ପଟ୍ଟାମୁଣ୍ଡାଇ,୧୭।୫(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା। ଜଣେ ଦୃଷ୍ଟିହୀନ ବୃଦ୍ଧ ମଙ୍ଗଳବାର ବାର୍ଦ୍ଧକ୍ୟ ଭତ୍ତା ଟଙ୍କା ମିଳୁ ନ ଥିବା ଅଭିଯୋଗ ନେଇ ୧୧ କିମି ଚାଲି ବ୍ଲକ ଅଫିସ୍ରେ ପହଞ୍ଚିଥିଲେ। କିନ୍ତୁ ସେଠାରେ ପଡ଼ି ଖଣ୍ଡିଆ ଖାବରା ହୋଇଛନ୍ତି। ସେଠାରେ ଉପସ୍ଥିତ ଲୋକେ ତାଙ୍କୁ ବ୍ଲକ ଅଫିସରଙ୍କୁ ଦେଖା କରାଇ ଥିଲେ ମଧ୍ୟ କୌଣସି ସୁଫଳ ନ ପାଇ ଫେରିଯାଇଛନ୍ତି।
ପଟ୍ଟାମୁଣ୍ଡାଇ ବ୍ଲକ କଖାରୁଣୀ ପଞ୍ଚାୟତ ତଳପଡ଼ା ଗ୍ରାମର ଦୃଷ୍ଟିହୀନ ବୃଦ୍ଧ ଦିବାକର ମଲ୍ଲିକ ୩ ମାସର ବାର୍ଦ୍ଧକ୍ୟ ଭତ୍ତା ନ ପାଇ ଦୁଃଖ କଷ୍ଟରେ ଦିନ କାଟୁଛନ୍ତି। ମଙ୍ଗଳବାର ଦିବାକର ପ୍ରାୟ ୧୧ କିମି ବାଟ ଚାଲି ଚାଲି ଆସି ବିଡିଓ ଶୁଭ୍ରାଂଶୁ ସାହୁଙ୍କୁ ଦେଖାକରି ଭତ୍ତା ନ ମିଳିବା ବାବଦରେ ଜଣାଇଥିଲେ। ମାତ୍ର ବିଡିଓ ଏ ବାବଦରେ ବ୍ଲକ ସୋସିଆଲ ସିକୁରିଟି ଅଫିସର (ବିଏସ୍ଏସ୍ଓ)ଙ୍କୁ ଦେଖା କରିବାକୁ କହିଥିଲେ। ଦିବାକର ବିଏସ୍ଏସ୍ଓଙ୍କୁ ଦେଖା କରିବାକୁ ଦୋ ମହଲା ଉପରକୁ ଗୁରୁଣ୍ଡି ଗୁରୁଣ୍ଡି ଯିବା ବେଳେ ପଡ଼ି ଖଣ୍ଡିଆ ଖାବରା ହୋଇଥିଲେ। ସେଠାରେ ଉପସ୍ଥିତ ଲୋକେ ତାଙ୍କୁ ବ୍ଲକ ସୋସିଆଲ ସିକୁରିଟି ଅଫିସରେ ଛାଡି ଦେଇଥିଲେ। ମାତ୍ର ବିଏସ୍ଏସ୍ଓଙ୍କ ଅନୁପସ୍ଥିତ ଥିବାରୁ ଦିବାକର ନିରାଶ ହୋଇଥିଲେ। ସରକାରଙ୍କ ଯୋଜନା ଜନହିତକାରୀ ସତ, କିନ୍ତୁ ଯୋଜନାର ସୁଫଳ ପାଇବାକୁ ଲୋକଙ୍କୁ ଏଭଳି ପରିଣତ ବୟସରେ ହଇରାଣ କରାଯାଉଥିବାର ଦୃଶ୍ୟ ସାମ୍ନାକୁ ଆସିବା ପରେ ଜନଅସନ୍ତୋଷ ଦେଖାଯାଇଛି।
