ନିମାପଡ଼ା,୨୬।୧୨(ଡି.ଏନ୍.ଏ.): ପୁରୀ ଜିଲା ପିପିଲି ଅଞ୍ଚଳରେ ଲୁଟେରା ଗ୍ୟାଙ୍ଗ ମାତିଛନ୍ତି। ଗୋଟିଏ ରାତିରେ ଏକାଧିକ ସ୍ଥାନରୁ ଲକ୍ଷାଧିକ ଟଙ୍କାର ସାମଗ୍ରୀ ଲୁଟିନେଇଛନ୍ତି। ଏହି ଲୁଟରୁ ବାଦ ପଡ଼ି ନାହିଁ ଶିକ୍ଷାନୁଷ୍ଠାନ, ଧର୍ମାନୁଷ୍ଠାନ, ସରକାରୀ ଅଫିସ ଏବଂ ସାଧାରଣ ଗରିବ ପରିବାର। ପଞ୍ଚାୟତ ନବୀକରଣ ଓ ପାଠାଗାର ଉଦ୍ଘାଟନର ଦୁଇଦିନ ପରେ କଳା କନା ବୁଲାଇଛନ୍ତି ଲୁଟେରା।ପିପିଲି ଦାଣ୍ଡମକୁନ୍ଦପୁର ପଞ୍ଚାୟତ କାର୍ଯ୍ୟାଳୟରୁ ଏଲ୍ଇଡି, ଇନ୍ଭଟର ସହ ବିଭିନ୍ନ ସରକାରୀ ଦସ୍ତାବିଜ ଚୋରି ହୋଇଛି। ସେହିଭଳି ପଞ୍ଚାୟତ ଅଫିସ ନିକଟରେ ଥିବା ମିଶନ ଶକ୍ତି ମହିଳା ମହାସଂଘ ଘରୁ ୨ଟି ସିଲାଇ ମେଶିନ, ଏକ ଲକ୍ଷ ଟଙ୍କା ମୂଲ୍ୟର କପଡା, ପାଣି ମଟର ଚୋରି ହୋଇଛି। ଏତଦ୍ ବ୍ୟତୀତ ଏକ କମ୍ପ୍ୟୁଟର ଶିକ୍ଷାକେନ୍ଦ୍ରରୁ ସିସିଟିଭି ହାର୍ଡ ଡିସ୍କ, କମ୍ପ୍ୟୁଟର ଚୋରି ମଧ୍ୟ ହୋଇଛି । ଏହା ସହ ସ୍ଥାନୀୟ ଏକ ବସ୍ତିରୁ ଘର କବାଟ ଭାଙ୍ଗି ଟଙ୍କା, ସୁନା ଚୋରି କରିଥିବା ବେଳେ ଭକ୍ତ ଦାସିଆ ପୀଠରୁ ଶ୍ରୀ କୃଷ୍ଣଙ୍କ ଅଷ୍ଠ ଧାତୁରେ ନିର୍ମିତ ବଇଁଶୀ ସମେତ ୫ଟି ଦାନ ହୁଣ୍ଡି ଓ ତେଇଶିପୁର ଗୋପୀନାଥ ମନ୍ଦିରରୁ ମଧ୍ୟ ଲୁଟ ହୋଇଛି । ରାସ୍ତା କଡ଼ ଜନଗହଳି ପୂର୍ଣ୍ଣ ସ୍ଥାନରୁ ତାଲାଭାଙ୍ଗି ଚୋରି ହୋଇଛି। ତେବେ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।
