ମହାକାଳପଡ଼ା,୨୭ା୧୨(ଡି.ଏନ.ଏ.):କେନ୍ଦ୍ର ଓ ରାଜ୍ୟ ସରକାର କୃଷି ଓ କୃଷକଙ୍କ ବିକାଶ ପାଇଁ ବିଭିନ୍ନ ଯୋଜନାରେ ବିପୁଳ ଅର୍ଥ ବ୍ୟୟ କରୁଛନ୍ତି। ହେଲେ କୃଷି ବିଭାଗର ଅନେକ ଯୋଜନା ତୃଣମୂଳ ସ୍ତରରେ ପହଞ୍ଚତ୍ ପାରୁନି ବୋଲି ବହୁ ଚାଷୀ ଅଭିଯୋଗ କରିଛନ୍ତି। ବିଭାଗୀୟ ଅଧିକାରୀଙ୍କୁ ଅଭିଯୋଗ କଲେ ମଧ୍ୟ ବିଭାଗ ଅନ୍ୟ ମୁଣ୍ଡରେ ଦୋଷ ଦେଇ ଖସିଯାଉଛନ୍ତି। ଏହାର ଏକ ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲାର ମହାକାଳପଡ଼ା ବ୍ଲକ ଅଧୀନ ସ୍ଥାନୀୟ ପେଟଛେଲା ଓ ରାମନଗର ପଞ୍ଚାୟତର ଅର୍ଥକରୀ (ତୈଳବୀଜ) ଚିନାବାଦାମ ଚାଷୀ। ଏହି ପଞ୍ଚାୟତର ବି.ବି. କଲୋନୀ (ଆଖୁଗଡ଼ା)ର କେତେକ ବାଦାମ ଚାଷୀ ସରକାରୀ କୃଷି ବିଭାଗ କର୍ମଚାରୀଙ୍କୁ ରିହାତି ଦରରେ ବାଦାମ ବିହନ ଯୋଗାଣ ପାଇଁ ନିଦେଦନ କରିଥିଲେ। ହେଲେ ଏ ପର୍ଯ୍ୟନ୍ତ ଚାଷୀଙ୍କୁ ବିହନ ଯୋଗାଇବାରେ ବିଭାଗ ବିଫଳ ହୋଇଛି ବୋଲି ଅଭିଯୋଗ ହେଉଛି। ଏହି ବାଦାମ ଚାଷରେ ଏକର ପ୍ରତି ୨୦ରୁ ୨୫ ହଜାର ଟଙ୍କା ବ୍ୟୟ ହେଉଛି। ସେହିପରି ଜମିରେ ହଳ, କୀଟନାଶକ ଔଷଧ, ଚୂନ, ସାର ପ୍ରୟୋଗ କରି ଜମିକୁ ପ୍ରସ୍ତୁତ କରିବାକୁ ପଡୁଛି। ସରକାରୀ ବାଦାମ ବିହନକୁ ଚାହିଁ ଚାହିଁ ସମୟ ଗଡିଯିବାରୁ ଚାଷୀ ବାଧ୍ୟ ହୋଇ ଖୋଲା ବଜାରରୁ ଚଢ଼ା ଦରରେ କିଲୋ ପ୍ରତି ଶହେ ଟଙ୍କାରୁ ଅଧିକ ମୂଲ୍ୟରେ କିଣି ଚାଷ କରୁଛୁ ବୋଲି ଜଗଦୀଶ ଦେବନାଥ, ହାରାଧନ ଦେବନାଥ, ସୁମଙ୍ଗଳ ଦେବନାଥ, ମଧୁ ଦେବନାଥ, ସୁଧୀର ଦେବନାଥ, ସୁଶୀଳ ଦେବନାଥ, ସମର ଦେବନାଥ, ସମୀର ଦେବନାଥ, ହରେକୃଷ୍ଣ ଦେବନାଥ କହିଛନ୍ତି।
ଅନ୍ୟପକ୍ଷରେ ବି.ବି. କଲୋନୀ ଗ୍ରାମର ଚିନାବାଦାମ କ୍ଷେତକୁ ଜଳସେଚନ ସୁବିଧା ନାହିଁ। ଚାଷୀ ନିଜସ୍ବ ଉଦ୍ୟମରେ ସ୍ୟାଲୋ ପମ୍ପସେଟ୍ ଓ ଚୁଆ ଖୋଳି ଜଳସେଚନ ସୁବିଧା କରାଉଛନ୍ତି। ସରକାରଙ୍କ ରିହାତି ଦରରେ କୃଷି ଯନ୍ତ୍ରପାତି ଯୋଜନା ବେନାମୀ ଚାଷୀମାନେ ହାତଉଥିବା ଚାଷୀମାନେ ଅଭିଯୋଗ କରୁଛନ୍ତି। ଯଥା -ପମ୍ପସେଟ୍, ଔଷଧ ସିଞ୍ଚନ ମେଶିନ୍, ଚିନାବାଦାମ ମଞ୍ଜି ବୁଣିବା ଯନ୍ତ୍ର, ଟ୍ରାକ୍ଟର, ପାୱାରଟିଲର ଆଦି ଯୋଗାଣରେ ବ୍ଲକ କୃଷି ବିଭାଗ ବିଫଳ ବୋଲି ବୁଦ୍ଧିଜୀବୀ ସୁବାସ ସ୍ବାଇଁ କହିଛନ୍ତି। ଅପରପକ୍ଷରେ ସରକାରୀ ନିୟମ ଅନୁସାରେ, ଚାଷୀଙ୍କୁ ରିହାତି ଦରରେ କୃଷି ଯନ୍ତ୍ରପାତି ନ ମିଳିବାରୁ ଚାଷୀମାନେ ବାଧ୍ୟ ହୋଇ ହଳ ଲଙ୍ଗଳକୁ ଭରସା କରିଛନ୍ତି ବୋଲି ବୁଦ୍ଧିରାମ ଦେବନାଥ କହିଛନ୍ତି। ଏ ନେଇ ମାର୍ଶାଘାଇ ଜିଲା କୃଷି ଅଧିକାରୀ ସଞ୍ଜୀବ କୁମାର ମୁଦୁଲିଙ୍କୁ ପଚାରିବାରେ ବାଦାମ ବିହନ ଉପଲବ୍ଧ ହୋଇପାରୁନି। ଆଗୁଆ ପ୍ରି-ବୁକିଂ କଲେ ପ୍ରାଥମିକ କୃଷି ସମବାୟ ସମିତି ପକ୍ଷରୁ ଯୋଗାଇ ଦିଆଯିବ ବୋଲି ସେ କହିଛନ୍ତି।
