ନୂଆଦିଲ୍ଲୀ,୧୯।୩: ଗୁରୁବାର ଖେଳାଯାଇଥିବା ଇଂଲଣ୍ଡ ବିପକ୍ଷ ଟି୨୦ର ଚତୁର୍ଥ ମ୍ୟାଚ୍ରେ ଭାରତୀୟ କ୍ରିକେଟର ସୂର୍ଯ୍ୟକୁମାର ଯାଦବ ଉଲ୍ଲେଖନୀୟ ପ୍ରଦର୍ଶନ କରିଥିଲେ। ତାଙ୍କର ୫୭ରନ୍ର ପାଳିକୁ ଅନେକ ପ୍ରଶଂସା କରିବା ସହ ସେ ଭବିଷ୍ୟତରେ ଭାରତ ପାଇଁ ଜଣେ ପ୍ରତିଭାବାନ ବ୍ୟାଟ୍ସମ୍ୟାନ୍ ପାଲଟିବେ ବୋଲି ଅନେକ ମତ ରଖିଥିଲେ। ଏହି ଯୋଗଦାନକୁ ନେଇ ତାଙ୍କୁ ‘ମ୍ୟାନ୍ ଅଫ୍ ଦ ମ୍ୟାଚ୍’ ମଧ୍ୟ ଘୋଷଣା କରାଯାଇଥିଲା। ଏସବୁ ସତ୍ତ୍ୱେ ସୂର୍ଯ୍ୟକୁମାରଙ୍କ ପ୍ରଶଂସା କରିବା ବଦଳରେ ଦଳର ଅନ୍ୟ ଏକ ଖେଳାଳିଙ୍କ ପ୍ରଶଂସାରେ ଶତମୁଖ ହୋଇଛନ୍ତି ପୂର୍ବ ଭାରତୀୟ ଓପନର୍ ବିରେନ୍ଦ୍ର ସେହଓ୍ବାଗ୍। ସେ ହେଲେ ହାର୍ଦ୍ଦିକ ପାଣ୍ଡ୍ୟା।
ଚତୁର୍ଥ ଟି୨୦ରେ ଟସ୍ ହାରିବା ପରେ ଭାରତ ବ୍ୟାଟିଂ କରିବାକୁ ଓହ୍ଲାଇଥିଲା। ହେଲେ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଶୀର୍ଷ କ୍ରମ ଏକପ୍ରକାର ଫେଲ ମାରିଥିଲେ। ହେଲେ ସୂର୍ଯ୍ୟକୁମାର ସ୍ଥିତିକୁ ସମ୍ଭାଳି ନେଇଥିଲେ। ପରେ ମଧ୍ୟକ୍ରମ ବ୍ୟାଟ୍ସମ୍ୟାନ୍ଙ୍କ ବ୍ୟାଟିଂ ଯୋଗୁ ଭାରତ ୮ ଉଇକେଟ ହରାଇ ୧୮୫ ରନ୍ କରିଥିଲା। ଏହା ଇଂଲଣ୍ଡ ପାଇଁ ସହଜ ବିଜୟ ଲକ୍ଷ୍ୟ ଥିଲା। ଏଭଳିସ୍ଥିତିରେ ଭାରତୀୟ ବୋଲରମାନଙ୍କ ଉପରେ ଦାୟିତ୍ୱ ବଢ଼ିଯାଇଥିଲା। ଶାର୍ଦ୍ଦୁଳ ଠାକୁର ୩ ଉଇକେଟ ନେଇଥିଲେ ହେଁ ୪୨ ରନ୍ ଦେଇଥିଲେ। ପରେ ଓ୍ବାଶିଂଟନ ସୁନ୍ଦର କୌଣସି ଉଇକେଟ ନ ନେଇ ୫୨ ରନ୍ ଦେଇଥିଲେ। ରାହୁଲ ଚହର ୩୫ ରନ୍ରେ ୨ ଉଇକେଟ ନେଇଥିଲେ। ଭୁବନେଶ୍ୱର କୁମାର ୩୦ ରନ୍ ଦେଇ ୧ ଉଇକେଟ ନେଇଥିଲେ। ହେଲେ କେବଳ ହାର୍ଦ୍ଦିକ ୨ ଉଇକେଟ ନେବା ସହ ଇଂଲଣ୍ଡ ବ୍ୟାଟ୍ସମ୍ୟାନ୍ମାନଙ୍କୁ ସହଜରେ ରନ୍ କରିବାକୁ ଦେଇ ନ ଥିଲେ। ଅପରେଶନ ପରେ ଫିଟ୍ ହୋଇ ବୋଲିଂ କରୁଥିବା ହାର୍ଦ୍ଦିକ ୪ ଓଭରରେ ମାତ୍ର ୧୬ ରନ୍ ଦେଇଥିଲେ। ଏହା ସେହଓ୍ବାଗଙ୍କୁ ପ୍ରଭାବିତ କରିଛି। ତାଙ୍କ ସପକ୍ଷରେ ସେହଓ୍ବାଗ ଟୁଇଟ୍ କରିଛନ୍ତି। ୨/୧୬ ତାଙ୍କର ପ୍ରଦର୍ଶନ ବେଶ ଭଲ ବୋଲି ସେ କହିବା ସହ ମ୍ୟାଚ୍ ଜିତିବା ପଛରେ ତାଙ୍କର ହାତ ଥିବା କହିଛନ୍ତି।
