ନୂଆଦିଲ୍ଲୀ,୧୬।୧: ମହାକୁମ୍ଭ ସୁନ୍ଦରୀ ହର୍ଷା ରିଚାରିଆ ଓ ଶଙ୍କରାଚାର୍ଯ୍ୟ ମଧ୍ୟରେ ତେଜିଛି ବିବାଦ। ଅମୃତ ସ୍ନାନ ପରେ ସେ ମହାମଣ୍ଡଳେଶ୍ୱରଙ୍କ ରାଜକୀୟ ରଥରେ ବସିଥିବାରୁ ପ୍ରଶ୍ନ ଉଠାଇଛନ୍ତି ଜ୍ୟୋତିଷ ପୀଠର ଶଙ୍କରାଚାର୍ଯ୍ୟ ସ୍ବାମୀ ଅଭିମୁକ୍ତେଶ୍ୱରାନନ୍ଦ ସରସ୍ବତୀ। ଯାହାକୁ କଡା ଜବାବ ଦେଇଛନ୍ତି ହର୍ଷା। ଶଙ୍କରାଚାର୍ଯ୍ୟ କହିଥିଲେ ଯେ, ଏପରି ପରମ୍ପରା ଆରମ୍ଭ କରିବା ଭୁଲ। ଏହା ଏକ ବିକୃତ ମାନସିକତାର ପରିଣାମ। ମହାକୁମ୍ଭରେ, ମୁହଁର ସୌନ୍ଦର୍ଯ୍ୟ ନୁହେଁ, ହୃଦୟର ସୌନ୍ଦର୍ଯ୍ୟ ଦେଖିବା ଉଚିତ।
ଯାହାକୁ ନେଇ ଜବାବ ରଖିଛନ୍ତି ହର୍ଷା। ସେ କହିଛନ୍ତି, ଯଦି ଆପଣ ମୋର ପୂର୍ବ ସାକ୍ଷାତକାରଗୁଡ଼ିକ ଦେଖନ୍ତି, ମୁଁ କେବେ କୌଣସି ସ୍ଥାନରେ କହିନାହିଁ ଯେ ମୁଁ ଜଣେ ସାଧ୍ୱୀ। ଏହି କଥା ଗଣମାଧ୍ୟମରେ ଦେଖାଯାଉଛି ଏବଂ କୁହାଯାଉଛି, ଯାହାକୁ ମୁଁ ଠିକ ମନେ କରୁନାହିଁ। ମୁଁ ସାଧ୍ୱୀ ହେବା ପାଇଁ ଆବଶ୍ୟକୀୟ ତପସ୍ୟା, ଦୀକ୍ଷା ଏବଂ ଶିକ୍ଷା ମୁଁ କରିନାହିଁ। ମୁଁ ଏପର୍ଯ୍ୟନ୍ତ ଏହା ବିଷୟରେ ଭାବି ବି ନାହିଁ। ମୁଁ କେବଳ ମୋ ଧର୍ମର ପ୍ରଚାର କରିବାକୁ ଏବଂ ଯୁବକମାନଙ୍କୁ ମୋ ଧର୍ମ ପ୍ରତି ଆକର୍ଷିତ କରିବାକୁ ଚାହୁଁଛି। ମୁଁ କେବଳ ସନାତନ ଧର୍ମ ପାଇଁ କାମ କରିବାକୁ ଚାହୁଁଛି।
