ନୂଆଦିଲ୍ଲୀ: ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ଏଲିମିନେଟରରୁ ବିଦାୟ ନେଇଛି। ଚଳିତ ସଂସ୍କରଣରେ ଦଳର ବ୍ୟାଟିଂ ଭଲ ହୋଇନାହିଁ। ପ୍ରତିଯୋଗିତା ପରେ କୋହଲିଙ୍କ ନେତୃତ୍ୱକୁ ନେଇ ଆଲୋଚନା ହେବାରେ ଲାଗିଛି। ବିରାଟଙ୍କୁ ଅଧିନାୟକ ପଦରୁ ହଟାଇ ଦିଆଯିବା ଉଚିତ ବୋଲି ୨ ଥର ଆଇପିଏଲ ଚାମ୍ପିୟନ ଗୌତମ ଗମ୍ଭୀର ମତ ଦେଇଛନ୍ତି। ମାତ୍ର ତାଙ୍କ ସହ ଏକମତ ହୋଇପାରି ନାହାନ୍ତି ଭାରତର ପୂର୍ବତନ କ୍ରିକେଟ ତାରକା ବୀରେନ୍ଦ୍ର ସେହ୍ବାଗ। ଏ କ୍ଷେତ୍ରରେ ସେ କୋହଲିଙ୍କୁ ସମର୍ଥନ ଜଣାଇଛନ୍ତି। ଦଳ ଭଲ କଲେ ଯାଇ ଅଧିନାୟକଙ୍କୁ ପ୍ରଶଂସା ମିଳିଥାଏ। କୋହଲି ଭାରତୀୟ ଦଳର ଅଧିନାୟକ ଥିବାବେଳେ ଭଲ ଫଳ ମିଳୁଛି। ସେ ଏକଦିବସୀୟ, ଟି୨୦ ଏବଂ ଟେଷ୍ଟରେ ଜିତି ପାରୁଛନ୍ତି। ମାତ୍ର ସେ ଯେତେବେଳେ ଆରସିବିର ନେତୃତ୍ୱ ନେଉଛନ୍ତି ତାଙ୍କ ଦଳ ଭଲ କରି ପାରୁନାହିଁ। ଏକ ଭଲ ଦଳ ପାଇବା ଜଣେ ଅଧିନାୟକ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେଣୁ ଟିମ୍ ମ୍ୟାନେଜମେଣ୍ଟ ଅଧିନାୟକ ପରିବର୍ତ୍ତନ କରିବା ପରିବର୍ତ୍ତେ ଏକ ଭଲ ଦଳ ଗଠନ ଉପରେ ଧ୍ୟାନ ଦେବା ଉଚିତ“ ବୋଲି ସେହ୍ବାଗ କହିଛନ୍ତି।
କୋହଲି ୧୫ ମ୍ୟାଚରୁ ୪୬୬ ରନ ସ୍କୋର କରିଥିଲେ। ତାଙ୍କ ଷ୍ଟ୍ରାଇକ୍ରେଟ୍ ଥିଲା ୧୨୧.୩୫। ମିଡିଲ ଓଭର ଗୁଡ଼ିକରେ ରନ ପାଇଁ ତାଙ୍କ ଦଳ ସଂଘର୍ଷ କରିଥିଲା। ଭଲ ଆରମ୍ଭ କରି ୧୦ ମ୍ୟାଚରୁ ୭ଟିରେ ବିଜୟୀ ହୋଇଥିଲେ ହେଁ କ୍ରମାଗତ ୫ ପରାଜୟ ଦଳକୁ ବିଦାୟ ପଥ ଦେଖାଇଥିଲା। ଅଧିନାୟକଭାବେ ଦାୟିତ୍ୱ ଠିକ୍ଭାବେ ତୁଲାଇପାରି ନ ଥିବାରୁ କୋହଲିଙ୍କୁ ନେତୃତ୍ୱରୁ ହଟାଇବା ସପକ୍ଷରେ ଯୁକ୍ତି ରଖିଥିଲେ ଗମ୍ଭୀର। ଆଇପିଏଲରେ ମହେନ୍ଦ୍ର ସିଂ ଧୋନୀ ଓ ରୋହିତ ଶର୍ମା ସଫଳ ଅଧିନାୟକ। ଏମାନଙ୍କ ସହ କୋହଲିଙ୍କ ନାମ ନିଆଯାଇ ନ ପାରେ ବୋଲି ଗମ୍ଭୀର କହିଥିଲେ। ୮ ବର୍ଷ କିଛି କମ୍ ସମୟ ନୁହେଁ। କୌଣସି ଖେଳାଳି କିମ୍ବା ଅଧିନାୟକ ୮ ବର୍ଷ ଧରି ଟ୍ରଫି ଜିତି ନ ପାରି ଦଳରେ ସ୍ଥାନ ବଜାୟ ରଖି ପାରିଛନ୍ତି କି ବୋଲି ପ୍ରଶ୍ନ କରିଥିଲେ ଗମ୍ଭୀର। ନିଜ ନେତୃତ୍ୱରେ ଗମ୍ଭୀର ୨୦୧୨ ଓ ୨୦୧୪ରେ କୋଲକାତା ନାଇଟ ରାଇଡର୍ସକୁ ଆଇପିଏଲ ଟାଇଟଲ ବିଜୟୀ କରାଇଥିଲେ।
