କୋରାପୁଟ, ୨୦।୪: (ସ୍ବ.ପ୍ର.) ଭାରତର ରାଜଧାନୀ ଦିଲ୍ଲୀରେ ହାତଧୁଆ ବାର୍ତ୍ତା ବାଣ୍ଟିବେ କୋରାପୁଟର ଦୃଷ୍ଟିବାଧିତ ଛାତ୍ର ଶାନ୍ତନୁ ହୋୟାଲ। ଜିଲାର କେତେ ଜଣ ଦୃଷ୍ଟିବାଧିତ ଛାତ୍ରୀଛାତ୍ରଙ୍କ ମଧ୍ୟରେ ହାତଧୁଆର ଆବଶ୍ୟକତା ଓ ପ୍ରକ୍ରିୟା ସମ୍ପର୍କରେ ସଚେତନତା ସୃଷ୍ଟି ପାଇଁ ଗତ କିଛି ମାସ ତଳେ ଏକ ସ୍ବତନ୍ତ୍ର ଅଭିଯାନ ଆରମ୍ଭ ହୋଇଥିଲା। ବତ୍ତର୍ର୍ମାନ ଏ ସମ୍ପର୍କିତ ଏକ ପରୀକ୍ଷା ଦିଲ୍ଲୀଠାରେ ଦେବାକୁ ଯୋଗ୍ୟ ବିବେଚିତ ହୋଇଛନ୍ତି ଶାନ୍ତନୁ। ଏଥିପାଇଁ ସେ ବୁଧବାର ସେ ଦିଲ୍ଲୀ ଯାତ୍ରା କରିଛନ୍ତି। ପ୍ରତ୍ୟେକ ଶିଶୁଙ୍କ ମଧ୍ୟରେ ନିଜକୁ ବ୍ୟକ୍ତ କରିବାର ସମ୍ଭାବନା ରଖିଥିବା ଶାନ୍ତନୁଙ୍କ ଦୃଢ ମନୋବଳ ତାଙ୍କୁ ଆଗକୁ ବଢିବାର ପ୍ରେରଣା ଦେଇଛି। ଦୃଷ୍ଟିବାଧିତ ବିଦ୍ୟାଳୟରେ ନବମ ଶ୍ରେଣୀରେ ପଢୁଥିବା ଏହି ଛାତ୍ରଙ୍କ କାର୍ଯ୍ୟଶୈଳୀ ଜିଲା ପାଇଁ ଗର୍ବ ଆଣି ଦେଇଛି। ଭାରତର ବିଭିନ୍ନ ରାଜ୍ୟରୁ ଦିଲ୍ଲୀ ଆସିଥିବା ଦୃଷ୍ଟିଶକ୍ତିବାଧିତ ଛାତ୍ର ଦିଲ୍ଲୀରେ ହାତଧୁଆର ଗୁରୁତ୍ୱ ସମ୍ପର୍କରେ ଆଲୋଚନା କରିବେ ବୋଲି ସେଭ୍ ଦି ଚିଲ୍ଡ୍ରେନ ସଙ୍ଗଠନର ପ୍ରକଳ୍ପ ସଂଯୋଜକ ବିଦ୍ୟାଧର ମେହେର ସୂଚନା ଦେଇଛନ୍ତି। କୋଭିଡ ପରବର୍ତ୍ତୀ ପର୍ଯ୍ୟାୟରେ ପ୍ରାଥମିକ ସ୍ବାସ୍ଥ୍ୟ ସୁରକ୍ଷା ନିଶ୍ଚିତ କରିବାର ଏକ ପ୍ରମୁଖ ଆବଶ୍ୟକତାକୁ ଦୃଷ୍ଟିରେ ରଖି କିଛି ମାସ ତଳେ ସେଭ୍ ଦି ଚିଲଡ୍ରେନ ସଙ୍ଗଠନ ପକ୍ଷରୁ ଦୃଷ୍ଟିବାଧିତ ବିଦ୍ୟାଳୟର ଛାତ୍ରୀଛାତ୍ରଙ୍କ ମଧ୍ୟରେ ହାତଧୁଆର ଆବଶ୍ୟକତା ଓ ପ୍ରକ୍ରିୟା ନେଇ ସଚେତନତା ସୃଷ୍ଟି ଲାଗି ଏକ ଅଭିଯାନ ଆରମ୍ଭ ହୋଇଥିଲା ା ଏହି ଅଭିଯାନରେ ଆୟୋଜିତ ଏକ ବକ୍ତୃତା ପ୍ରତିଯୋଗିତାରେ ଉତ୍ତମ ପ୍ରଦର୍ଶନ କରିବାରେ ଶାନ୍ତନୁ ସଫଳ ହୋଇଥିଲେ। ସଂସ୍ଥା ପକ୍ଷରୁ ତାଙ୍କୁ ଏକ ପ୍ରମୁଖ ଚାଇଲଡ୍ ଏଡୁକେଟର ଭାବେ ଚୟନ କରାଯାଇଥିଲା। ପରେ ଶାନ୍ତନୁ ହାତଧୁଆର ୧୦ଟି ସୋପାନ ସମ୍ପର୍କରେ ଅଧିକ ଜ୍ଞାନ ଆହରୋଣ କରି ତାକୁ ବିଦ୍ୟାଳୟର ସମସ୍ତ ଛାତ୍ରୀଛାତ୍ରଙ୍କ ମଧ୍ୟରେ ସଚେତନତା ସୃଷ୍ଟି କରିଥିଲେ। ନିକଟରେ ସେଭ୍ ଦି’ ଚିଲଡ୍ରେନର ବରିଷ୍ଠ କର୍ମକର୍ତ୍ତା ଏହି ବିଦ୍ୟାଳୟ ପରିଦର୍ଶରେ ଆସି ଶାନ୍ତନୁଙ୍କ ପାରିଦର୍ଶିତା ଓ କାର୍ଯ୍ୟ ଦେଖି ସନ୍ତୋଷ ବ୍ୟକ୍ତ କରିଥିଲେ। ଦିଲ୍ଲୀରେ ଏକ ନୂତନ ଅନୁଭୂତି ଲାଭ କରିବା ସହ ଦେଶର ବିଭିନ୍ନ ସ୍ଥାନରୁ ଆସିଥିବା ଦୃଷ୍ଟିବାଧିତ ପିଲାଙ୍କ ସହ ମିଶି କୋରାପୁଟର କଥାକୁ ସେଠାରେ କହିବାର ସୁଯୋଗ ମିଳିବ ବୋଲି ଶାନ୍ତନୁ କହିଛନ୍ତି। ଶାନ୍ତନୁଙ୍କୁ ଦୃଷ୍ଟିବାଧିତ ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀଙ୍କ ସମେତ ଅନ୍ୟମାନେ ଶୁଭେଚ୍ଛା ଜଣାଇଛନ୍ତି।
