ୍ତ୍ରଣାଳୟରେ ଭାରତର ଆଇନ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ।
ଶାନ୍ତି ଭୂଷଣ ଆହ୍ଲାବାଦ ହାଇକୋର୍ଟରେ ପ୍ରସିଦ୍ଧ ମାମଲାରେ ରାଜନାରାୟଣଙ୍କ ପ୍ରତିନିଧିତ୍ୱ କରିଥିଲେ। ଏହାର ପରିଣାମସ୍ବରୂପ ୧୯୭୪ରେ ଇନ୍ଦିରା ଗାନ୍ଧୀଙ୍କୁ ପ୍ରଧାନମନ୍ତ୍ରୀ ପଦରୁ ହଟାଇ ଦିଆଯାଇଥିଲା। ବିଗତ ଦିନରେ ସେ ଜନସାଧାରଣଙ୍କ ସ୍ବାର୍ଥର ଅନେକ ପ୍ରସଙ୍ଗ ଉଠାଇଛନ୍ତି ଏବଂ ଦୁର୍ନୀତି ବିରୋଧରେ ସ୍ବର ଉତ୍ତୋଳନ କରିଥିଲେ।
୧୯୮୦ରେ ସେ ଏନ୍ଜିଓ ‘ସେଣ୍ଟର ଫର ପବ୍ଲିକ ଇଣ୍ଟରେଷ୍ଟ ଲିଟିଗେସନ’ ପ୍ରତିଷ୍ଠା କରିଥିଲେ। ଏହା ସୁପ୍ରିମକୋର୍ଟରେ ବହୁ ଗୁରୁତ୍ୱପୂର୍ଣ୍ଣ ଜନସ୍ବାର୍ଥ ମାମଲା ଦାୟର କରିଥିଲା। ୨୦୧୮ ରେ ସେ ’ମାଷ୍ଟର ଅଫ ରୋଷ୍ଟର’ ବ୍ୟବସ୍ଥାରେ ପରିବର୍ତ୍ତନ ଆଣିବାକୁ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରିଥିଲେ। ଜଣାଶୁଣା ଓକିଲ ତଥା ଆକ୍ଟିଭିଷ୍ଟ ପ୍ରଶାନ୍ତ ଭୂଷଣ ତାଙ୍କ ପୁଅ।
ଶାନ୍ତି ଭୂଷଣ କଂଗ୍ରେସ (ଓ) ଏବଂ ପରେ ଜନତା ଦଳର ସଦସ୍ୟ ଥିଲେ। ସେ ରାଜନୈତିକ ଜୀବନରେ ମଧ୍ୟ ରାଜ୍ୟ ସଭା ଏମ୍ପି ଥିଲେ। ସେ ୧୯୮୦ ରେ ଭାରତୀୟ ଜନତା ଦଳରେ ଯୋଗ ଦେଇଥିଲେ ଏବଂ ୧୯୮୬ ରେ ଭାଜପାରୁ ଇସ୍ତଫା ଦେଇଥିଲେ। ସେ ତାଙ୍କ ପୁଅ ପ୍ରଶାନ୍ତ ଭୂଷଣଙ୍କ ସହ ୨୦୧୨ ରେ ଆମ ଆଦମୀ ପାର୍ଟିର ଅନ୍ୟତମ ପ୍ରତିଷ୍ଠାତା ସଦସ୍ୟ ଥିଲେ। ପରେ ସେ ପାର୍ଟୀରୁ ଅଲଗା ହୋଇଥିଲେ।