ପ୍ରୟାଗରାଜର ମହାକୁମ୍ଭରେ ଚର୍ଚ୍ଚାର ବିଷୟ ପାଲଟିଥିବା ମଡେଲ ଏବଂ ଆଙ୍କର ହର୍ଷା ରିଚାରିଆଙ୍କୁ ନେଇ ଏବେ ଏକ ନୂତନ ବିବାଦ ମୁଣ୍ଡ ଟେକିଛି। ମହାକୁମ୍ଭ ପୂର୍ବରୁ ହର୍ଷାଙ୍କୁ ଅମୃତ ସ୍ନାନରେ ସାମିଲ କରିବା ଏବଂ ତାଙ୍କୁ ମହାମଣ୍ଡଳେଶ୍ୱରଙ୍କ ରାଜକୀୟ ରଥରେ ବସାଇବା ନେଇ ବିବାଦ ଉପୁଜିଛି। ଏହାକୁ ନେଇ ଶଙ୍କରାଚାର୍ଯ୍ୟ ଅସନ୍ତୋଷ ପ୍ରକାଶ କରିଛନ୍ତି। ସେ ସିଧାସଳଖ ହର୍ଷାଙ୍କୁ ଟାର୍ଗେଟ କରିଛନ୍ତି। ଜ୍ୟୋତିଷ ପୀଠର ଶଙ୍କରାଚାର୍ଯ୍ୟ ସ୍ବାମୀ ଅଭିମୁକ୍ତେଶ୍ୱରାନନ୍ଦ ସରସ୍ବତୀ ଏନେଇ ପ୍ରଶ୍ନ ଉଠାଇଛନ୍ତି।
ଶଙ୍କରାଚାର୍ଯ୍ୟ କହିଛନ୍ତି ଯେ, ମହାକୁମ୍ଭରେ ଏପରି ପରମ୍ପରା ଆରମ୍ଭ କରିବା ସମ୍ପୂର୍ଣ୍ଣ ଭୁଲ। ଏହା ଏକ ବିକୃତ ମାନସିକତାର ପରିଣାମ। ମହାକୁମ୍ଭରେ, ମୁହଁର ସୌନ୍ଦର୍ଯ୍ୟ ନୁହେଁ, ହୃଦୟର ସୌନ୍ଦର୍ଯ୍ୟ ଦେଖିବା ଉଚିତ ଥିଲା। ଯିଏ ଏପର୍ଯ୍ୟନ୍ତ ସାଧ୍ୱୀ ହେବାକୁ ନିଷ୍ପତ୍ତି ନେଇନାହାଁନ୍ତି, ଯିଏ ସନ୍ନ୍ୟାସ ଦୀକ୍ଷା ନେବାକୁ ଓ ବିବାହ ଉପରେ କୌଣସି ନିଷ୍ପତ୍ତି ନେଇ ନାହାନ୍ତି, ତାଙ୍କୁ ସନ୍ଥ ଏବଂ ମହାତ୍ମାଙ୍କ ରାଜକୀୟ ରଥରେ ସ୍ଥାନ ଦେବା ଉପଯୁକ୍ତ ନୁହେଁ। ଯଦି ସେ ଭକ୍ତ ଭାବରେ ଅଂଶଗ୍ରହଣ କରିଥାନ୍ତେ, ତେବେ ଠିକ ହୋଇଥାନ୍ତା, କିନ୍ତୁ ଗର୍ଦ୍ଦଭ ପୋଷାକ ପିନ୍ଧି ରାଜ ରଥରେ ବସିବା ସମ୍ପୂର୍ଣ୍ଣ ଭୁଲ।
ସନାତନ ପ୍ରତି ସମର୍ପଣ ରହିବା ଆବଶ୍ୟକ। ମହାକୁମ୍ଭରେ, ମୁହଁର ସୌନ୍ଦର୍ଯ୍ୟ ନୁହେଁ, ମନର ସୌନ୍ଦର୍ଯ୍ୟ ଦେଖାଯିବା ଉଚିତ ଥିଲା। ଯେପରି ପୋଲିସ ପୋଷାକ କେବଳ ପୋଲିସରେ ନିଯୁକ୍ତି ପାଇଥିବା ଲୋକଙ୍କ ପାଇଁ ଉପଲବ୍ଧ, ସେହିପରି କେବଳ ସନ୍ନ୍ୟାସୀମାନେ ଗଦର୍ଭ ପୋଷାକ ପିନ୍ଧିପାରିବେ ବୋଲି ସେ ଖୋଲାଖୋଲି ହର୍ଷାଙ୍କୁ ଟାର୍ଗେଟ କରିଛନ୍ତି।
