ମୁମ୍ବାଇ: ବଲିଉଡ ବାଦଶାହା ଶାହରୁଖ ଖାଁ ପ୍ରଥମ ଥର ପାଇଁ ତାଙ୍କ ଝିଅ ସୁହାନାଙ୍କ ସହ ବଡ ପରଦାରେ ନଜର ଆସିବାକୁ ଯାଉଛନ୍ତି। ଏହା ଏକ ନୂଆ କଥା ନୁହେଁ, ଯେତେବେଳେ ଗୋଟିଏ ପରିବାରର ଦୁଇଜଣ ଲୋକ ଏକାଠି ଫ୍ରେମରେ ନଜର ଆସିବେ। ରିୟଲ ଲାଇଫର ବାପା-ପୁଅ କିମ୍ବା ଭାଇଭଉଣୀମାନେ ସ୍କ୍ରିନ ଶେୟାର କରି ସାରିଛନ୍ତି। ଏବେ ଶାହରୁଖ ଏବଂ ତାଙ୍କ ଝିଅ ସୁହାନା ଖାଁଙ୍କ ଗୋଟିଏ ଫିଲ୍ମରେ ନଜର ଆସିବା ଖବର ମଧ୍ୟ କିଛି ମାସ ପୂର୍ବରୁ ଆସିଥିଲା।
ତେବେ ଏହା ପରେ ତାଙ୍କ ଫିଲ୍ମ ବିଷୟରେ କୌଣସି ଆଲୋଚନା ହୋଇନଥିଲା। ବର୍ତ୍ତମାନ ପୁଣି ଥରେ ଉଭୟ ଚର୍ଚ୍ଚାରେ ଅଛନ୍ତି, କାରଣ ସେମାନଙ୍କ ନିକଟ ସୂତ୍ର ଅନୁଯାୟୀ ଉଭୟ ଖୁବ ଶୀଘ୍ର ଫିଲ୍ମର ସୁଟିଂ ଆରମ୍ଭ କରିବାକୁ ଯାଉଛନ୍ତି। ଏହି ଫିଲ୍ମର ନିର୍ଦ୍ଦେଶନା ଦେଉଛନ୍ତି ଜାନେ ଜାନ ଏବଂ କାହାଣୀ ଫିଲ୍ମର ନିର୍ଦ୍ଦେଶକ ସୁଜାୟ ଘୋଷ। ଏହାପୂର୍ବରୁ ସେ ସେପ୍ଟେମ୍ବରରେ ଜାନେ ଜାନ ରିଲିଜ ହେବା ପରେ ହିଁ ଏହି ଫିଲ୍ମର ସୁଟିଂ ଆରମ୍ଭ କରିବାକୁ ଯାଉଥିଲେ। କିନ୍ତୁ ଲେଖକ ଫିଲ୍ମର ସ୍କ୍ରିପ୍ଟକୁ ଆହୁରି ଉନ୍ନତ କରିବାକୁ ଚାହୁଁଥିଲେ। ଏଥିପାଇଁ ତାଙ୍କୁ ସମୟ ଆବଶ୍ୟକ ଥିଲା, କାରଣ ସେ ଏହି ଫିଲ୍ମର ମହତ୍ତ୍ୱ ଜାଣନ୍ତି।
ଶାହାରୁଖ ପ୍ରଥମ ଥର ପାଇଁ ତାଙ୍କ ଝିଅ ସହିତ ଏକ ଫିଲ୍ମ କରିବା ତାଙ୍କ ପ୍ରଶଂସକଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ। ସେଥିପାଇଁ ସେ ସ୍କ୍ରିପ୍ଟରେ କୌଣସି କମି ଛାଡିବାକୁ ଚାହାଁନ୍ତି ନାହାଁନ୍ତି। ଚଳିତ ବର୍ଷ ଶାହାରୁଖ ଏବଂ ତାଙ୍କ ପରିବାର ପାଇଁ ବହୁତ ବ୍ୟସ୍ତର ବର୍ଷ ରହିଛି। ଗୋଟିଏ ପଟେ ପଠାନ ଏବଂ ଯବାନ ପରେ ଅଭିନେତାଙ୍କ ତୃତୀୟ ମୁଭି ଡଙ୍କି ଡିସେମ୍ବର ୨୧ରେ ରିଲିଜ ହେବାକୁ ଯାଉଛି। ଏଥି ସହିତ ସୁହାନା ତାଙ୍କ ଫିଲ୍ମ ଦି ଆର୍ଚିଜ ସହିତ ଅଭିନୟ ଆରମ୍ଭ କରିବାକୁ ଯାଉଛନ୍ତ।
ଡିସେମ୍ବର ୭ରେ ତାଙ୍କ ଫିଲ୍ମ ନେଟଫ୍ଲିକ୍ସରେ ମୁକ୍ତିଲାଭ କରିବ। ଉଭୟ ନିଜ ମୁଭିର ପ୍ରମୋସନରେ ବ୍ୟସ୍ତ ଅଛନ୍ତି। ଏଭଳି ପରିସ୍ଥିତିରେ ସେ ସୁଜୟଙ୍କ ଗୁପ୍ତଚର ଥ୍ରୀଲର ଫିଲ୍ମର ସୁଟିଂ ଆରମ୍ଭ କରିବାକୁ ମଧ୍ୟ ସମୟ ପାଇନଥିଲେ। ସେମାନଙ୍କର ମୁଭି ରିଲିଜ ହେବା ପରେ ଦୁହେଁ ଏକାଠି ବସି ଡିସେମ୍ବର ଶେଷରେ ଏହି ବିନା ଟାଇଟଲ ଫିଲ୍ମର ସ୍କ୍ରିପ୍ଟ ପଢିବେ। ଏହି ଫିଲ୍ମର ସୁଟିଂ ଆସନ୍ତା ବର୍ଷ ଜାନୁୟାରୀ ଶେଷ କିମ୍ବା ଫେବୃୟାରୀ ଆରମ୍ଭରୁ ଆରମ୍ଭ ହେବ।
