ଓଟ୍ଟାଓ୍ବା,୩୦ା୧୦: କାନାଡାରେ ଶିଖ୍ ବିଚ୍ଛିନ୍ନତାବାଦୀ ନେତାମାନଙ୍କୁ ଟାର୍ଗେଟ କରିବା ପାଇଁ ହିଂସା, ଧମକ ଓ ଗୋଇନ୍ଦା ତଥ୍ୟ ସଂଗ୍ରହର ଏକ ଅଭିଯାନ ଚଳାଇବାକୁ ଭାରତର ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ନିର୍ଦ୍ଦେଶ ଦେଇଥିବା ଓଟ୍ଟାଓ୍ବା ପକ୍ଷରୁ କୁହାଯାଇଛି। ଏହି ଅଭିଯୋଗ ଭାରତ-କାନାଡା ସମ୍ପର୍କରେ ଆହୁରି ତିକ୍ତତା ଭରିଦେଇପାରେ ବୋଲି ମନେକରାଯାଉଛି।
କାନାଡା ବହିର୍ବ୍ୟାପାର ଉପମନ୍ତ୍ରୀ ଡାଭିଡ୍ ମୋରିସନ୍ ଜାତୀୟ ସୁରକ୍ଷା କମିଟିର ପାର୍ଲାମେଣ୍ଟ ସଦସ୍ୟମାନଙ୍କୁ କହିଛନ୍ତି ଯେ, ଅଭିଯୋଗ ସମ୍ପର୍କରେ ପ୍ରଥମେ ପ୍ରକାଶ କରିଥିବା ‘ଓ୍ବାଶିଂଟନ୍ ପୋଷ୍ଟ’କୁ ସେ ଶାହାଙ୍କ ନାମ ଜଣାଇଦେଇଛନ୍ତି। ଜଣେ ସାମ୍ବାଦିକ ମୋରିସନ୍ଙ୍କୁ ଫୋନ୍ କରି ‘ଏହା ସେହି ବ୍ୟକ୍ତି କି’ ବୋଲି ପଚାରିଥିଲେ। ମୋରିସନ୍ ହଁ ଏହା ସେହି ବ୍ୟକ୍ତି ବୋଲି କନ୍ଫର୍ମ କରିଥିଲେ। ତେବେ ଶାହାଙ୍କ ସମ୍ପୃକ୍ତି ନେଇ କାନାଡା କିପରି ଜାଣିବାକୁ ପାଇଲା ତାହା ମୋରିସନ୍ ସ୍ପଷ୍ଟ କରିନାହାନ୍ତି।
ବର୍ଷକ ତଳେ ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ କହିଥିଲେ, ୨୦୨୩ ଜୁନ୍ରେ କାନାଡୀୟ ଶିଖ୍ ଆକ୍ଟିଭିଷ୍ଟ ହରଦୀପ ସିଂ ନିଜ୍ଜାରଙ୍କ ହତ୍ୟା ମାମଲାରେ ଭାରତ ସରକାରଙ୍କ ଏଜେଣ୍ଟମାନଙ୍କ ସମ୍ପୃକ୍ତି ନେଇ କାନାଡା ପାଖରେ ବିଶ୍ୱସନୀୟ ପ୍ରମାଣ ରହିଛି। କାନାଡା କର୍ତ୍ତୃପକ୍ଷ ଏହି ପ୍ରମାଣ ଭାରତୀୟ ପ୍ରତିପକ୍ଷଙ୍କ ସହ ଶେୟାର କରିଥିବା ସୂଚନା ଦେଇଥିଲେ। କିନ୍ତୁ କାନାଡା ଏଭଳି କୌଣସି ପ୍ରମାଣ ଦେଇଥିବା ବିଷୟକୁ ଭାରତ ସରକାର ଲଗାତର ଖଣ୍ଡନ କରିବା ସହ ଅଭିଯୋଗକୁ ଭିତ୍ତିହୀନ ବୋଲି କହିଆସିଛନ୍ତି। ଉଲ୍ଲେଖଯୋଗ୍ୟ, ଅକ୍ଟୋବର ୧୪ରେ କାନାଡା ଭାରତୀୟ ହାଇକମିଶନ ଓ ଅନ୍ୟ ୫ କୂଟନୀତିଜ୍ଞଙ୍କ ବିରୋଧରେ ବିଭିନ୍ନ ଅଭିଯୋଗ ଆଣି ସେମାନଙ୍କୁ ବହିଷ୍କାର କରିଥିଲା।
ବିଦେଶ ମାଟିରେ ଭାରତୀୟ ଅଧିକାରୀମାନେ ହତ୍ୟା ଷଡ଼ଯନ୍ତ୍ର ରଚିଥିବା ନେଇ ଅଭିଯୋଗ ଆଣିବାରେ କାନାଡା ଏକମାତ୍ର ଦେଶ ନୁହେଁ। ଏହା ପୂର୍ବରୁ ଅକ୍ଟୋବର ମଧ୍ୟଭାଗରେ ଆମେରିକାର ନ୍ୟାୟ ବିଭାଗ ମଧ୍ୟ ଭାରତ ସରକାରଙ୍କ ଜଣେ ଅଧିକାରୀଙ୍କ ବିରୋଧରେ ଅନୁରୂପ ଅଭିଯୋଗ ଆଣିଥିଲା। ନ୍ୟୁୟର୍କରେ ରହୁଥିବା ଜଣେ ଶିଖ୍ ବିଚ୍ଛିନ୍ନତାବାଦୀ ନେତାଙ୍କୁ ହତ୍ୟା ଉଦ୍ୟମରେ ବିକାଶ ଯାଦବଙ୍କ ସମ୍ପୃକ୍ତି ଥିବା ନେଇ ଆମେରିକା ଆଣିଥିବା ଅଭିଯୋଗକୁ ମଧ୍ୟ ଭାରତ ଖଣ୍ଡନ କରିଥିଲା।