କହିରଖୁଛୁ କି, ହର୍ଷା ରିଚାରିଆ ନିରଞ୍ଜନୀ ଆଖଡ଼ାର ମହାମଣ୍ଡଳେଶ୍ୱର କୈଳାସାନନ୍ଦ ମହାରାଜଙ୍କ ଜଣେ ଶିଷ୍ୟା ଏବଂ ମୂଳତଃ ସେ ମଧ୍ୟପ୍ରଦେଶର ରାଜଧାନୀ ଭୋପାଳର ବାସିନ୍ଦା। ସାଧ୍ୱୀ ହେବା ବ୍ୟତୀତ, ହର୍ଷା ଜଣେ ସୋସିଆଲ ମିଡିଆ ଇନଫ୍ଲୁଏନସର। ତାଙ୍କର ଭାଇରାଲ ଭିଡିଓ ଏବଂ ଫଟୋ ଦେଖି ତାଙ୍କ ପ୍ରଶଂସକମାନେ ତାଙ୍କୁ ମହାକୁମ୍ଭ ୨୦୨୫ ଫେମ ଉପାଧୀ ଦେଉଛନ୍ତି। ହର୍ଷା ରିଚାରିଆ ଜଣେ ସାଧ୍ୱୀ ହୋଇଥିବାରୁ ରାତାରାତି ପ୍ରସିଦ୍ଧ ହୋଇଥିଲେ କେବଳ ତାହା ନୁହେଁ, ବରଂ ସୋସିଆଲ ମିଡିଆରେ ତାଙ୍କର ଭାଇରାଲ ହେବା ଏବଂ ଫଲୋଅର୍ସ ବୃଦ୍ଧି ହେବାର ସବୁଠାରୁ ବଡ଼ କାରଣ ହେଉଛି ତାଙ୍କର ସୌନ୍ଦର୍ଯ୍ୟ। ୨୦୨୫ ମହାକୁମ୍ଭକୁ ଆସୁଥିବା ହର୍ଷା ରିଚାରିଆଙ୍କୁ ସବୁଠାରୁ ସୁନ୍ଦରୀ ସାଧ୍ୱୀ ବୋଲି କୁହାଯାଉଛି।
ଜାନୁଆରୀ ୧୩ ତାରିଖରେ ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ପ୍ରାୟ ୬୬୭ ହଜାର ଫଲୋଅର୍ସ ଥିଲେ, ଯେତେବେଳେ ଜାନୁଆରୀ ୧୪ ତାରିଖରେ ହଠାତ ଗୋଟିଏ ଦିନରେ ତାଙ୍କ ଫଲୋଅର୍ସଙ୍କ ସଂଖ୍ୟା ବୃଦ୍ଧି ପାଇ ୧୦ ଲକ୍ଷରେ ପହଞ୍ଚିଛି। ସାଧ୍ୱୀ ଭାବରେ ଭାଇରାଲ ହେବା ପରେ, ଲୋକମାନେ ହର୍ଷା ରିଚାରିଆଙ୍କ ପୁରୁଣା ଫଟୋ ଏବଂ ଭିଡିଓ ମଧ୍ୟ ଶେୟାର କରୁଛନ୍ତି। ଏସବୁରେ, ସେ କିଛିରେ ଆଙ୍କରିଂ କରୁଥିବା, କିଛି ଭକ୍ତିପୂର୍ଣ୍ଣ ଆଲବମରେ ଅଭିନୟ କରୁଥିବା ଏବଂ ଇନଷ୍ଟାଗ୍ରାମରେ କିଛି କଣ୍ଟେଣ୍ଟ କରୁଥିବାର ଦେଖାଯାଉଛି।
