ବଅଁରପାଳ, ୨୩ା୧୦(ଡି.ଏନ.ଏ.)
ଚଳିତ ବର୍ଷ ଆଡମ୍ବରବିହୀନ ହେବ ଅନୁଗୋଳ ଜିଲା ବଅଁରପାଳ ବ୍ଲକ ତଳମୂଳସ୍ଥିତ ଦୁର୍ଗା ପୂଜା। ପ୍ରସିଦ୍ଧ ଦୁର୍ଗା ଦେବୀ ମନ୍ଦିରରେ ସବୁ ବର୍ଷ ଜାକଜମକରେ ପୂଜା ପାଳନ କରାଯାଉଥିବାବେଳେ ଏ ବର୍ଷ ଉତ୍ସବ ଫିକା ପଡିବ। ଶକ୍ତିପୀଠ ପୂର୍ବ ଭଳି ଆଲୋକମାଳାରେ ଝଲସିବନି କି ଶ୍ରଦ୍ଧାଳୁମାନେ ମାନସିକ ନେଇ ଏଠାକୁ ଆସିବେନି। କରୋନା ଯୋଗୁ କେବଳ ବିଧି ଅନୁଯାୟୀ ପୂଜା ନୀତି ପାଳନ କରାଯିବ ବୋଲି ସ୍ଥିର ହୋଇଛି।
ସବୁଜ ଶସ୍ୟକ୍ଷେତ, ମନ୍ଦାକିନୀ ନଦୀ କୂଳରେ ଅବସ୍ଥିତ ଏହି ପୀଠରେ ଏକାଠି ପୂଜା ପାଆନ୍ତି ଦୁର୍ଗାମାଧବ। ବହୁ ମନୋବାଞ୍ଛା ନେଇ ଶ୍ରଦ୍ଧାଳୁ ଏଠାକୁ ପୂଜା କରିବାକୁ ଆସୁଥିବାବେଳେ ଚଳିତ ବର୍ଷ କିନ୍ତୁ ଆଉ ଲୋକଙ୍କ ଗହଳି ଦେଖିବାକୁ ମିଳିବନି।
କୋଭିଡ୍ କଟକଣା ଭିତରେ ବିଧି ଅନୁଯାୟୀ ପୂଜା ଅନୁଷ୍ଠିତ ହେବ। ତେବେ ଗତ ୧୭ ତାରିଖ ନବରାତ୍ରଠାରୁ ପୀଠରେ ମା’ ବିଭିନ୍ନ ବେଶରେ ପୂଜା ପାଉଛନ୍ତି। ପ୍ରଥମ ଦିନରେ ତାରା ବେଶ, ଦ୍ୱିତୀୟ ଦିନରେ ବଗଳାମୁଖୀ, ତୃତୀୟ ଦିନରେ ଷୋଡଶୀ ବେଶ, ଚତୁର୍ଥ ଦିନରେ ଭୈରବୀ ଏବଂ ୫ମ ଦିନରେ ଦେବୀ ମାତଙ୍ଗୀ, ଷଷ୍ଠୀରେ ଧୂମାବତୀ ବେଶରେ ଦେବୀ ପୂଜା ପାଇଛନ୍ତି। ସପ୍ତମୀରେ ଭୁବନେଶ୍ୱରୀ, ଅଷ୍ଟମୀରେ ଛିନ୍ନମସ୍ତ, ନବମୀରେ କାତ୍ୟାୟନୀ ଏବଂ ଦଶମୀରେ ମହିଷମର୍ଦ୍ଦିନୀ ବେଶରେ ପୂଜା ପାଇବେ। ନବମୀ ତିଥିରେ ଭଲେଲେଶ୍ବର ମନ୍ଦିରରୁ କନକ ଦୁର୍ଗାଙ୍କୁ ମନ୍ଦିରକୁ ଅଣାଯିବା ପରେ ପୀଠରେ ଦୁର୍ଗାମାଧବ ଓ କନକ ଦୁର୍ଗାଙ୍କ ମିଳନ ହୋଇଥାଏ। ଏଥିସହ ଦଶମୀରେ ଦଶହରା ପଡିଆରେ ପାଇକଖେଳ ଜମିଥାଏ। କିନ୍ତୁ କରୋନା ଯୋଗୁ ଚଳିତ ବର୍ଷ ମହାମିଳନ ନିରାଡମ୍ବର କରାଯିବ। ସମସ୍ତ ପୂଜା ବିଧି ୭ ଜଣଙ୍କ ଉପସ୍ଥିତିରେ ପାଳନ କରାଯିବ ବୋଲି ମନ୍ଦିର କମିଟି ପକ୍ଷରୁ କୁହାଯାଇଛି।
ମନରେ ଉତ୍ସାହ ନାହିଁ
ଦଶହରାରେ ଉତ୍ସବମୁଖର ହୋଇଉଠେ ପୀଠ। ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ପୂଜା ସହ ମା’ଙ୍କ ଦର୍ଶନ କରନ୍ତି। କିନ୍ତୁ ଚଳିତ ବର୍ଷ କରୋନା ଯୋଗୁ ପୂଜା ଫିକା ପଡିବ। ଜନସମାଗମ ମଧ୍ୟ ସେପରି ହେବାର ନାହିଁ। ସେଥିପାଇଁ ଶ୍ରଦ୍ଧାଳୁଙ୍କ ମନରେ ଉତ୍ସାହ ନାହିଁ।
-ଅକ୍ଷୟ କୁମାର ମହାପାତ୍ର, ପୂଜକ
ଅନିଶ୍ଚିତତାରେ ପାଇକଖେଳ
ଚଳିତ ଥର ପାଇକଖେଳ ଅନିଶ୍ଚିତତା ଭିତରେ ରହିଛି। ବିଭିନ୍ନ ଅଞ୍ଚଳରୁ ପାଇକ ଖେଳାଳିମାନେ ଆସି ଦଶହରା ପଡିଆରେ ଖେଳ କସରତ କରନ୍ତି। ହେଲେ କରୋନା ଯୋଗୁ ଏହି ପରମ୍ପରା ବନ୍ଦ ହୋଇଯିବା ନେଇ ଆଶଙ୍କା ପ୍ରକାଶ ପାଇଛି।
-ଶ୍ରୀକାନ୍ତ ଦାସ, ଗ୍ରାମବାସୀ
କଟକଣା
ମାନିବାକୁ ପଡ଼ିବ
କରୋନା ଯୋଗୁ ଚଳିତବର୍ଷ ପୂଜାର ଚମକ କମିଛି। ସବୁବର୍ଷ ମିଳିମିଶି ଆନନ୍ଦରେ ପାଳନ କରାଯାଉଥିବା ପୂଜା ଏଥର ନିରାଡମ୍ବର ହେବ। ତଥାପି ସରକାର ଲଗାଇଥିବା କଟକଣା ସମସ୍ତଙ୍କୁ ମାନିବାକୁ ପଡ଼ିବ।
-ସଞ୍ଜୟ ବିଶୋଇ ସିଂ, ଗ୍ରାମବାସୀ
