ନୂଆଦିଲ୍ଲୀ, ୩।୮ : ଦେଶର ୧୭ ବିରୋଧୀ ଦଳ ଏକଜୁଟ ହୋଇ ୨୦୧୯ ରେ ପ୍ରିଭେନଶନ ଅଫ ମନି ଲଣ୍ଡରିଂ ଆକ୍ଟ (ପିଏମଏଲଏ) ରେ କରାଯାଇଥିବା ସଂଶୋଧନକୁ ସୁପ୍ରିମକୋର୍ଟ ଦେଇଥିବା ନିଷ୍ପତ୍ତିକୁ ବିପଜ୍ଜନକ ବୋଲି କହିଛନ୍ତି। କଂଗ୍ରେସ, ତୃଣମୂଳ କଂଗ୍ରେସ, ଡିଏମକେ, ଆମ ଆଦମୀ ପାର୍ଟି, ସିପିଏମ, ସମାଜବାଦି ପାର୍ଟି ଏବଂ ରାଷ୍ଟ୍ରୀୟ ଜନତା ଦଳ ସମେତ ଅନ୍ୟ କେତେକ ଦଳ ଦସ୍ତଖତ କରିଥିବା ବିବୃତ୍ତିରେ କୁହାଯାଇଛି ଯେ ଏହି ବିପଜ୍ଜନକ ରାୟ ସ୍ବଳ୍ପକାଳୀନ ହେବ ଏବଂ ସାମ୍ବିଧାନିକ ବ୍ୟବସ୍ଥା ମଧ୍ୟ ଶୀଘ୍ର ଫେରି ଆସିବ ବୋଲି ଆମେ ଆଶା କରୁଛୁ।
ଉଲ୍ଲେଖଯୋଗ୍ୟ, ସୁପ୍ରିମକୋର୍ଟ ଗତ ସପ୍ତାହରେ ଦେଇଥିବା ରାୟରେ ସଂଶୋଧିତ ଆଇନ ଅନୁଯାୟୀ ଇଡିକୁ ଦିଆଯାଇଥିବା ବ୍ୟାପକ କ୍ଷମତାର ବୈଧତାକୁ ସମର୍ଥନ କରିଛନ୍ତି। ବିରୋଧୀ ଦଳ ପୁଣିଥରେ ସୁପ୍ରିମକୋର୍ଟ ଯାଇ ଏହି ନିଷ୍ପତ୍ତିର ସମୀକ୍ଷା କରିବାକୁ ପ୍ରସ୍ତୁତ ହେଉଛନ୍ତି।
ବିରୋଧୀ ଦଳ କହିଛନ୍ତି, ନିକଟରେ ସୁପ୍ରିମକୋର୍ଟଙ୍କ ଆଦେଶର ସୁଦୂରପ୍ରସାରୀ ପ୍ରଭାବକୁ ନେଇ ଆମେ ଆମର ଗଭୀର ଚିନ୍ତା ପ୍ରକଟ କରୁଛୁ ଯେଉଁଥିରେ ସୁପ୍ରିମକୋର୍ଟ ପ୍ରିଭେନସନ ଅଫ ମନି ଲଣ୍ଡରିଂ ଆକ୍ଟ ୨୦୦୨ରେ ହୋଇଥିବା ସଂଶୋଧନକୁ ସମ୍ପୂର୍ଣ୍ଣ ରୂପେ ସମର୍ଥନ କରିଥିଲେ ଏବଂ ଏହାର ଯାଞ୍ଚ୍ କରିନାହାଁନ୍ତି। ଫାଇନାନ୍ସ ବିଲ ମାଧ୍ୟମରେ ଏହି ସଂଶୋଧନଗୁଡ଼ିକ ମଧ୍ୟରୁ କିଛି କରାଯାଇଛି ବୋଲି ବିରୋଧୀ ଦଳ କହିଛନ୍ତି ଯେ ଆମେ ଆମର ସୁପ୍ରିମକୋର୍ଟଙ୍କୁ ସମ୍ମାନ ଦେଉଛୁ ଏବଂ ସର୍ବଦା ତାହା କରିବୁ। ତଥାପି ଆମେ ଉଲ୍ଲେଖ କରିବାକୁ ବାଧ୍ୟ ଅଟୁ ଯେ ଫାଇନାନ୍ସ ବିଲ ମାଧ୍ୟମରେ କରାଯାଇଥିବା ସଂଶୋଧନର ଆଇନଗତ ସ୍ବୀକୃତି ବିଚାର କରି ବୃହତ ବେଞ୍ଚର ନିଷ୍ପତ୍ତିକୁ ଅପେକ୍ଷା କରାଯିବା ଉଚିତ।
ପ୍ରତିଶୋଧ ରାଜନୀତିରେ ଏହି ସଂଶୋଧନଗୁଡ଼ିକର ଅପବ୍ୟବହାର କରାଯାଉଛି। ବିରୋଧୀ ଦଳ କହିଛନ୍ତି, ଶୀର୍ଷକୋର୍ଟଙ୍କ ପକ୍ଷରୁ ଏକ ନିରପେକ୍ଷ ନିଷ୍ପତ୍ତି ଦିଆଯାଉ।
