ନୂଆଦିଲ୍ଲୀ,୨୬।୪: ଲୋକ ସଭା ନିର୍ବାଚନ ପାଇଁ ଚାଲିଥିବା ଦ୍ୱିତୀୟ ପର୍ଯ୍ୟାୟ ମତଦାନ ମଧ୍ୟରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କଂଗ୍ରେସକୁ ଟାର୍ଗେଟ କରିଛନ୍ତି। ସେ ଦାବି କରିଛନ୍ତି ଯେ କଂଗ୍ରେସ ଘୋଷଣାପତ୍ର ପ୍ରକାଶ ପାଇବା ପରେ ଭାଜପା ପ୍ରତି ଲୋକଙ୍କ ସମର୍ଥନ ପୂର୍ବ ଅପେକ୍ଷା ଅଧିକ ବୃଦ୍ଧି ପାଇଛି। ସେ ପ୍ରଶ୍ନ କରିଛନ୍ତି ଯେ ଯଦି ପର୍ସନାଲ ଲ’କୁ ଆଗକୁ ନିଆଯାଏ, ତେବେ ଦେଶ କେଉଁ ଆଧାରରେ ଚାଲିବ।
ଅମିତ ଶାହା କହିଛନ୍ତି, କଂଗ୍ରେସ ପୁଣିଥରେ ଘୋଷଣାପତ୍ରରେ ପୁରୁଣା ଅଭ୍ୟାସକୁ ପୁନରାବୃତ୍ତି କରିଛି। କଂଗ୍ରେସର ମନିଫେଷ୍ଟୋରେ କୁହାଯାଇଛି ଯେ ଆମେ ବ୍ୟକ୍ତିଗତ ଆଇନକୁ ଆଗକୁ ନେବୁ। ମୁଁ ରାହୁଲ ଗାନ୍ଧୀଙ୍କୁ ପ୍ରଶ୍ନ କରିବାକୁ ଚାହୁଁଛି ଯେ ଯଦି ଆପଣ ବ୍ୟକ୍ତିଗତ ଆଇନକୁ ଆଗକୁ ନିଅନ୍ତି, ତେବେ ଦେଶ କେଉଁ ଆଧାରରେ ଚାଲିବ। ଏହି ଦେଶରେ ଆପଣ କେଉଁ ପ୍ରକାର ଧର୍ମନିରପେକ୍ଷ ସମ୍ବିଧାନ ଚାହୁଁଛନ୍ତି। ଧର୍ମ ଆଧାରରେ ଦେଶରେ ଆଇନ ତିଆରି ହୋଇପାରିବ ନାହିଁ।
ସେ ଆହୁରି ମଧ୍ୟ କହିଛନ୍ତି, ଭାଜପା ଏହାର ମନିଫେଷ୍ଟୋରେ କହିଛି ଯେ ଏହା ୟୁନିଫର୍ମ ସିଭିଲ କୋର୍ଡ ଆଣିବ। ସମସ୍ତ ଧର୍ମ ପାଇଁ ଗୋଟିଏ ନିୟମ ରହିବ। ଆମେ ଟ୍ରିପଲ ତାଲାକ ସମାପ୍ତ କଲୁ । ଦେଶ କୌଣସି ଧର୍ମର ନିୟମ ଅନୁଯାୟୀ ଚାଲିବ ନାହିଁ। ଏହି ଲୋକ ସଭା ନିର୍ବାଚନରେ ଭାଜପା ଜିତିବ। ମୋର ସମ୍ପୂର୍ଣ୍ଣ ଆତ୍ମବିଶ୍ୱାସ ରହିଛି ଯେ ନରେନ୍ଦ୍ର ମୋଦି ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବରେ ଶପଥ ଗ୍ରହଣ କରିବେ।