ମୋରଡ଼ା/ଗୋପବନ୍ଧୁ ନଗର,୧୩ା୩(ଡି.ଏନ.ଏ.): ମୋରଡ଼ା ତହସିଲ ଅଧୀନ ହଳଦୀପାଳର ଶୀର୍ଷାପାଳଠାରେ ଚୋରା ବାଲି ଚାଲାଣ କରୁଥିବା ଟ୍ରାକ୍ଟରକୁ ମୋରଡ଼ା ଓ ଚିତ୍ରଡା ଫାଣ୍ଡି ପୋଲିସ ଜବତ କରିଛି। ଏହି ଘଟଣାରେ ଟ୍ରାକ୍ଟର ଡ୍ରାଇଭର ଗଣେଶ ଚପିଆରଙ୍କୁ ଗିରଫ ପରେ ପୋଲିସ କୋର୍ଟଚାଲାଣ କରିଛି। ଏନେଇ ଥାନାରେ ଏକ ମାମଲା(ନଂ.୮୩/୨୩) ରୁଜୁ ହୋଇଛି। ସେହିପରି ରାସଗୋବିନ୍ଦପୁର ଥାନା ଅଧୀନ ମାଣିଦାଠାରେ ବେଆଇନ ମୋରମ ଚାଲାଣ ବେଳେ ମଧ୍ୟ ଏକ ଟ୍ରାକ୍ଟର ଜବତ ସହ ଡ୍ରାଇଭର ସପନ ମାନାଙ୍କୁ ପୋଲିସ ଗିରଫ କରିଛି। ଏ ସଂକ୍ରାନ୍ତରେ ଏକ ମାମଲା(ନଂ.୬୬/୨୩) ରୁଜୁ ହୋଇଛି।
ସେହିପରି ବେଆଇନ ଭାବେ ମୋରମ ଓ ପଥର ଆଣୁଥିବା ଦୁଇଟି ଟ୍ରାକ୍ଟରକୁ ଖୁଣ୍ଟା ଥାନା ପୋଲିସ ଜବତ କରିବା ସହ ଡ୍ରାଇଭର କୁସୁମଘାଟି ଗ୍ରାମର ସର୍ବେଶ୍ବର ବେହେରାଙ୍କୁ କୋର୍ଟ ଚାଲାଣ କରିଛି। ସେହିପରି ଅନ୍ୟ ଏକ ନମ୍ବର ବିହୀନ ଟ୍ରାକ୍ଟର ଯୋଗେ ଖଣ୍ଡାବୁଡା ଅଞ୍ଚଳରୁ ବେଆଇନ ପଥର ବୋଝେଇ କରି ଆସୁଥିବା ବେଳେ ପୋଲିସ ଚଢାଉ କରି ଡ୍ରାଇଭର ଜୁରାଡିହି ଗ୍ରାମର ରଘୁନାଥ ସିଂଙ୍କୁ ଗିରଫ କରିଛି।
